ବଡ଼ସାହି,୧୨ା୮(ସ୍ବ.ପ୍ର)-ମୟୂରଭଞ୍ଜ ଜିଲା ବଡ଼ସାହି ବ୍ଲକ ଅଧୀନ ମାଣତ୍ରୀସ୍ଥିତ ବୈଦନାଥ ନୋଡ଼ାଲ ହାଇସ୍କୁଲରେ ଶିକ୍ଷକ ଓ କର୍ମଚାରୀ ପଦବୀ ଖାଲି ଥିବାରୁ ଶିକ୍ଷାଦାନରେ ବାଧା ସୃଷ୍ଟି ହେଉଛି। ଏହି ସମସ୍ୟା ସମାଧାନ ପାଇଁ ପରିଚାଳନା କମିଟିର ଏକ ପ୍ରତିନିଧି ଦଳ ସପ୍ତାହକ ପୂର୍ବେ ଜିଲା ଶିକ୍ଷାଧିକାରୀଙ୍କୁ ଭେଟି ଲିଖିତ ଭାବେ ଜଣାଇଥିବା ବେଳେ ଜିଲାପାଳଙ୍କୁ ଜନଶୁଣାଣି ଶିବିରରେ ଭେଟି ସମସ୍ୟା ସମ୍ପର୍କରେ ଅବଗତ କରିଛନ୍ତି। ଅଭିଯୋଗପତ୍ରର ନକଲ ଗଣଶିକ୍ଷା ମନ୍ତ୍ରୀ, ସଚିବ, ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି, ବଡ଼ସାହି ବିଧାୟକ ସନାତନ ବିଜୁଳି ଓ ବାଲେଶ୍ୱର ସାଂସଦ ତଥା କେନ୍ଦ୍ରମନ୍ତ୍ରୀ ପ୍ରତାପ ଷଢ଼ଙ୍ଗୀଙ୍କ ଅବଗତି ନିମନ୍ତେ ମଧ୍ୟ ପ୍ରଦାନ କରିଛନ୍ତି ା
ଶିକ୍ଷାବିଭାଗର ନିଷ୍ପତ୍ତିି ଅନୁଯାୟୀ ଏହି ହାଇସ୍କୁଲ ସହିତ ପ୍ରାଥମିକ ଓ ଉଚ୍ଚପ୍ରାଥମିକ ସ୍କୁଲର ମିଶ୍ରଣ ପରେ ନୋଡ଼ାଲ ହାଇସ୍କୁଲର ମାନ୍ୟତା ମିଳିଛି ା ଏହି ବିଦ୍ୟାଳୟରେ ଚଳିତ ବର୍ଷ ୧ମରୁ ୧୦ଶ୍ରେଣୀ ପର୍ଯ୍ୟନ୍ତ ୩୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ପାଠ ପଢ଼ୁଛନ୍ତି। ୧୨ବର୍ଷ ହେଲା ସ୍କୁଲରେ ପ୍ରଧାନ ଶିକ୍ଷକ ପଦବୀ ଖାଲି ପଡିଥିବା ବେଳେ ଜଣେ ବିଜ୍ଞାନ ଶିକ୍ଷକ (ପିସିଏମ୍) ଦାୟିତ୍ୱରେ ରହିଛନ୍ତି ା ମାସର ବିଭିନ୍ନ ଦିନରେ ଅଫିସ କାର୍ଯ୍ୟ ପାଇଁ ସେ ବ୍ୟସ୍ତ ରହୁଥିବାରୁ ପିଲାଙ୍କୁ ଠିକ୍ ଭାବେ ପାଠ ପଢ଼ାଇପାରୁ ନାହାନ୍ତି। ସେହିପରି ୭ବର୍ଷ ହେଲା ଜଣେ କଳା ଟିଜିଟି ଶିକ୍ଷକ ପଦବୀ ଖାଲି ଥିବାରୁ ସ୍କୁଲର ଖେଳ ଶିକ୍ଷୟିତ୍ରୀ ସାମାଜିକ ବିଜ୍ଞାନର ଉଭୟ ଇତିହାସ ଓ ଭୂଗୋଳ ବିଷୟ ପଢ଼ାଉଛନ୍ତି। ଭାଷା ସାହିତ୍ୟ ବିଷୟ ସ୍କୁଲର ସଂସ୍କୃତ ଓ ହିନ୍ଦୀ ଶିକ୍ଷକ ପାଳି କରି ପଢ଼ାଉଛନ୍ତି । ଅନ୍ୟପକ୍ଷେ ହିନ୍ଦୀ ଶିକ୍ଷକଙ୍କୁ ସପ୍ତାହରେ ୩ଦିନ ପାଇଁ ନିକଟସ୍ଥ ବି.ସି ହାଇସ୍କୁଲକୁ ଡ଼େପୁଟେସନ ଦାୟିତ୍ୱ ମିଳିଥିବାରୁ ଛୁଟି ଦିନକୁ ବାଦ୍ ଦେଲେ ବାକି ଦିନମାନଙ୍କରେ ନିଜ ବିଷୟ ପଢ଼ାଇ ଅତିରିକ୍ତ କ୍ଲାସ ନେବା ତାଙ୍କ ପକ୍ଷରେ ଅସମ୍ଭବ ହେଉଛି ା ସେହିପରି ସ୍କୁଲରେ ୨ଟି ପିଅନ ପଦବୀ ଖାଲି ଥିବା ବେଳେ ସ୍ବାସ୍ଥ୍ୟଗତ କାରଣରୁ କିରାଣୀ ଜଣଙ୍କ ଛୁଟିରେ ରହିଛନ୍ତି ା ସ୍କୁଲ କମ୍ପ୍ୟୁଟର ସଂଯୋଜିକାଙ୍କର ଚାକିରି ଅବଧି ପୂରଣ ପରେ ଛଟେଇ ହେବାରୁ କମ୍ପ୍ୟୁଟର ପାଢ଼ପଢ଼ା ଓ ସ୍କୁଲର ଇ-କାର୍ଯ୍ୟକ୍ରମ ବ୍ୟାହତ ହୋଇପଡ଼ିଛି। ଯାହା ଫଳରେ ଏମାନଙ୍କ ଦ୍ୱାରା ସମ୍ପାଦିତ କାର୍ଯ୍ୟ ସ୍କୁଲର ଶିକ୍ଷୟିତ୍ରୀଶିକ୍ଷକଙ୍କୁ ଅତିରିକ୍ତ ଦାୟିତ୍ୱ ନେବାକୁ ପଡୁଛି। ଏଥିନେଇ ପିଲାମାନଙ୍କ ଶିକ୍ଷାଦାନ ବାଧାପ୍ରାପ୍ତ ହେଉଛି। ଏ ସମ୍ପର୍କରେ ସ୍କୁଲ ପରିଚାଳନା କମିଟିର ସଭାପତି ରଣଜିତ କୁମାର ପଣ୍ଡା କୁହନ୍ତି, ବଡ଼ସାହି ବ୍ଲକ ଅଞ୍ଚଳରେ ଶିକ୍ଷା ବ୍ୟବସ୍ଥା ଭୁଶୁୁଡି ପଡିଥିବା ବେଳେ ଅଭିଭାବକ ସରକାରୀ ସ୍କୁଲରେ ପିଲାମାନଙ୍କୁ ପାଠପଢାଇବାକୁ ଆଉ ଉଚିତ ମଣୁନାହାନ୍ତି ା ଆମ ସ୍କୁଲର ଅଭିଭାବକ ଓ ପରିଚାଳନା କମିଟିର ମିଳିତ ବୈଠକରେ ସମସ୍ୟା ସମ୍ପର୍କିତ ଅଭିଯୋଗପତ୍ର ପ୍ରଦାନ ପାଇଁ ସର୍ବ ସମ୍ମତି ନିଷ୍ପତ୍ତି ହୋଇଥିଲା। ସେଥିପାଇଁ ଉପରୋକ୍ତ ପଦକ୍ଷେପ ଗ୍ରହଣ କରିଛୁ ା ଯଥାଶୀଘ୍ର ଖାଲି ପଡ଼ିଥିତ୍ବା ପଦବୀ ପୂରଣ ପାଇଁ କର୍ତ୍ତୃୃର୍ପକ୍ଷ ଦୃଷ୍ଟି ଦେବାକୁ ସେ ଦାବି କରିଛନ୍ତି। ସେହିପରି ଅଭିଭାବକ ଅଶ୍ୱିନୀ ସିଂ କୁହନ୍ତି, ଶିକ୍ଷକ ଅଭାବ ପାଇଁ ପିଲାଙ୍କୁ ଉଚିତ ଶିକ୍ଷା ଦିଆଯାଇ ପାରୁନାହିଁ ା ସରକାର ଶିକ୍ଷାର ବିକାଶ ପାଇଁ ପର୍ଯ୍ୟାପ୍ତ ଯୋଜନା କାର୍ଯ୍ୟକାରୀ କରୁଥିଲେ ମଧ୍ୟ ବାସ୍ତବତା ଆମ ସ୍କୁଲକୁ ଆସି ଦେଖିଯାଆନ୍ତୁ ବୋଲି କହିଛନ୍ତି। ନୋଡାଲ ସ୍କୁଲ ଘୋଷଣା ସତ୍ତ୍ୱେ ଆବଶ୍ୟକ ଶିକ୍ଷକ ଓ କର୍ମଚାରୀ ପଦବୀ ପୂରଣ ହୋଇ ନ ଥିବାରୁ ସ୍କୁଲରେ ଅବ୍ୟବସ୍ଥା ଲାଗି ରହିଛି। ଏହାର ସମାଧାନ କରାନଗଲେ ଅଭିଭାବକଗଣ ଆନ୍ଦୋଳନାମତ୍କ ପନ୍ଥା ଅବଲମ୍ବନ କରିବାକୁ ବାଧ୍ୟ ହେବେ ବୋଲି ସେ କହିଛନ୍ତି। ବ୍ଲକ ଶିକ୍ଷାଧିକାରୀ ଦେବବ୍ରତ ବାରିକଙ୍କୁ ସ୍କୁଲ ସମସ୍ୟା ନେଇ ପଚାରିବାରୁ ଅଭିଯୋଗ ପାଇବା ପରେ ସେ ଜିଲା ଶିକ୍ଷାଧିକାରୀଙ୍କୁ ଅବଗତ କରିଛନ୍ତି ଓ ସମସ୍ୟା ସମାଧାନ ପାଇଁ ଉଦ୍ୟମ ଅବ୍ୟାହତ ରହିଛି ବୋଲି କହିଛନ୍ତି।
