ପୁରୀ ଅଫିସ,୧୩ା୧: ପୁରୀକୁ ସ୍ବଚ୍ଛ ଓ ପରିଷ୍କାର ରଖିବା ଲାଗି ଜିଲା ପ୍ରଶାସନ ପକ୍ଷରୁ ଏକାଧିକ ପଦକ୍ଷେପ ଗ୍ରହଣ କରାଯାଇଛି। ‘ମୋ ବିଚ୍’ ହେଉ ଅବା ‘ମୋ ପୁରୀ ସ୍ବଚ୍ଛ ପୁରୀ’ ଭଳି କାର୍ଯ୍ୟକ୍ରମ ପାଇଁ ଧୀରେ ଧୀରେ ଜାତୀୟସ୍ତରରେ ସଫଳତା ସାଉଣ୍ଟୁଛି ପୁରୀ। ନିକଟରେ ଭାରତର ଦ୍ୱିତୀୟ ସ୍ବଚ୍ଛ ବେଳାଭୂମି ମାନ୍ୟତା ପାଇଥିବା ପୁରୀ ପୁଣି ସ୍ବଚ୍ଛତା ପାଇଁ ସର୍ବଭାରତୀୟ ସ୍ତରରେ ସମ୍ମାନିତ ହୋଇଛି। ନୂଆଦିଲ୍ଲୀଠାରେ ଆୟୋଜିତ ବାହ୍ୟ ମଳମୁକ୍ତ ସମ୍ପର୍କିତ କର୍ମଶାଳାରେ ରବିବାର ପ୍ଲାଷ୍ଟିକ ଆବର୍ଜନା ପରିଚାଳନା କ୍ଷେତ୍ରରେ ପୁରୀ ପୁରସ୍କୃତ ହୋଇଛି।
ନୂଆଦିଲ୍ଲୀର ହୋଟେଲ ପ୍ରାଇଡ ପ୍ଲାଜା ଏରୋ ସିଟିରେ ବାହ୍ୟ ମଳମୁକ୍ତ ସମ୍ପର୍କିତ ଜାତୀୟସ୍ତରୀୟ କର୍ମଶାଳା ଅନୁଷ୍ଠିତ ହୋଇଥିଲା। ପ୍ଲାଷ୍ଟିକ ଆବର୍ଜନା ପରିଚାଳନା କ୍ଷେତ୍ରରେ ପୁରୀ ଜିଲା ପକ୍ଷରୁ ଯେଉଁ ସନ୍ଦର୍ଭ ଉପସ୍ଥାପନ କରାଯାଇଥିଲା ତାହା ବେଶ୍ ଆଦୃତି ଲାଭ କରିଥିଲା। ଏଥିପାଇଁ ପୁରୀକୁ କେନ୍ଦ୍ର ସରକାରଙ୍କ ଜଳ ଶକ୍ତି ମନ୍ତ୍ରଣାଳୟ (ଜଳ ସମ୍ପଦ ମନ୍ତ୍ରଣାଳୟ) ଏବଂ ସ୍ବଚ୍ଛ ଭାରତ ମିଶନ ଗ୍ରାମୀଣ ପକ୍ଷରୁ ପୁରସ୍କୃତ କରାଯାଇଛି। କର୍ମଶାଳାରେ ଅତିଥି ଭାବେ ଯୋଗଦେଇଥିବା ବଲିଉଡ୍ ଅଭିନେତା ଅମୀର ଖାନ୍ଙ୍କଠାରୁ ପୁରୀ ପୌରସଂସ୍ଥାର ଅତିରିକ୍ତ ନିର୍ବାହୀ ଅଧିକାରୀ ସରୋଜ କୁମାର ସ୍ବାଇଁ ପୁରସ୍କାର ଗ୍ରହଣ କରିଛନ୍ତି। କର୍ମଶାଳାରେ ଅତିରିକ୍ତ ନିର୍ବାହୀ ଅଧିକାରୀ ସ୍ବାଇଁ ପ୍ଲାଷ୍ଟିକ ଆବର୍ଜନା ପରିଚାଳନା ନେଇ ଜିଲା ପ୍ରଶାସନ ଯେଉଁ ପଦକ୍ଷେପ ଗ୍ରହଣ କରିିଛି ତାହା ଉପସ୍ଥାପନ କରିଥିଲେ। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷରୁ ପ୍ରସ୍ତୁତ ଏହି ସନ୍ଦର୍ଭକୁ ପଞ୍ଚାୟତିରାଜ ବିଭାଗ ଅନୁମୋଦନ କରି କେନ୍ଦ୍ର ସରକାରଙ୍କୁ ସୁପାରିସ କରିଥିଲା। ପ୍ଲାଷ୍ଟିକ ଆବର୍ଜନା ପରିଚାଳନା କ୍ଷେତ୍ରରେ ଏହା ସର୍ବୋକୃଷ୍ଟ ବୋଲି ବିବେଚିତ ହେବା ସହ ଏହାକୁ ସମସ୍ତେ ଉଚ୍ଚ ପ୍ରଶଂସା କରିଥିଲେ।
ଗତ ଗାନ୍ଧୀଜୟନ୍ତୀଠାରୁ ପୁରୀକୁ ଶତ ପ୍ରତିଶତ ପ୍ଲାଷ୍ଟିକମୁକ୍ତ କରିବା ଲାଗି ଜିଲାପାଳ ବଲୱନ୍ତ ସିଂଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ବିଭିନ୍ନ ପଦକ୍ଷେପ ନିଆଯାଇଛି। ମୋ ବିଚ୍ କାର୍ଯ୍ୟକ୍ରମରେ ବେଳାଭୂମି ସଫେଇ କରାଯାଉଛି। ଏଥିରେ ବିଭିନ୍ନ ସ୍ବେଚ୍ଛାସେବୀ ସଙ୍ଗଠନ, ସ୍କୁଲ ଛାତ୍ରୀଛାତ୍ର, ବୁଦ୍ଧିଜୀବୀ ସମସ୍ତେ ସାମିଲ ହେଉଛନ୍ତି। ସେହିପରି ସହରକୁ ସ୍ବଚ୍ଛ ରଖିବା ଲାଗି ଆରମ୍ଭ ହୋଇଛି ମୋ ପୁରୀ ସ୍ବଚ୍ଛ ପୁରୀ କାର୍ଯ୍ୟକ୍ରମ। ସହରର ପ୍ରତ୍ୟେକ ୱାର୍ଡରେ ବୁଲୁଛି ସ୍ବଚ୍ଛ ସବାରି ଗାଡ଼ିି। ଏହି ଗାଡ଼ିି ମାଧ୍ୟମରେ ପ୍ରତ୍ୟେକ ଘରୁ ଆବର୍ଜନା ସଂଗ୍ରହ କରାଯାଉଛି। ରାସ୍ତାଘାଟରେ ଯେପରି ଅଳିଆ ଆବର୍ଜନା ନ ପଡ଼ିବ ସେଥିଲାଗି ପଦକ୍ଷେପ ନିଆଯାଇଥିବାବେଳେ ଜରିମାନା ବ୍ୟବସ୍ଥା ବି କରାଯାଇଛି।
