ପଟ୍ଟାଙ୍ଗି,୧୨ା୧(ଡି.ଏନ୍.ଏ.)
କୋରାପୁଟ ଜିଲାର ଅନେକ ସମ୍ପ୍ରଦାୟ ଦୀର୍ଘଦିନରୁ ଆଦିବାସୀ ମାନ୍ୟତା ଦାବି କରିଆସୁଛନ୍ତି। ସେମାନଙ୍କ ମଧ୍ୟରୁ ଅନ୍ୟତମ ଦୋରା ସମ୍ପ୍ରଦାୟ। ରାଜ୍ୟ ସରକାର ସେମାନଙ୍କୁ ଏହି ମାନ୍ୟତା ଦେବାରେ ଆଖିଦୃଶିଆ ପଦକ୍ଷେପ ନେଉ ନ ଥିବାରୁ ପୁଣିଥରେ ସେହି ଦାବି ତେଜିଛି। କିଛିଦିନ ତଳେ ଦୁରୁଆମାନେ ଆଦିବାସୀ ମାନ୍ୟତା ଦାବ କରିଥିଲେ। ଏବେ ସେହି ଦାବି ଦୋହରାଇଛନ୍ତି ଦୋରା ସମ୍ପ୍ରଦାୟ।
ପଟ୍ଟାଙ୍ଗିସ୍ଥିତ ଗାଙ୍ଗେଶ୍ୱରୀ ଉଚ୍ଚ ମାଧ୍ୟମିକ ବିଦ୍ୟାଳୟର ରୌପ୍ୟ ଜୟନ୍ତୀ ଉତ୍ସବରେ ଯୋଗ ଦେବାକୁ ଆସିଥିବା ଅନୁସୂଚିତ ଜାତି ଓ ଜନଜାତି କଲ୍ୟାଣ ମନ୍ତ୍ରୀ ଜଗନ୍ନାଥ ସାରକାଙ୍କୁ ଭେଟି ଦାବିପତ୍ର ଦେଇଛି ଦୋରା ସମ୍ପ୍ରଦାୟ। ଦୋରା ସମ୍ପ୍ରଦାୟର ଜିଲା ସଂଘ ଆବାହକ ତାଉଡୁ ଦୋରାଙ୍କ ନେତୃତ୍ୱରେ ଦୁଇ ପୃଷ୍ଠା ସମ୍ବଳିତ ଦାବିପତ୍ର ଦିଆଯାଇଛି। ମୁକାଦୋରା (ନୁକାଦୋରା) ସମ୍ପ୍ରଦାୟ ଦୀର୍ଘ ଦିନରୁ ଆଦିବାସୀ ମାନ୍ୟତା ଦାବି କରି ନିଜ ସପକ୍ଷରେ ଥିବା ମାଡ୍ରାସ ପ୍ରେସିଡେନ୍ସି ଅମଳର ସମସ୍ତ ଦଲିଲ, କୋରାପୁଟ ଗେଜେଟିୟର କାଷ୍ଟ ଆଣ୍ଡ ଟ୍ରାଇବ୍ସ ଅଫ୍ ସାଉଥଇଣ୍ଡିଆ, ଟ୍ରାଇବାଲ ଆଡଭାଇଜରି କମିଟିର ସୁପାରିଶ, ଆନ୍ଧ୍ର ସରକାରଙ୍କ କ୍ଲାସିଫିକେଶନ ଅଫ୍ କାଷ୍ଟ୍ସ ଆଣ୍ଡ ଟ୍ରାଇବାଲ୍ସ, ଓଡ଼ିଶା ସରକାରଙ୍କ ଏସ୍ସି ଏସ୍ଟି ରିସର୍ଚ୍ଚ ଆଣ୍ଡ ଟ୍ରେନିଂ ଇନଷ୍ଟିଚ୍ୟୁଟ୍ର ସୁପାରିଶ ପତ୍ର ସମେତ ଅନ୍ୟାନ୍ୟ ଦଲିଲ ରାଜ୍ୟ ସରକାରଙ୍କୁ ୨୦୦୮ରୁ ବିଭିନ୍ନ ସମୟରେ ଦେଇଆସୁଛି। ଏ ଦିଗରେ କେନ୍ଦ୍ର ସରକାର ଅବହେଳା କରୁଥିଲେ ରାଜ୍ୟ ଅନୁସୂଚିତ ଜାତି ଜନଜାତି କଲ୍ୟାଣ ମନ୍ତ୍ରୀ ଏଥିରେ ହସ୍ତକ୍ଷେପ କରି କେନ୍ଦ୍ରକୁ ସୁପାରିଶ କରନ୍ତୁ ବୋଲି ନିବେଦନ କରିଛି ଦୋରା ସମ୍ପ୍ରଦାୟ। ସେମାନେ କହିଛନ୍ତି, ପଟ୍ଟାଙ୍ଗି ବ୍ଲକର କୋଟିଆ, ତଳଗୋଲୁର ପଞ୍ଚାୟତର ବାଙ୍ଗାରଗୁଡ଼ି, ନନ୍ଦପୁର ବ୍ଲକ ପାଡୁଆ ପଞ୍ଚାୟତ ରାଇପାଡୁ ଗ୍ରାମରେ ବସବାସ କରୁଥିବା ମୁକାଦୋରା (ନୁକାଦୋରା)ଙ୍କୁ ଆଦିବାସୀ ମାନ୍ୟତା ଦେଇଛନ୍ତି ପଡ଼ୋଶୀ ଆନ୍ଧ୍ର ସରକାର। ଏହାସହ ସମସ୍ତ ସରକାରୀ ସୁବିଧା ସୁଯୋଗ ମଧ୍ୟ ଯୋଗାଇ ଦେଇଛନ୍ତି। ଓଡ଼ିଶା ସରକାର ଏ ଦିଗରେ ଉଦାସୀନ ରହିବାକୁ ଆଉ ବରଦାସ୍ତ କରାଯିବ ନାହିଁ ବୋଲି ଦୋରା ସଂଘ କହିଛି।
