ବରଗଡ଼ ଅଫିସ,୧୮।୧୨- ବରଗଡ଼ ଜିଲା ବରପାଲି ଜଗନ୍ନାଥ ନଗରରେ ଗତ ୧୩ ତାରିଖରେ ଘଟିଥିବା ହତ୍ୟାକାଣ୍ଡ ଉପରୁ ପରଦା ହଟିଛି। ଚୋରି ଘଟଣାକୁ କେନ୍ଦ୍ର କରି ଦୁଇ ସାଙ୍ଗ ମଧ୍ୟରେ ବଚସାରୁ ଏହି ହତ୍ୟାକାଣ୍ଡ ଘଟିଥିବା ପୋଲିସ ତଦନ୍ତରୁ ଜଣାପଡିଛି। ପୋଲିସ ଅଭିଯୁକ୍ତ ବରଗଡ଼ ୱାର୍ଡ ନଂ-୨ ତଳିପଡା ନିବାସୀ କଇରୁ ବେହେରା(୧୯) ଓରଫ ରାହୁଲଙ୍କୁ ଗିରଫ କରିଛି। ତାଙ୍କ ନିକଟରୁ ହତ୍ୟାକାଣ୍ଡରେ ବ୍ୟବହୃତ ଲୁହା ପାଇପ, ୨ଟି ବାଇକ, ୨ଟି ମୋବାଇଲ ଜବତ ହୋଇଛି।
ବୁଧବାର ବରଗଡ଼ ଜିଲା ପୋଲିସ ମୁଖ୍ୟାଳୟରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଏସ୍ପି ପଦ୍ମିନୀ ସାହୁ ସୂଚନା ଦେଇ କହିଛନ୍ତି, ମୃତ ପ୍ରଶାନ୍ତ ପରଧିଆ(୧୯) ଏବଂ ଗିରଫ ଅଭିଯୁକ୍ତ ରାହୁଲ ବରଗଡ଼ ୱାର୍ଡ ନଂ-୨ର ବାସିନ୍ଦା। ଗତ ୧୨ ତାରିଖ ଉଭୟେ ଟ୍ରେନ ଯୋଗେ ବଲାଙ୍ଗୀର ଯାଇଥିଲେ ଏବଂ ସେଠାକାର ଏକ ଲଜ୍ରେ ରହିଥିଲେ। ତେବେ ୧୩ ତାରିଖ ଭୋଜନ ପରେ ମୃତ ପ୍ରଶାନ୍ତଙ୍କୁ ନ ଜଣାଇ ରାହୁଲ ଏକ ଘରୋଇ ଯାତ୍ରୀବାହୀ ବସ ଯୋଗେ ବରଗଡ଼ ଫେରି ଆସିଥିଲେ ଏବଂ ବରଗଡ଼ ପହଞ୍ଚିବା ପରେ ସେ ନେଇ ପ୍ରଶାନ୍ତଙ୍କୁ ଜଣାଇଥିଲେ। ଏହାପରେ ପ୍ରଶାନ୍ତ ତାଙ୍କ ଅନ୍ୟଜଣେ ବନ୍ଧୁ ପରାଧୀନଙ୍କ ସହିତ ଟ୍ରେନ ଯୋଗେ ବରଗଡ଼ ଫେରିବା ବାଟରେ ବରପାଲିରେ ଓହ୍ଲାଇଥିଲେ ଏବଂ ତାଙ୍କୁ ସେଠାକୁ ନେବା ପାଇଁ ଆସିବାକୁ ରାହୁଲଙ୍କୁ ଫୋନ କରିଥିଲେ । ରାହୁଲ ଅନ୍ୟଜଣେ ସାଙ୍ଗ ରିକୁ ପ୍ରଧାନଙ୍କୁ ଧରି ପ୍ରଶାନ୍ତଙ୍କ ବାଇକ ଯୋଗେ ବରପାଲି ପହଞ୍ଚିଥିଲେ। ବରପାଲି ଯୋଗିମୁଣ୍ଡାରେ ସେମାନଙ୍କ ଭେଟ ହୋଇଥିଲା। ଏହାପରେ ପରାଧୀନ ଓ ରିକୁ ଟ୍ରେନ୍ ଯୋଗେ ଘରକୁ ଫେରିଥିବା ବେଳେ ବରପାଲିରେ ଅଟକି ଥିବା ପ୍ରଶାନ୍ତ ଓ ରାହୁଲଙ୍କ ମଧ୍ୟରେ ପୂର୍ବରୁ ଚୋରି କରିଥିବା ବାଇକ ଏବଂ ମୋବାଇଲକୁ ନେଇ କଥା କଟାକଟି ହୋଇଥିଲା। ଏଥିରେ ପ୍ରଶାନ୍ତ ରାଗି ଯାଇଥିଲେ ଏବଂ ରାହୁଲଙ୍କୁ ବରପାଲିର ତାଙ୍କ ମଉସା ଘରୁ ଟଙ୍କା ଆଣିବାକୁ କହିଥିଲେ। ତେବେ ଟଙ୍କା ଆଣିବା ପାଇଁ ଉଭୟେ ବରପାଲି ଜଗନ୍ନାଥ ନଗରରେ ରହୁଥିବା ରାହୁଲଙ୍କ ମଉସା ଘରକୁ ଯାଇଥିଲେ ହେଁ ରାତିରେ ସେମାନେ ଘର ପାଇ ନ ଥିଲେ। ଏହାପରେ ପ୍ରଶାନ୍ତ ଆହୁରି ରାଗି ଯାଇ ନିଜ ବାଇକ ଡିକିରେ ରଖିଥିବା ଏକ ଲୁହା ପାଇପ ବାହାର କରି ରାହୁଲଙ୍କୁ ଆକ୍ରମଣ ଉଦ୍ୟମ କରିଥିଲେ। ମାତ୍ର ରାହୁଲ ସେହି ଲୁହା ପାଇପ ଛଡାଇ ଆଣି ପ୍ରଶାନ୍ତଙ୍କ ମୁଣ୍ଡକୁ ଆକ୍ରମଣ କରିଥିଲେ। ଏଥିରେ ପ୍ରଶାନ୍ତ ଟଳି ପଡିବା ପରେ ରାହୁଲ ମୃତ ପ୍ରଶାନ୍ତଙ୍କ ବାଇକ ଧରି ସେଠାରୁ ଖସି ଆସିଥିଲେ। ତେବେ ୧୪ ତାରିଖରେ ଘଟଣାସ୍ଥଳରୁ ମୃତଦେହ ଉଦ୍ଧାର ହେବା ପରେ ବରପାଲି ଥାନା ଆଇଆଇସି ରୋଜାଲିନ ପଟେଲଙ୍କ ତତ୍ତ୍ବାବଧାନରେ ଏହାର ତଦନ୍ତ ଚାଲିଥିଲା ଏବଂ ଅଭିଯୁକ୍ତଙ୍କୁ ଗିରଫ ସହିତ ବ୍ୟବହୃତ ସାମଗ୍ରୀ ଜବତ ହୋଇଥିବା ଏସ୍ପି ସାହୁ କହିଛନ୍ତି। ଖବରଦାତା ସମ୍ମିଳନୀରେ ବରପାଲି ଥାନା ଆଇଆଇସି ପଟେଲ ମଧ୍ୟ ଉପସ୍ଥିତ ଥିଲେ।
