ଗୋପାଳପୁର,୩୦ା୯-ଗତ କିଛିଦିନ ଧରି ଗଞ୍ଜାମ ଜିଲାରେ ହୋଇଥିବା ଲଗାଣ ବର୍ଷାରେ ଗ୍ରାମାଞ୍ଚଳର ରାସ୍ତାଘାଟ, ଚାଷଜମି ଏବେଯାଏ ଜଳମଗ୍ନ ହୋଇ ରହିଛି। ଫଳରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏବେବି କେତେକ ସ୍ଥାନରେ ବର୍ଷା ଲାଗି ରହିଛି। ରଙ୍ଗେଇଲୁଣ୍ଡା ବ୍ଲକ ମାର୍କଣ୍ଡି ପଞ୍ଚାୟତ ତୁଳୁ ଠାରୁ ମାର୍କଣ୍ଡି ସଂଯୋଗ କରୁଥିବା ରାସ୍ତା ଉପରେ ବର୍ଷାଜଳ ପ୍ରବାହିତ ହେଉଛି। ଫଳରେ ଲୋକେ ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି।
ପ୍ରକାଶ ଯେ, ତୁଳୁ-ମାର୍କଣ୍ଡି ରାସ୍ତାରେ ରହିଛି ପାଟନାଳର ଏକ ପୋଲ। ଘୋଡକା ନାଳର ପାଣି ଏହି ପାଟନାଳ ଦେଇ ସମୁଦ୍ରରେ ପଡିଥାଏ। ଜୋରରେ ବର୍ଷାହେଲେ ପାଟନାଳଦେଇ ପାଣି ନିଷ୍କାସନ ହୋଇ ନ ପାରି ରାସ୍ତା ଉପରେ ସୁଅ ଛୁଟେ। ଫଳରେ ମାର୍କଣ୍ଡି ଗ୍ରାମବାସୀଙ୍କ ଚିନ୍ତା ବଢିଯାଏ। ବିପଦସଙ୍କୁଳ ଅବସ୍ଥାରେ ଜୀବନକୁ ବାଜି ଲଗାଇ ଯାତାୟାତ କରନ୍ତି। ଅନେକ ସମୟରେ ଦୁର୍ଘଟଣା ମଧ୍ୟ ଘଟେ। ଏହାକୁ ଦୃଷ୍ଟିରେ ରଖି ୨୦୧୨ରେ ରଣ୍ଢା, ତୁଳୁ ଓ ମାର୍କଣ୍ଡି ଦେଇ ରାସ୍ତା ନିର୍ମାଣ ପାଇଁ ୯ କୋଟି ଟଙ୍କା ମଞ୍ଜୁର ହୋଇଥିଲା। ତୁଳୁ ପର୍ଯ୍ୟନ୍ତ ରାସ୍ତା ସମ୍ପୂର୍ଣ୍ଣ ହୋଇଥିବାବେଳେ ପାଟନାଳ ଉପରେ ଏକ ପୋଲ ହୋଇଛି। ମାତ୍ର ଏହାର ସଂଯୋଗୀକରଣ ରାସ୍ତା ଜମିବାବଦ ଯୋଗୁ ସମ୍ପୂର୍ଣ୍ଣ ହୋଇପାରୁନାହିଁ। ପ୍ରାୟ ୪ ବର୍ଷ ହେଲା କାମ ବନ୍ଦ ରହିଛି। ଏନେଇ ପ୍ରଶାସନ ପକ୍ଷରୁ କୌଣସି ତତ୍ପରତା ଦେଖାଯାଉନାହିଁ। ମାର୍କଣ୍ଡି ଗ୍ରାମରେ ପ୍ରାୟ ନୋଳିଆ ସମ୍ପ୍ରଦାୟର ଲୋକେ ରୁହନ୍ତି।
ଏ ସମ୍ପର୍କରେ ପୂର୍ତ୍ତ ବିଭାଗର ଉପ ନିର୍ବାହୀଯନ୍ତ୍ରୀ ରାମଚନ୍ଦ୍ର ସେଠୀଙ୍କୁ ପଚାରିବାରୁ, ଏନେଇ ଉଚ୍ଚ ପଦାଧିକାରୀଙ୍କୁ ଜଣାଇ ଦିଆଯାଇଛି। ଜମିଜମା ସମସ୍ୟା ରହିଥିବାଯୋଗୁ କାମ ସମ୍ପୂର୍ଣ୍ଣ ହୋଇପାରୁନଥିଲା। ଏବେ ଏହି ଜମି ସମସ୍ୟାର ସମାଧାନ ହୋଇଯାଇଛି। ବର୍ଷା କମିଲେ ଖୁବଶୀଘ୍ର ଉକ୍ତ କାର୍ଯ୍ୟ ଆରମ୍ଭ କରାଯିବ ବୋଲି ସେ କହିଛନ୍ତି।
