ପୁରୁଷୋତ୍ତମପୁର,୧୧ା୫(ଡି.ଏନ୍.ଏ.): କରୋନା ପ୍ରକୋପରୁ ସମସ୍ତେ ହାହାକାର ହୋଇ ପଡ଼ିଥିବା ବେଳେ ଶ୍ରମିକମାନେ ନାହିଁ ନ ଥିବା ଦୁର୍ଦ୍ଦଶାର ସମ୍ମୁଖୀନ ହେବାରେ ଲାଗିଛନ୍ତି। ନିଜ ଭିଟାମାଟିକୁ ଫେରିବା ଲାଗି ଆକୁଳ ନିବେଦନ କରୁଥିଲେ ମଧ୍ୟ ଗୁହାରି ଶୁଣିବାକୁ କେହିନାହିଁ। ଅନୁଗୋଳ ଜିଲା ବୁଆଁକୁଟୁ ଗ୍ରାମର ୧୦ ଜଣ ଓ ବୌଦ୍ଧ ଜିଲା ଭାପୁର ଗ୍ରାମର ୬ଜଣ ଯୁବକ ଆନ୍ଧ୍ରପ୍ରଦେଶ ପଲାସାଠାରେ ବିଭିନ୍ନ ଢାବା ହୋଟେଲରେ କାର୍ଯ୍ୟ କରୁଥିବା ବେଳେ ବର୍ତ୍ତମାନ ପରିସ୍ଥିତିରେ ଭୋକ ଉପାସରେ ଅସହ୍ୟ ହୋଇ ନିଜ ନିଜର ଗ୍ରାମକୁ ଫେରିଯିବାକୁ ଚାଲି ଚାଲି ଆସିଛନ୍ତି। ମାତ୍ର ସେମାନେ ନିଜ ଅଞ୍ଚଳର ରାସ୍ତା ଜାଣି ନ ପାରି ବାଟବଣା ହୋଇ ସୋମବାର ସକାଳେ ଗଞ୍ଜାମ ଜିଲା ପୁରୁଷୋତ୍ତମପୁର ସହର ଦେଇ ଯାଉଥିବା ବେଳେ ଲୋକେ ଅଟକାଇ ଥିଲେ। ଏ ସମ୍ପର୍କରେ ଖବର ପାଇ ପୁରୁଷୋତ୍ତମପୁର ଥାନା ଆଇଆଇସି ଜଗନ୍ନାଥ ମଲ୍ଲିକ ଓ ଏସ୍ଆଇ ସୁନିଲ କୁମାର ପ୍ରଧାନ ଘଟଣାସ୍ଥଳକୁ ଆସି ପଚାରି ବୁଝିବା ସହ ସମସ୍ତେ ଭୋକିଲା ଥିବା ହେତୁ ସେମାନଙ୍କୁ କିଛି ବିସ୍କୁଟ,ଶୁଖିଲା ଖାଦ୍ୟ, ପାଣି ଦେଇଥିଲେ। ମାତ୍ର ଏମାନଙ୍କୁ ନିଜ ଅଞ୍ଚଳକୁ କିଭଳି ଛଡ଼ାଯିବ ସେଥିନେଇ ପୋଲିସ ମଧ୍ୟ ଏକ ପ୍ରକାର ଚିନ୍ତାରେ ପଡ଼ିଛି।
