ନୂଆଦିଲ୍ଲୀ/ଚଣ୍ଡିଗଡ଼,୫।୧(ପି.ଟି.):ପାକିସ୍ତାନର ନାନ୍କାନା ସାହିବସ୍ଥିତ ଗୁରୁଦ୍ୱାର ଉପରେ ଉତ୍ତ୍ୟକ୍ତ ଲୋକଙ୍କ ଆକ୍ରମଣ ଘଟଣାକୁ ବିରୋଧ କରି ଦିଲ୍ଲୀ ସମେତ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଇଛି। ଭାଜପା ସଦସ୍ୟମାନେ ପାକିସ୍ତାନ ବିରୋଧରେ ସ୍ଲୋଗାନ ଦେଇ ଶୋଭାଯାତ୍ରାରେ ପାକ୍ ଦୂତାବାସ ଅଭିମୁଖେ ଯାଉଥିବାବେଳେ ସେମାନଙ୍କୁ ଚାଣକ୍ୟପୁରୀ ଥାନା ନିକଟରେ ଅଟକାଯାଇଥିଲା। ଶିଖ୍ ଗୁରୁ ନାନକଦେବଙ୍କ ଜନ୍ମସ୍ଥାନ ନାନକାନା ସାହିବରେ ସଂଖ୍ୟାଲଘୁ ଶିଖ୍ମାନେ ହିଂସାର ଶିକାର ହେଉଛନ୍ତି ବୋଲି ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଆକ୍ରମଣ ଘଟଣାକୁ ଶିଖ୍ ସମ୍ପ୍ରଦାୟ ନିନ୍ଦା କରିଛି। ଆକ୍ରମଣକାରୀଙ୍କ ବିରୋଧରେ ପାକିସ୍ତାନ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶନିବାର ଶିରୋମଣି ଗୁରୁଦ୍ୱାର ପ୍ରବନ୍ଧକ କମିଟି (ଏସ୍ଜିପିସି) ମୁଖ୍ୟ ଗୋବିନ୍ଦ ସିଂ ଲଙ୍ଗୋଓ୍ବାଲ ଆହ୍ବାନ ଦେଇଛନ୍ତି। ଏଥିସହିତ ଶିଖ୍ମାନଙ୍କୁ ନିରାପତ୍ତା ସୁନିଶ୍ଚିତ କରିବାକୁ ସେ ଅନୁରୋଧ କରିଛନ୍ତି। ପରିସ୍ଥିତି ଅନୁଧ୍ୟାନ ଲାଗି ଏସ୍ଜିପିସି ଏକ ଚାରିଜଣିଆ ପ୍ରତିନିଧି ଦଳ ପାକିସ୍ତାନ ପଠାଇବ ବୋଲି ସେ କହିଛନ୍ତି। ଏହି ପ୍ରତିନିଧି ଦଳ ପାକ୍ ପଞ୍ଜାବ ପ୍ରଦେଶର ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କୁ ଭେଟି ପରିସ୍ଥିତି ସମ୍ପର୍କରେ ଆଲୋଚନା କରିବ। ଏହାବ୍ୟତୀତ ଏସ୍ଜିପିସି ଏହି ପ୍ରସଙ୍ଗକୁ ଜାତିସଂଘରେ ଉଠାଇବ ବୋଲି ଲଙ୍ଗୋଓ୍ବାଲ କହିଛନ୍ତି। ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂ ବାଦଲ ନାନକାନା ସାହିବ ଗୁରୁଦ୍ୱାର ଆକ୍ରମଣ ଘଟଣାର ନିନ୍ଦା କରିଛନ୍ତି। ଗୁରୁଦ୍ୱାର ଆକ୍ରମଣ ଘଟଣାରେ ଶନିବାର କଶ୍ମୀରରେ ମଧ୍ୟ ବିକ୍ଷୋଭ ପ୍ରଦର୍ଶନ କରାଯାଇଥିଲା।
ଅନ୍ୟପକ୍ଷରେ ଗୁରୁଦ୍ୱାର ଆକ୍ରମଣ ଘଟଣାକୁ ପାକିସ୍ତାନ ଖଣ୍ଡନ କରିଛି। ଶିଖ୍ ଧର୍ମର ପ୍ରତିଷ୍ଠାତା ନାନକଙ୍କ ଜନ୍ମସ୍ଥାନରେ ଥିବା ଗୁରୁଦ୍ୱାର ଅକ୍ଷତ ରହିଛି। ଆକ୍ରମଣ ଖବର ମିଥ୍ୟା ବୋଲି ଇସ୍ଲାମାବାଦ କହିଛି।
