ଓ୍ବାଶିଂଟନ୍, ୨୬ା୩ (ଏପି)-ତୁର୍କୀର ଜଣେ ବକ୍ସର ସରହାତ୍ ଗୁଲର ଏବଂ ତାଙ୍କ ଟ୍ରେନର ସୈଫୁଲ୍ଲା ଡମ୍ଲୁପିନାର କରୋନା ଭାଇରସ ଦ୍ୱାରା ସଂକ୍ରମିତ ଥିବା ଜଣାପଡ଼ିଛି। ଲଣ୍ଡନରେ ଅନୁଷ୍ଠିତ ଅଲିମ୍ପିକ କ୍ୱାଲିଫିକେଶନ ପ୍ରତିଯୋଗିତାରୁ ଏହି ଦୁଇ ଜଣ ଫେରିଥିଲେ। ତୁର୍କିଶ ବକ୍ସିଂ ଫେଡେରଶନ ତରଫରୁ ଏହି ସୂଚନା ଦିଆଯାଇଛି। ଫେଡେରଶନର କହିବା ଅନୁସାରେ ପ୍ରତିଯୋଗିତା ଲାଗି ପ୍ରସ୍ତୁତ ହେବା ଲାଗି ତାଙ୍କ ବକ୍ସିଂ ଦଳ ମାର୍ଚ୍ଚ ୩ରୁ ଶିଫିଲ୍ଡରେ ଏକ ଟ୍ରେନିଂ କ୍ୟାମ୍ପରେ ଥିଲା। ସେଠାରୁ ମାର୍ଚ୍ଚ ୧୧ରେ ଲଣ୍ଡନ ଯାତ୍ରା କରିଥିଲା। ସମସ୍ତ ଟିମ୍ ଗୋଟିଏ ହୋଟେଲରେ ଅବସ୍ଥାନ କରିଥିଲେ। ସରକାରୀ ସଂଗଠନ ଏଆଇବିଏ ଏହାର ପ୍ରତିଯୋଗିତାକୁ ସସ୍ପେଣ୍ଡ କରିଥିବାରୁ ଆଇଓସି ତରଫରୁ ବକ୍ସିଂ ପ୍ରତିଯୋଗିତା ଆୟୋଜନ କରାଯାଇଥିଲା। ତୁର୍କୀଶ ଟିମ୍ ମାର୍ଚ୍ଚ ୧୫ ଓ ୧୬ରେ ପ୍ରତିଯୋଗିତାରେ ଭାଗ ନେଇଥିଲା। ଆଇଓସି ପ୍ରତିଯୋଗିତା ସ୍ଥଗିତ ରଖିବା ପରେ ମାର୍ଚ୍ଚ ୧୭ରେ ଟିମ୍ ସ୍ବଦେଶ ପ୍ରତ୍ୟାବର୍ତ୍ତନ କରିଥିଲା। ଦସଦଳର ସମସ୍ତ ସଦସ୍ୟଙ୍କୁ କ୍ୱାରାଣ୍ଟାଇନରେ ରଖାଯାଇଥିଲା। ଗୁଲର ଓ ଡମ୍ଲୁପିନାର ବର୍ତ୍ତମାନ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଅନ୍ୟ ଦୁଇ ଜଣ ବକ୍ସର ଜ୍ୱରରେ ପୀଡ଼ିତ ଥିବା ଜଣାଇବା ପରେ ତାଙ୍କଠାରୁ ସଂଗ୍ରହ କରାଯାଇଥିବା ନମୁନା ପରୀକ୍ଷା ପାଇଁ ପଠାଯାଇଛି। ଫଳାଫକଳୁ ଅପେକ୍ଷା କରାଯାଇଥିବା ଫେଡେରେଶନ କହିଛି।
