ପୁରୀ ଅଫିସ, ୧୬।୭: ରଥଯାତ୍ରାକୁ ଶୃଙ୍ଖଳିତ କରିବା ପାଇଁ ଶ୍ରୀମନ୍ଦିର ପ୍ରଶାସନ ଭକ୍ତଙ୍କ ଲାଗି କେତେକ କଟକଣା ଜାରି କରିଥିଲା। ହେଲେ ଏହାକୁ ଅନେକେ ମାନି ନ ଥିଲେ। ସୋମବାର ନୀଳାଦ୍ରିବିଜେ ପହଣ୍ଡି ସମୟରେ ସବୁ କଟକଣାକୁ ଉଲ୍ଲଂଘନ କରି ଜଣେ ଅଣସେବକ ମହାପ୍ରଭୁ ଶ୍ରୀଜଗନ୍ନାଥଙ୍କ ରଥ ଉପରକୁ ଚଢିଥିଲେ। ଚାରମାଳ ଉପରେ ଥିବା ବେଳେ ତାଙ୍କୁ ଦଇତାପତି ସେବକମାନେ ଚିହ୍ନି ତଳକୁ ଓହ୍ଲାଇ ଦେଇଥିଲେ । ସଙ୍ଗେ ସଙ୍ଗେ ତାଙ୍କୁ ସିଂହଦ୍ୱାର ଥାନା ପୋଲିସ ଜିମା ଦିଆଯାଇଥିଲା। ସେବାୟତ ବେଶ ଧାରଣ କରି ସେ ରଥ ଉପରକୁ ଉଠିଥିଲେ। ଏ ସମ୍ପର୍କରେ ସିଂହଦ୍ୱାର ପୋଲିସ କୌଣସି ସ୍ପଷ୍ଟ ସୂଚନା ଦେଇ ନାହିଁ। ତେବେ ସମ୍ପୃକ୍ତ ଯୁବକ ଜଣକ କଲିକତାର ପାର୍ଥପ୍ରତିମ ଶାହା ବୋଲି ଜଣାପଡ଼ିଛି। ସେହିପରି ପହଣ୍ଡି ସମୟରେ ଶ୍ରୀସୁଦର୍ଶନଙ୍କୁ ଏକାଧିକ ଭକ୍ତ ସ୍ପର୍ଶ କରିବାକୁ ଉଦ୍ୟମ କରିଥିଲେ। ସିଂହଦ୍ୱାର ପାଖରେ ସୁରକ୍ଷା ଦାୟିତ୍ୱରେ ଥିବା ଜଣେ ପୋଲିସ କର୍ମଚାରୀ ବି ଠାକୁରଙ୍କୁ ଛୁଇଁବାକୁ ଚେଷ୍ଟା କରିଥିଲେ। ଅପରାହ୍ନ ୪ଟାରେ ଆରମ୍ଭ ହୋଇଥିଲା ନୀଳାଦ୍ରିବିଜେ ପହଣ୍ଡି। ପ୍ରଥମେ ଗୋଟି ପହଣ୍ଡିରେ ଆସିଥିଲେ ଚକ୍ରରାଜ ଶ୍ରୀସୁଦର୍ଶନ। ଅରୁଣ ସ୍ତମ୍ଭ ପାଖାପାଖି ଗହଳି ଭିତରେ ୨ଜଣ ଭକ୍ତ ଶ୍ରୀସୁଦର୍ଶନଙ୍କୁ ଛୁଇଁବାକୁ ହାତ ବଢାଇଥିଲେ। କେତେଜଣ ସେବାୟତ ଏହା ଦେଖିଦେବାରୁ ଭିଡ଼ର ସୁଯୋଗ ନେଇ ସେମାନେ କେଉଁଆଡ଼େ ପଳାଇଥିଲେ ବୋଲି କୁହାଯାଉଛି।
