ନୟାଗଡ଼ ଅଫିସ,୨୬ା୧୦: ନୟାଗଡ଼ ଜିଲା ଦଶପଲ୍ଲା ବ୍ଲକ ନଛିପୁର ଗ୍ରାମର ଚନ୍ଦ୍ରକାନ୍ତ ଗୋଛାୟତଙ୍କ ଝିଅ ରିଙ୍କି ଗୋଛାୟତ (୬)ଙ୍କ ଆଖି ନଷ୍ଟ ହେବା ଘଟଣାରେ ଶୁକ୍ରବାର ଗ୍ରାମବାସୀ ଜିଲାପାଳ ଓ ସିଡିଏମ୍ଓଙ୍କୁ ଭେଟିଛନ୍ତି। ଏହାସହ ସେମାନେ ଦୋଷୀ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ଏକକୋଟି ଟଙ୍କା କ୍ଷତିପୂରଣ ଦାବି କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ଗତ ୨୯ ତାରିଖରେ ରିଙ୍କିଙ୍କ ଆଖିରେ ଏକ ହେୟାର କ୍ଲିପ ବାଜିଯିବାରୁ ସେମାନେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ସେଠାରେ ଡାକ୍ତର ରିଙ୍କିଙ୍କୁ ଦେଖିବା ସହିତ ଆଖି ଗୁରୁତର ହୋଇଯାଇଥିବାରୁ ଭଲ ଚିକିତ୍ସାଳୟରେ ଦେଖାଇବାକୁ କହିଥିଲେ। ପରେ ଡାକ୍ତର ଲେଖିଥିବା ଔଷଧ ନିରାମୟ କେନ୍ଦ୍ରରୁ ଧରି ଫେରିଥିଲେ। ଆଖି ଡ୍ରପ ପକାଇଥିଲେ ମଧ୍ୟ ଭଲ ନ ହେବାରୁ ପରିବାର ଲୋକେ ତାଙ୍କୁ ୩୦ ତାରିଖରେ ଭୁବନେଶ୍ୱରସ୍ଥିତ ଏଲ୍ଭି ପ୍ରସାଦ ଚକ୍ଷୁ ଚିକିତ୍ସାଳୟକୁ ଆଣିଥିଲେ। ଡାକ୍ତର ସେଠାରେ ଆଖିରେ ପକାଇଥିବା ଔଷଧ ଦେଖାଇବାକୁ କହିଥିଲେ। ସେମାନେ ଦେଖାଇବାରୁ ଏହା ଆଖି ନୁହେଁ କାନ ଔଷଧ ବୋଲି କହିଥିଲେ। ଏହାକୁ ପକାଇବା ଦ୍ୱାରା ଆଖି ନଷ୍ଟ ହୋଇଯାଇଛି ବୋଲି ସେଠାକାର ଡାକ୍ତର କହିଥିବା ଚନ୍ଦ୍ରକାନ୍ତ ଅଭିଯୋଗ କରିଛନ୍ତି। ବର୍ତ୍ତମାନ ରିଙ୍କି ସେଠାରେ ଚିକିତ୍ସିତ ହେଉଛନ୍ତି। ଏ ନେଇ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଶ୍ୱେତ ମହାପାତ୍ରଙ୍କୁ ପଚାରିବାରୁ ସେ କହିଥିଲେ, ଏଥିରେ ଡାକ୍ତରଙ୍କ କୌଣସି ଭୁଲ୍ ନାହିଁ। ପରିବାର ଲୋକ ଆଖିରେ ପକାଇଥିବା କାନ ଔଷଧ ନିରାମୟ କେନ୍ଦ୍ରରେ ୫ମାସ ହେଲା ମହଜୁଦ୍ ନାହିଁ। ଉକ୍ତ ଔଷଧ ସେମାନେ ଅନ୍ୟ କାହାଠାରୁ ଆଣି ପକାଇ ଥାଇପାରନ୍ତି। ଝିଅଟିର ମାଗଣା ଚିକିତ୍ସା କରାଯିବା ପାଇଁ ସେ ଏଲ୍ଭି ପ୍ରସାଦ ଚିକିତ୍ସାଳୟକୁ ଚିଠି ଲେଖିବେ। ସେହିଭଳି ଜିଲାପାଳଙ୍କ ସହିତ ଆଲୋଚନା କରି ସମସ୍ତ ପ୍ରକାର ସହଯୋଗ ରିଙ୍କିଙ୍କୁ ଯୋଗାଇ ଦିଆଯିବ ବୋଲି ସେ ସୂଚନା ଦେଇଥିଲେ।
