କରାଚୀ,୩।୨- ଦୀର୍ଘଦିନ ହେଲା ପାକିସ୍ତାନ ଜାତୀୟ ଦଳରୁ ବାଦ୍ ପଡ଼ିଥିବା ଉମର ଅକମଲ ଶୃଙ୍ଖଳାଗତ ଦଣ୍ଡାଦେଶର ସମ୍ମୁଖୀନ ହୋଇପାରନ୍ତି। ସେ ଫିଟ୍ନେସ ଟେଷ୍ଟବେଳେ ଟ୍ରେନରଙ୍କୁ ଅପମାନିତ କରିଥିବା ରିପୋର୍ଟ ହୋଇଛି। ଫିଟ୍ନେସ ଟେଷ୍ଟବେଳେ ଟ୍ରେନରଙ୍କୁ ‘ଚର୍ବି କୋଉଠି ଅଛି’ ବୋଲି ପ୍ରଶ୍ନ କରିଥିଲେ। ପାକିସ୍ତାନ କ୍ରିକେଟ ବୋର୍ଡ (ପିସିବି) ନିକଟରେ ଏ ନେଇ ରିପୋର୍ଟ ହୋଇଛି। ଜାତୀୟ କ୍ରିକେଟ ଏକାଡେମିରେ ଘଟିଥିବା ଘଟଣା ସମ୍ପର୍କରେ ଆମେ ଅବଗତ ଅଛୁ। ଏ ନେଇ କଡ଼ା କାର୍ଯ୍ୟାନୁଷ୍ଠାନ ଦରକାର। ଜୁନିୟର ଅକମଲ ଫିଟନେସ ଟେଷ୍ଟରେ ବିଫଳ ହେବା ପରେ ଶାର୍ଟ ଖୋଲି ଚର୍ବି କାହିଁ ବୋଲି ପ୍ରଶ୍ନ କରିଥିଲେ। ଫିଟ୍ନେସ ସମସ୍ୟା ଦେଇ ଅକମଲ ବ୍ରଦର୍ସ ଦୀର୍ଘ ବର୍ଷ ହେଲା ସଂଘର୍ଷ କରୁଛନ୍ତି। ମୁଖ୍ୟକୋଚ୍ ତଥା ପୂର୍ବତନ ଅଧିନାୟକ ମିଶବା ଉଲ ହକ୍ ଏବେ ଖେଳାଳିଙ୍କ ଫିଟନେସ ଉପରେ ଅଧିକ ଗୁରୁତ୍ୱ ଦେଉଛନ୍ତି। ତାଙ୍କ ନିର୍ଦ୍ଦେଶ ଅନୁଯାୟୀ, ପ୍ରତ୍ୟେକ ପ୍ରୋଭିନ୍ସିଆଲ ଦଳର ଖେଳାଳି ୪ ମାସକୁ ଥରେ ଫିଟନେସ ଟେଷ୍ଟର ସମ୍ମୁଖୀନ ହେବେ। ଏକଦା ପାକିସ୍ତାନ ଦଳ ପାଇଁ ପ୍ରତିଭାସମ୍ପନ୍ନ ଯୁବ ଖେଳାଳି ଥିବା ଉମର ୨୦୦୯ରେ ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ପଦାର୍ପଣ କରିଥିଲେ। ସେ ଏପର୍ଯ୍ୟନ୍ତ ୧୯ ଟେଷ୍ଟ, ୧୨୧ ଦିନିକିଆ ଓ ୮୪ ଟି୨୦ ଖେଳିସାରିଛନ୍ତି।
