ମାନାଗୁଆ (ନିକାରାଗୁଆ), ୨୭ା୪ (ଏପି)- କରୋନାଭାଇରସ୍ ମହାମାରୀ ଯୋଗୁ ସମଗ୍ର ବିଶ୍ୱରେ କ୍ରୀଡ଼ା କାର୍ଯ୍ୟକଳାପ ସ୍ଥାଣୁ ପାଲଟିଯାଇଥିବାବେଳେ ନିକାରାଗୁଆରେ ବକ୍ସିଂ ଆରମ୍ଭ ହୋଇଛି। ୮ଟି ଫାଇଟ୍ ଇତିମଧ୍ୟରେ ଅନୁଷ୍ଠିତ ହୋଇଯାଇଛି। ଦର୍ଶକଙ୍କ ଉପସ୍ଥାନ ଯଦିଓ କମ୍ ରହିଥିଲା ଟେଲିଭିଜନରେ ଲଢେଇଗୁଡ଼ିକର ସିଧାପ୍ରସାରଣ କରାଯାଇଥିଲା। ପୂର୍ବତନ ଦୁଇଥର ବିଶ୍ୱ ଚାମ୍ପିୟନ ତଥା ପ୍ରମୋଟର ରୋସେଣ୍ଡୋ ଅଲଭାରେଜ ଭାଇରସ୍ ଆଶଙ୍କାକୁ ଖଣ୍ଡନ କରିଛନ୍ତି। ସେ କହିଛନ୍ତି, ଏଠାରେ ଆମର କରୋନା ଭାଇରସ୍ର କୌଣସି ଭୟ ନାହିଁ। ଦେଶରେ କ୍ୱାରାଣ୍ଟାଇନ୍ ବ୍ୟବସ୍ଥା ନାହିଁ। ସ୍ବାସ୍ଥ୍ୟ ମନ୍ତ୍ରଣାଳୟର ରିପୋର୍ଟ ଅନୁସାରେ କୋଭିଡ୍-୧୯ରେ ଯେଉଁ ୩ ଜଣଙ୍କର ମୃତ୍ୟୁ ଘଟିଛି ସେମାନେ ଦେଶ ବାହାରର। ଦେଶ ଭିତରେ କେହି ଏହି ଭାଇରସ ଦ୍ୱାରା ସଂକ୍ରମିତ ହୋଇ ନ ଥିବା ‘ଏଲ୍ ବଫାଲୋ’ ଭାବେ ପରିଚିତ ଅଲଭାରେଜ ଦୃଢତାର ସହିତ କହିଛନ୍ତି। ୮,୦୦୦ ଆସନ କ୍ଷମତା ବିଶିଷ୍ଟ ଆଲେକ୍ସିସ୍ ଆର୍ଗୋଏଲୋ ଜିମ୍ରେ ଦର୍ଶକଙ୍କ ଉପସ୍ଥିତି ସମ୍ପର୍କରେ କୌଣସି ସୂଚନା ଦିଆଯାଇ ନାହିଁ। ଫାଇଟ୍ ଗୁଡ଼ିକର ସିଧାପ୍ରସାରଣ ନିକାରାଗୁଆ ସରକାରଙ୍କ ନିଜସ୍ବ କାନାଲ-୬ ଏବଂ ଇଏସ୍ପିଏନ୍ ଲାଟିନ୍ ଆମେରିକା ଚ୍ୟାନେଲରେ ପ୍ରସାରଣ କରାଯାଇଥିଲା। ନିକାରାଗୁଆ ହେଉଛି ଏକ ଗରିବ ରାଷ୍ଟ୍ର। ବକ୍ସରମାନଙ୍କୁ ଆୟ ଦରକାର। ସେମାନେ ଘରେ ଚୁପ୍ ହୋଇ ବସିପାରିବେ ନାହିଁ ବୋଲି ସେ କହିଛନ୍ତି। ନିକାରାଗୁଆରେ ବେସ୍ବଲ ଓ ଫୁଟ୍ବଲ ଲିଗ୍ ଏବେ ମଧ୍ୟ ଜାରି ରହିଛି। ସ୍ଥାନୀୟ ଖବରକାଗଜଗୁଡ଼ିକର କ୍ରୀଡ଼ା ପୃଷ୍ଠାରେ ଏକ ଟ୍ରାଇଥଲନ ଏବଂ ସ୍କୁଲ ରେସ୍ଲିଂ ଟୁର୍ନାମେଣ୍ଟକୁ ନେଇ ଖବରମାନ ପ୍ରକାଶ ପାଇଛି। ୧୫ ଦିନ ଛୁଟି ପରେ ରାଷ୍ଟ୍ରପତି ଡାନିଏଲ୍ ଓର୍ଟେଗା ୧୭୦,୦୦୦ ସରକାରୀ କର୍ମଚାରୀଙ୍କୁ କାର୍ଯ୍ୟରେ ଯୋଗଦେବା ଲାଗି ନିର୍ଦ୍ଦେଶ ଦେଇଛନ୍ତି। ଏହାଛଡ଼ା ୧.୮ ନିୟୁତ ଛାତ୍ରଙ୍କୁ ସ୍କୁଲରେ ଯୋଗଦେବାଲାଗି କହିଛନ୍ତି।
