ନୂଆଗାଁ,୧୮ା୯ (ଡି.ଏନ.ଏ.): ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ) ଚନ୍ଦ୍ରୟାନ -୨କୁ ଚନ୍ଦ୍ରପୃଷ୍ଠରେ ଅବତରଣ କରି ଚନ୍ଦ୍ରରେ ଥିବା ଅନେକ ତଥ୍ୟ ଉନ୍ମୋଚନ କରି ମହାକାଶ ଇତିହାସରେ ନୂଆ ଅଧ୍ୟାୟ ସୃଷ୍ଟି କରିବା ପାଇଁ ପ୍ରୟାସ ଜାରି ରଖିଛି। କିନ୍ତୁ ଏହାର ବହୁବର୍ଷ ପୂର୍ବରୁ ଚନ୍ଦ୍ରପୃଷ୍ଠରୁ ଆସିଥିବା ତିନିଖଣ୍ଡ ପଥର ନୟାଗଡ଼ ଜିଲା ନୂଆଗାଁ ବ୍ଲକ ଉଦୟପୁର ପଞ୍ଚାୟତର ଦାସିଆ ଅଜାଙ୍କ ସଂଗ୍ରହାଳୟରେ ଗଚ୍ଛିତ ରହିଛି। ଉକ୍ତ ପଥର ତିନିଖଣ୍ଡକୁ ୧୯୮୪ ମସିହାରୁ ଦାସିଆ ଅଜାଙ୍କ ସଂଗ୍ରହାଳୟରେ ଗବେଷକ, ପର୍ଯ୍ୟଟକ ଓ ଦର୍ଶକମାନଙ୍କ ଉଦ୍ଦେଶ୍ୟରେ ପ୍ରଦର୍ଶିତ କରାଯାଇଛି। ପଣ୍ଡିତ ନୀଳକଣ୍ଠ ଦାସଙ୍କ ପୁତ୍ର ପ୍ରଫେସର ଡା. ବିକ୍ରମ ଦାସ ଆମେରିକାରେ ରହୁଥିବା ସମୟରେ ଚନ୍ଦ୍ର ପୃଷ୍ଠର ଏହି ପଥର ଓ ୬୫ ବର୍ଷ ପୂର୍ବର ଡାଇନୋସର ହାଡ଼ ସଂଗ୍ରହ କରି ଓଡ଼ିଶାକୁ ଆଣିଥିଲେ। ସେହି ସମୟରେ ଏହି ପଥର ଓ ଉତ୍କଳମଣି ଗୋପବନ୍ଧୁଙ୍କ ବ୍ୟବହୃତ ବାକ୍ସକୁ ରାଜ୍ୟ ସଂଗ୍ରହାଳୟରେ ପ୍ରଦର୍ଶିତ କରିବା ପାଇଁ ପ୍ରଫେସର ଦାସଙ୍କୁ ସରକାର ପ୍ରସ୍ତାବ ଦେଇଥିଲେ ମଧ୍ୟ ତାହା କରାଯାଇପାରି ନ ଥିଲା। ପ୍ରଫେସର ଦାସ ଦାସିଆ ଅଜାଙ୍କ ସଂଗ୍ରହାଳୟ ଦେଖିବା ପରେ ଏହି ବିରଳ ପଦାର୍ଥଗୁଡିକୁ ପ୍ରଦର୍ଶିତ କରିବା ଉଦ୍ଦେଶ୍ୟରେ ଦାସିଆ ଅଜାଙ୍କୁ ପ୍ରଦାନ କରିଥିଲେ। ସଂଗ୍ରହାଳୟର ସମ୍ପାଦକ ତଥା ଦାସିଆ ଅଜାଙ୍କ ନାତି ଦୀପକ କୁମାର ପଟ୍ଟନାୟକ ଏହି ସୂଚନା ଦେଇଛନ୍ତି।
