ପ୍ରକଳ୍ପ ପାଇଁ ବିସ୍ଥାପିତଙ୍କୁ ମିଳୁନି ମୌଳିକ ସୁବିଧା
7:33 amSeptember 1, 2019 / 21

ବ୍ରହ୍ମପୁର ଅଫିସ,୧ା୯-ବିଭିନ୍ନ ପ୍ରକଳ୍ପ ନିର୍ମାଣ ପାଇଁ ବିସ୍ଥାପିତ ପରିବାରକୁ ମିଳୁନି ମୌଳିକ ସୁବିଧା । ସମାଧାନ ଲାଗି ଦକ୍ଷିଣାଞ୍ଚଳ ରାଜସ୍ବ କମିଶନର (ଆରଡିସି)ଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେଉଛି ଥଇଥାନ ଓ ଉପାନ୍ତ ଅଞ୍ଚଳ ଉନ୍ନୟନ ପରାମର୍ଶଦାତା (ଆରପିଡିଏସି) କମିଟି ବୈଠକ। ଏଥିରେ ନିର୍ବାଚିତ ଲୋକ ପ୍ରତିନିଧି ତଥା ଏମ୍‌ପି, ବିଧାୟକ, ଗ୍ରାମାଞ୍ଚଳ ପ୍ରତିିନିଧି, ଜିଲାପାଳ ଏବଂ ବିଭାଗୀୟ ଅଧିକାରୀ ତଥା ଇଞ୍ଜିନିୟରମାନେ ଯୋଗ ଦେଉଛନ୍ତି। ପରବର୍ତ୍ତୀ ପର୍ଯ୍ୟାୟରେ ନିଆଯାଉଥିବା ନିଷ୍ପତ୍ତି ବିଡ଼ା ବାନ୍ଧି ପକାଇ ଦିଆଯାଉଛି। ଗତ ୧୮ ଦିନ ମଧ୍ୟରେ ଦୁଇ ଆରପିଡିଏସି ବୈଠକ ବ୍ରହ୍ମପୁରରେ ହୋଇଛି। ବିସ୍ଥାପିତ ହେଉଥିବା ଲୋକେ କେତେ ସଫଳତା ପାଇବେ ସେଥିପାଇଁ ଅପେକ୍ଷା କରାଯାଇଛି।
୧୩ ତାରିଖରେ ଗଜପତି ଜିଲାରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ଛେଳିଗଡ଼ ଜଳ ବିଦ୍ୟୁତ୍‌ ପ୍ରକଳ୍ପ ପାଇଁ ବିସ୍ଥାପିତ ହେଉଥିବା ଆଦିବାସୀଙ୍କ ବିକଳ୍ପ ଥଇଥାନ ଯୋଜନା ନେଇ ଆରପିଡିଏସି ବୈଠକ ଆରଡିସିଙ୍କ କାର୍ଯ୍ୟାଳୟରେ ଅନୁଷ୍ଠିତ ହୋଇଥିଲା। ବ୍ରହ୍ମପୁର ଏମ୍‌ପି ଚନ୍ଦ୍ରଶେଖର ସାହୁ, ମୋହନା ବିଧାୟକ ଦାଶରଥି ଗମାଙ୍ଗ ଓ ଅନ୍ୟ ଲୋକ ପ୍ରତିନିଧି ଯୋଗ ଦେଇଥିଲେ । ଗଜପତି ଜିଲାପାଳ ଅନୁପମ ଶାହା, ଏସ୍‌ପି ସାରା ଶର୍ମାଙ୍କ ସମେତ ଅନ୍ୟ ଅଧିକାରୀ ଓ ଜଳ ସମ୍ପଦ ବିଭାଗର ଇଞ୍ଜିନିୟରମାନେ ଉପସ୍ଥିତ ଥିଲେ। ଏହାର ୧୮ ଦିନ ବିତିଛି ଏବଂ ପ୍ରକଳ୍ପ ନିମନ୍ତେ ବିସ୍ଥାପିତ ହେଉଥିବା ଅଳ୍ପ କେତେକ ପରିବାରକୁ ଦିଗପହଣ୍ଡି ବ୍ଲକର ସାମନ୍ତରାପୁର ନିକଟରେ ନିର୍ମିତ କଲୋନୀ ପରିସରରେ କେବଳ ଚାରାରୋପଣ ବ୍ୟତୀତ ଆଉ କିଛି ହୋଇ ନ ଥିବା ଅଞ୍ଚଳବାସୀଙ୍କ ଠାରୁ ଖବର ମିଳିଛି।
ଟାଟା କମ୍ପାନୀର ଗୋପାଳପୁର ବନ୍ଦର ଭିତ୍ତିକ ମେଗା ଇସ୍ପାତ ପ୍ରକଳ୍ପ ନିମନ୍ତେ ଅନେକ ଗ୍ରାମର ଶହ ଶହ ଲୋକଙ୍କୁ ବିସ୍ଥାପିତ ହେବାକୁ ପଡ଼ିଛି। ଟାଟା ପ୍ରକଳ୍ପର ବିସ୍ଥାପିତଙ୍କ ସମସ୍ୟା ନେଇ ଗତ ଶୁକ୍ରବାର ହୋଇଥିବା ସମୀକ୍ଷା ବୈଠକରେ ଏମ୍‌ପି ଚନ୍ଦ୍ରଶେଖର ସାହୁ, ଗୋପାଳପୁର ଓ ଛତ୍ରପୁର ବିଧାୟକ ଯଥାକ୍ରମେ ପ୍ରଦୀପ ପାଣିଗ୍ରାହୀ ଓ ସୁବାସ ବେହେରା, ଜିଲା ପରିଷଦ ଅଧ୍ୟକ୍ଷା ସୋନମ ପଲେଇ, ଜିଲାପାଳ ବିଜୟ ଅମୃତା କୁଲାଙ୍ଗେ, ବ୍ରହ୍ମପୁର ଓ ଗଞ୍ଜାମ ଏସପି ପ୍ରମୁଖ ଯୋଗ ଦେଇଥିଲେ। ବିସ୍ଥାପିତଙ୍କୁ ମୌଳିକ ସମସ୍ୟାର ସମାଧାନ, ଅଧିକ କ୍ଷତିପୂରଣ ଏବଂ ଯୋଗ୍ୟତା ଭିତ୍ତିରେ ପରିବାରର ପିଲାଙ୍କୁ କମ୍ପାନୀରେ ଚାକିରି ଦେବା ପ୍ରସଙ୍ଗ ଉଠିଥିଲା। କେବଳ ସେତିକି ନୁହେଁ ଶିକ୍ଷାନୁଷ୍ଠାନ ପ୍ରତିଷ୍ଠା ଓ ଅନ୍ୟ ଆନୁସଙ୍ଗିକ ସୁବିଧା ଯୋଗାଇବାକୁ କ୍ଷତିଗ୍ରସ୍ତଙ୍କ ପ୍ରତିନିଧି ଏବଂ ଉପସ୍ଥିତ ଅଞ୍ଚଳବାସୀ ଗୁରୁତ୍ୱ ଦେଇଥିଲେ। ଟାଟା କମ୍ପାନୀ କିଭଳି ସମସ୍ୟା ସମାଧାନ କରିବ ସେନେଇ ଚାଲିଛି ଆଲୋଚନା। ବୈଠକରେ କମ୍ପାନୀ ଅଧିକାରୀ ଉପସ୍ଥିତ ଥିଲେ ।