ଭୁବନେଶ୍ୱର, ୧୬।୨(ବ୍ୟୁରୋ): ଶହୀଦନଗର ଥାନା ୟୁନିଟ୍-୯ ଗ୍ରୀଡ୍କୋ କଲୋନୀରେ ଜଣେ ଯୁବକଙ୍କୁ ୩୦ରୁ ଊର୍ଦ୍ଧ୍ୱ ଯୁବକ ଗୋଡ଼େଇ ଗୋଡ଼େଇ ହାଣିଛନ୍ତି। ସେମାନେ ଖଣ୍ଡା, ଭୁଜାଲି, ଲୁହାରଡ଼୍ରେ ଯୁବକଙ୍କୁ ଆକ୍ରମଣ କରିଛନ୍ତି। ଏଥିରେ ଯୁବକ ଜଣକ ଗୁରୁତର ଆହତ ହୋଇଛନ୍ତି। ସେ ହେଲେ ଡିସିପି ଅଫିସ୍ ପଛପଟ ଏକ ଫ୍ଲାଟରେ ରହୁଥିବା ବି.ଆର୍. ଆକାଶ ଡୋରା(୨୨)। ତାଙ୍କର ଦୁଇ ହାତ ଓ ଗୋଡ଼ରେ ଗଭୀର କ୍ଷତ ହୋଇଛି। ତାଙ୍କୁ ସ୍ଥାନୀୟ ଲୋକେ ଓ ପୋଲିସ ଉଦ୍ଧାରକରି ଶହୀଦନଗରରେ ଥିବା ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ। ପରେ ତାଙ୍କୁ ନୟାପଲ୍ଲୀସ୍ଥିତ ଅନ୍ୟ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଥାନାରେ ଅଭିଯୋଗ ହୋଇ ନ ଥିବା ବେଳେ ପୋଲିସ ଘଟଣାର ତଦନ୍ତ କରୁଛି। ଆକାଶଙ୍କୁ ଆକ୍ରମଣ ସମୟରେ ସ୍ଥାନୀୟ ଲୋକେ ଦୌଡ଼ି ଆସିବାରୁ ଆକ୍ରମଣକାରୀମାନେ ଗୋଟିଏ ବାଇକ ଛାଡ଼ି ଫେରାର ହୋଇଯାଇଛନ୍ତି। ହେଲେ ଜଣ ଯୁବକଙ୍କୁ ସ୍ଥାନୀୟ ଲୋକେ କାବୁକରି ପିଟିବା ସହ ପୋଲିସ ଜିମା ଦେଇଛନ୍ତି।
ମିଳିଥିବା ସୂଚନା ଅନୁଯାୟୀ, ୟୁନିଟ-୯ର କେତେଜଣ ପିଲାଙ୍କ ସହ ଆକାଶ ୩ ମାସ ତଳେ ଶହୀଦନଗର ଦେଇ ଯାଉଥିବା ବେଳେ ବାଣୀବିହାର କ୍ୟାମ୍ପସରେ ରହୁଥିବା ଅନ୍ୟ ଏକ ଗୋଷ୍ଠୀଙ୍କ ସହ ପାଟିତୁଣ୍ଡ ହୋଇଥିଲା। ଏନେଇ ଥାନାରେ ଅଭିଯୋଗ ହେବା ପରେ ଆପୋସ ସମାଧାନ ହୋଇଥିଲା। ହେଲେ ପ୍ରତିଶୋଧ ନେବା ଅପେକ୍ଷାରେ ଥିଲେ ବାଣୀବିହାର ଗୋଷ୍ଠୀ। ଶନିବାର ରାତି ପ୍ରାୟ ୮ଟାରେ ଆକାଶ ଗ୍ରୀଡ୍କୋ କଲୋନୀ ନିକଟ ଗ୍ରାଉଣ୍ଡରେ ୪ଜଣ ସାଙ୍ଗଙ୍କ ସହ ବସିଥିଲେ। ଏହି ସମୟରେ ୩୦ ଜଣ ଯୁବକ ମୁହଁରେ କପଡ଼ା ବାନ୍ଧି ବାଇକରେ ଆସି ଆକାଶଙ୍କୁ ମରଣାନ୍ତକ ଆକ୍ରମଣ କରିଥିଲେ। ଆକାଶ ଜୀବନ ବଞ୍ଚାଇବା ପାଇଁ ଦୌଡ଼ିଥିଲେ ମଧ୍ୟ ସେମାନେ ତାଙ୍କୁ ଛାଡ଼ି ନ ଥିଲେ। ତାଙ୍କୁ ଗୋଡ଼େଇ ଗୋଡ଼େଇ ଆକ୍ରମଣ କରିଥିଲେ। ଆକାଶଙ୍କ ଚିତ୍କାର ଶୁଣି ଅନ୍ୟ କେତେଜଣ ସାଙ୍ଗ ଓ ସ୍ଥାନୀୟ ଲୋକେ ଆସିଯିବାରୁ ସେମାନେ ସେଠାରୁ ପଳାଇ ଯାଇଥିଲେ।
