ଭୁବନେଶ୍ୱର,୩।୭(ବ୍ୟୁରୋ): ବିଭିନ୍ନ ଦାବି ନେଇ ଗତ ୬ ଦିନ ଧରି ‘ଓଲା’ ଚାଳକମାନେ ଧାରଣାରେ ବସିଛନ୍ତି। ହେଲେ ଜଣେ ଚାଳକ ଏହାକୁ ସମର୍ଥନ ନ କରି ରୋଜଗାର କରିବା ଆଶାରେ ଗାଡ଼ି ଚଳାଇବା ତାଙ୍କୁ ମହଙ୍ଗା ପଡ଼ିଛି। ବୁଧବାର ଏପରି ଏକ ଘଟଣା ଦେଖିବାକୁ ମିଳିଛି ଶହୀଦନଗର ଓଲା କାର୍ଯ୍ୟାଳୟ ସମ୍ମୁଖରେ। ଧାରଣାରେ ବସିଥିବା କିଛି କର୍ମଚାରୀ ଜଣେ ‘ଓଲା’ ଚାଳକଙ୍କୁ ଗାଳିଗୁଲଜ କରିବା ସହ ମାଡ଼ ମାରି ଗାଡ଼ି ଭଙ୍ଗାରୁଜା କରିଥିବା ଜଣାପଡ଼ିଛି। ଏପରିକି ଉକ୍ତ ସମୟରେ ଗାଡ଼ିରେ ଦୁଇଜଣ ମହିଳା ଯାତ୍ରୀ ଥିଲେ ହେଁ ଆକ୍ରମଣକାରୀମାନେ ତାକୁ ଖାତିର କରି ନ ଥିଲେ। ଚାଳକ ଜଣଙ୍କ ହେଲେ କଟକ ବିଡାନାସୀ ଅଞ୍ଚଳର ଅଜୟ କୁମାର ସାସମଲ। ଅଜୟ ଯାତ୍ରୀ ନେଇ ଶହୀଦନଗରରୁ କଟକ ଯାଉଥିବା ବେଳେ ଉକ୍ତ ସ୍ଥାନରେ ତାଙ୍କୁ ଆକ୍ରମଣ କରାଯାଇଛି। ଖବର ପାଇ ଘଟଣାସ୍ଥଳରେ ଶହୀଦନଗର ଥାନାଧିକାରୀ ପହଞ୍ଚି ଚାଳକଙ୍କୁ ଉଦ୍ଧାର କରିବା ସହ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛନ୍ତି। ତେବେ ମହିଳାଯାତ୍ରୀ ଥିବା ସତ୍ତ୍ୱେ ଗାଡ଼ିକୁ ଭଙ୍ଗାରୁଜା ସହ ଚାଳକଙ୍କୁ ମାଡ଼ ମାରିବା ଘଟଣାକୁ ସାଧାରଣରେ ନିନ୍ଦା କରାଯାଇଛି।
