ନୟାଗଡ଼ ଅଫିସ,୨।୭-ନୟାଗଡ଼ ମ୍ୟୁନିସିପାଲିଟି ଓ ଟାଉନ ପୋଲିସ ପକ୍ଷରୁ ନୟାଗଡ଼ ସହରର ବିଭିନ୍ନ ଉଠାଦୋକାନ ଉପରେ ସୋମବାର ଚଢ଼ାଉ କରାଯାଉଛି। କ୍ୟାବିନ୍ କରି ପାନ ଦୋକାନ କରିଥିବା ବେଳେ ଭିତରେ କୋରେକ୍ସ ବିକ୍ରି କରୁଥିବା ଅଭିଯୋଗରେ ଜଣେ ଦୋକାନୀଙ୍କୁ ଗିରଫ କରାଯାଇଛି। ସେ ହେଲେ ସେକ୍ ସକୁରୁ। ସେକ୍ ସକୁରୁ ଜିଲା ମୁଖ୍ୟ ଚିକିତ୍ସାଳୟ ଫାଟକ ନିକଟରେ ଏକ ପାନ ଦୋକାନ କରି କୋରେକ୍ସ ବିକ୍ରି କରୁଥିଲେ। ସୋମବାର ଚଢ଼ାଉରେ ତାଙ୍କ ଦୋକାନରୁ ୪୮ଟି କୋରେକ୍ସ ବୋତଲ ଜବତ ହୋଇଥିଲା। ତାଙ୍କୁ ଗିରଫ କରି କୋର୍ଟଚାଲାଣ କରାଯାଇଥିବା ଟାଉନ ଥାନା ଅଧିକାରୀ ଜୟଦୀପ ମହାନ୍ତି ପ୍ରକାଶ କରିଛନ୍ତି। ସେହିଭଳି ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ ଫାଟକ ନିକଟରେ ଥିବା ସମସ୍ତ କ୍ୟାବିନ୍କୁ ସୋମବାର ବନ୍ଦ କରାଯାଇଛି। ରାଜପଥ କଡ଼ରେ ଦୋକାନୀମାନେ କ୍ୟାବିନ୍ କରି ଜିନିଷ ବିକ୍ରି କରୁଥିବାରୁ ବିଭିନ୍ନ ସମୟରେ ଟ୍ରାଫିକ୍ ସମସ୍ୟା ଦେଖାଦେଉଛି। ଏହି ସମସ୍ୟାର ସମାଧାନ କରିବା ପାଇଁ ସହରରେ ଥିବା ବିଭିନ୍ନ ରାଜପଥ କଡ଼ରୁ ଉଠା ଦୋକାନୀଙ୍କୁ ହଟାଯାଇଛି। ଓଡ଼ଗାଁ ଛକରେ ଥିବା କ୍ୟାବିନ୍, ମେଡ଼ିକାଲ ନିକଟରେ ଥିବା କ୍ୟାବିନ୍, ଖଣ୍ଡପଡ଼ା ରୋଡ଼ରେ ଥିବା ଉଠାଦୋକାନକୁ ହଟା ଯାଇଛି। ମଙ୍ଗଳବାର ସହରର ଅନ୍ୟ ସ୍ଥାନରେ ରାଜପଥ କଡ଼ରେ ଥିବା ଉଠାଦୋକାନକୁ ସିଲ୍ କରାଯିବ । ମାସେ ଧରି ଏହିଭଳି ଚଢ଼ାଉ ଚାଲିବ ବୋଲି ସୂଚନା ମିଳିଛି। ନୟାଗଡ଼ ମ୍ୟୁନିସିପାଲିଟିର ସାନିଟାରୀ ଇନ୍ସପେକ୍ଟର ଲକ୍ଷ୍ମୀଧର ସାହୁ, ୱାରେଣ୍ଟ ଅଫିସର ନାରାୟଣ ନାୟକ, ଟାଉନ ପୋଲିସ ଏଏସ୍ଆଇ ଅଶୋକ ମହାନ୍ତି ପ୍ରମୁଖ ଚଢ଼ାଉରେ ସାମିଲ ଥିଲେ।
