ମୁମ୍ବାଇ: ବଲିଉଡ୍ ସୁପରଷ୍ଟାର୍ ଅକ୍ଷୟ କୁମାର କରୋନା ପ୍ରଭାବିତଙ୍କ ସହାୟତା ପାଇଁ ପ୍ରଧାନମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ୨୫ କୋଟି ଟଙ୍କା ପ୍ରଦାନ କରିଛନ୍ତି। ସ୍ବାମୀଙ୍କ ଏପରି କାର୍ଯ୍ୟକୁ ନେଇ ଗର୍ବ ଅନୁଭବ କରିଛନ୍ତି ସ୍ତ୍ରୀ ଟ୍ବିଙ୍କିଲ୍ ଖାନ୍ନା। ସେ କହିଛନ୍ତି, ଅକ୍ଷୟଙ୍କୁ ଏତେ ପରିମାଣର ଟଙ୍କା କାହିଁକି ଦାନ କଲ ବୋଲି ପଚାରିବାରୁ ଯାହା ଉତ୍ତର ପାଇଲେ ସେଥିରେ ସେ ବେଶ୍ ଭାବବିହ୍ବଳ ହୋଇପଡ଼ିଥିଲେ। ଟ୍ବିଙ୍କିଲ୍ ଅକ୍ଷୟଙ୍କୁ ଟୁଇଟ୍ କରିଛନ୍ତି, ମୁଁ ଏହି ମଣିଷଙ୍କ ପ୍ରତି ବହୁ ଗର୍ବିତ। କାରଣ ଯେତେବେଳେ ତାଙ୍କୁ ପଚାରିଲି ଏତେ ପରିମାଣର ଟଙ୍କା ଦାନ କରିବାର କ’ଣ ଜରୁରୀ ଥିଲା। ସେ କେବଳ ଏତିକି କହିଥିଲେ, ଯେତେବେଳେ ମୁଁ ଫିଲ୍ମ ଲାଇନ୍ରେ ପାଦ ଥାପିଥିଲି ସେତେବେଳେ ମୋ’ ପାଖରେ ଟଙ୍କାଟିଏ ନ ଥିଲା। ଏବେ ମୋ’ ପାଖରେ ସେତିକି ଅଛି। ଯାହାଦ୍ୱାରା ମୁଁ ଲୋକଙ୍କ ପାଇଁ କିଛି କରିପାରିବି। ମୁଁ ନିଜକୁ କେମିତି ରୋକିପାରିବି? ଏଭଳି ଉଦାର ବ୍ୟକ୍ତିଙ୍କୁ ସ୍ବାମୀ ଭାବେ ପାଇ ସେ ବହୁତ ଖୁସି ବୋଲି ଟ୍ବିଙ୍କିଲ୍ କହିଛନ୍ତି।
ବଲିଉଡ୍ର ସୁପରଷ୍ଟାର ପାଲଟିଥିବା ଅକ୍ଷୟ ଦିନେ ଏହି ଫିଲ୍ମ ଲାଇନ୍କୁ ଆସିବା ପାଇଁ ବହୁ କଷ୍ଟ କରିଛନ୍ତି। ଦିନଥିଲା ସେ ପାମ୍ପଡ଼ ବେଲି ପେଟ ପୋଷୁଥିଲେ। ଏପରିକି କୋଲକାତାରେ ଚପରାଶି କାମ କରୁଥିଲେ। ଖୁବ୍ କମ୍ ଲୋକଙ୍କୁ ଜଣାଥିବ ଅକ୍ଷୟ ଫିଲ୍ମରେ ଅଡିଶନ୍ ଦେବାକୁ ଜଣେ ଫଟୋଗ୍ରାଫରଙ୍କ ନିକଟରେ ୧୮ ମାସ ମାଗଣା କାମ କରିଥିଲେ। ବହୁ ଘାତ ପ୍ରତିଘାତ ମଧ୍ୟରେ ସେ ଆଜି ଏହି ସ୍ଥାନରେ ପହଞ୍ଚି ପାରିଛନ୍ତି। କଷ୍ଟ କ’ଣ ସେ ଭଲ ଭାବେ ଜାଣିଛନ୍ତି। ତେଣୁ ଏତେ ପରିମାଣର ଟଙ୍କା ଦାନ କରିବାରେ ଟିକେ ବି କୁଣ୍ଠାବୋଧ କରିନାହାନ୍ତି। ଅକ୍ଷୟଙ୍କ ଏପରି କାର୍ଯ୍ୟକୁ ଫ୍ୟାନ୍ମାନେ ବେଶ୍ ପ୍ରଶଂସା କରିବାରେ ଲାଗିଛନ୍ତି।
