କୋଲକାତା,୨୩।୧୧(ପି.ଟି.)- ଭାରତୀୟ ଚୟନ କମିଟି ଟେଷ୍ଟ ଦଳରୁ ଯୁବ ଉଇକେଟକିପର ରିଷଭ ପନ୍ତ ଓ ଶୁବମନ ଗିଲଙ୍କୁ ରିଲିଜ କରିବାକୁ ନିଷ୍ପତ୍ତି ନେଇଛି। ଆସନ୍ତା ଓ୍ବେଷ୍ଟଇଣ୍ଡିଜ ଗସ୍ତ ପୂର୍ବରୁ ସେମାନଙ୍କୁ ଘରୋଇ କ୍ରିକେଟରେ ଟାଇମ୍ ଦେବା ଲାଗି ଏହି ନିଷ୍ପତ୍ତି ହୋଇଛି। ଆନ୍ଧ୍ର ଉଇକେଟକିପର କୋନା ଶିଖର ଭରତ ଭାରତୀୟ ଦଳ ସହ ରହିବେ। ସେ ଉଇକେଟକିପର ରିଦ୍ଧିମାନ ଶାହାଙ୍କ କଭର ଭାବେ ଚଳିତ ବାଂଲାଦେଶ ବିପକ୍ଷ ପିଙ୍କ ବଲ୍ ଟେଷ୍ଟର ଅବଶିଷ୍ଟାଂଶ ମ୍ୟାଚରେ ଖେଳିବେ। ପନ୍ତ ଓ୍ବେଷ୍ଟଇଣ୍ଡିଜ ବିପକ୍ଷ ସମସ୍ତ ମ୍ୟାଚ୍ (୩ ଟି୨୦ ଓ ୩ ଦିନିକିଆ)ରେ ଖେଳିବେ। ଏଥିନେଇ ତାଙ୍କୁ ସୟଦ ମୁସ୍ତାକ ଅଲୀ ଟି୨୦ ଟୁର୍ନାମେଣ୍ଟ ଖେଳିବା ଦରକାର ଥିବା ସିଲେକ୍ଟର୍ସ ଅନୁଭବ କରି ଏଭଳି ନିଷ୍ପତ୍ତି ନେଇଥିବା ବିସିସିଆଇ ସୂତ୍ରରୁ ଜଣାପଡ଼ିଛି। ରିଷଭ ଦିଲ୍ଲୀର ପରବର୍ତ୍ତୀ ଦୁଇ ସୁପର ଲିଗ୍ ମ୍ୟାଚ୍ ହରିୟାଣା (୨୪ ତାରିଖରେ) ଓ ରାଜସ୍ଥାନ (୨୭ରେ) ବିପକ୍ଷରେ ଖେଳିବେ। ଅନ୍ୟପକ୍ଷରେ ଶୁବମନ ପଞ୍ଜାବ ପକ୍ଷରୁ କର୍ନାଟକ ଓ ତାମିଲନାଡୁ ବିପକ୍ଷ ମୁକାବିଲାରେ ଅଂଶଗ୍ରହଣ କରିବେ। ଭାରତ ଏ’ ଦଳରେ ନିୟମିତ ପ୍ରଦର୍ଶନ କରୁଥିବା ଭରତଙ୍କୁ ସାନ୍ତ୍ୱନାମୂଳକ ସୁଯୋଗ ମିଳିଛି। ସେ ୬୯ ପ୍ରଥମ ଶ୍ରେଣୀ ମ୍ୟାଚ୍ ଖେଳି ୮ ଶତକ ଓ ୨୦ ଅର୍ଦ୍ଧଶତକ ସହ ୩,୯୦୯ ରନ୍ କରିଛନ୍ତି। ମୋତେ ସକାଳେ ଦଳରେ ଯୋଗଦେବାକୁ କୁହାଯାଇଥିଲା। ଆଇକନ ବ୍ୟାଟ୍ସମ୍ୟାନ ବିରାଟ କୋହଲିଙ୍କ ସହ ଡ୍ରେସିଂ ରୁମ୍ ଶେୟାର କରିବାକୁ ମୁଁ ଉତ୍ସାହିତ ଅଛି ବୋଲି ଭରତ କହିଛନ୍ତି। ୨୦୧୭ରେ ଲାଗୁ ହୋଇଥିବା ଆଇସିସି ନିୟମ ଅନୁଯାୟୀ, ପ୍ରଥମ ଉଇକେଟକିପର ଫିଲ୍ଡରେ ଆହତ ହେଲେ ତାଙ୍କ ବଦଳରେ ସବ୍ଷ୍ଟିଚ୍ୟୁଟ୍ ଉଇକେଟକିପର ଖେଳିପାରିବେ। ରିଦ୍ଧିମାନ ଏବେ ସମ୍ପୂର୍ଣ୍ଣ ଭାବେ ଭଲ ପ୍ରଦର୍ଶନ କରୁଥିଲେ ମଧ୍ୟ ତାଙ୍କ ଆହତ ସମସ୍ୟା ବୃଦ୍ଧି ପାଇବାର ସମ୍ଭାବନା ଥିବାରୁ ଭରତଙ୍କୁ ଡାକରା ଦିଆଯାଇଛି।
