ରଣପୁର,୮ା୧୧(ସ୍ବ.ପ୍ର.): ପୂର୍ବ ଶତ୍ରୁତାକୁ ନେଇ ରଣପୁର ଥାନା ରାମଚନ୍ଦ୍ରପୁର ଗାଁର ଅଶୋକ କୁମାର ସେଠୀ(୩୨)ଙ୍କୁ ବୁଧବାର ରାତିରେ ମରଣାନ୍ତକ ଆକ୍ରମଣ ହୋଇଛି। ଗ୍ରାମର ୩ ଯୁବକ ମୁହଁରେ ଗାମୁଛା ବାନ୍ଧି ଅଶୋକଙ୍କୁ ରଣପୁର-ଗୋପାଳପୁର ମୁଖ୍ୟ ରାସ୍ତାରେ ଖଣ୍ଡା ଓ ଭୁଜାଲି ସାହାଯ୍ୟରେ ଗୋଡାଇ ହାଣିଥିଲେ । ଅଶୋକ ଜୀବନ ବଞ୍ଚାଇବାକୁ ଦୌଡୁଥିବାବେଳେ ହଠାତ୍ ରାସ୍ତାରେ ଯାଉଥିବା ଏକ ଟ୍ରକ ଅଟକିଯିବାରୁ ଅପରାଧୀମାନେ ସ୍ଥାନଛାଡି ଫେରାର ହୋଇଯାଇଥିଲେ । ପରେ ଟ୍ରକ କର୍ମଚାରୀମାନେ ଅଶୋକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ରଣପୁର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ଅବସ୍ଥାରେ ଉନ୍ନତି ନ ଆସିବାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି । ଅଶୋକଙ୍କ ମା’ ଲତା ସେଠୀ ରଣପୁର ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୨୩୯/୧୯) ରୁଜୁ କରି ଘଟଣାର ତଦନ୍ତ ଚଳାଇଛି।
