କୋଲକାତା,୬ା୬: ଉତ୍ତର କୋଲକାତାର ନିମଟାଠାରେ ତୃଣମୂଳ କଂଗ୍ରେସ (ଟିଏମ୍ସି)ର ଜଣେ ନେତାଙ୍କୁ ଗୁଳିକରି ହତ୍ୟା କରାଯାଇଛି। ଏହି ଦୃଶ୍ୟ ସିସିଟିଭିରେ କଏଦ ହୋଇଛି। ହତ୍ୟାକାଣ୍ଡ ଲାଗି ଭାଜପା ଓ ଟିଏମ୍ସି ପରସ୍ପରକୁ ଦୋଷ ଦେଇଛନ୍ତି।
ମଙ୍ଗଳବାର ରାତି ସାଢ଼େ ୭ଟା ବେଳେ ଟିଏମ୍ସି ନେତା ନିର୍ମଳ କୁଣ୍ଡୁ ଏକ ଚା’ ଦୋକାନ ନିକଟରେ ସ୍ଥାନୀୟ ଲୋକମାନଙ୍କ ସହ କଥା ହେଉଥିବାବେଳେ ଦୁଇ ଅଜଣା ଲୋକ ଏକ ବାଇକରେ ଆସି ତାଙ୍କୁ ଲକ୍ଷ୍ୟ କରି ଦୁଇ ରାଉଣ୍ଡ ଗୁଳି ଚଳାଇଥିଲେ। କୁଣ୍ଡୁଙ୍କୁ ଗୁରୁତର ଅବସ୍ଥାରେ ହସ୍ପିଟାଲ ନିଆଯାଉଥିବାବେଳେ ବାଟରେ ତାଙ୍କର ମୃତ୍ୟୁ ହୋଇଥିଲା। ଉତ୍ତର ଦମଦମ୍ ପୌରାଞ୍ଚଳର ୬ ନମ୍ବର ଓ୍ବାର୍ଡରେ ଟିଏମ୍ସିର ମୁଖ୍ୟ ଥିବା କୁଣ୍ଡୁଙ୍କୁ ଭାଜପା ହତ୍ୟା କରିଥିବା ଦଳ ପକ୍ଷରୁ ଅଭିଯୋଗ ହୋଇଛି। ଅନ୍ୟପକ୍ଷରେ ପଶ୍ଚିମବଙ୍ଗ ଭାଜପା ସଭାପତି ଦିଲୀପ ଘୋଷ ଉକ୍ତ ଅଭିଯୋଗକୁ ଖଣ୍ଡନ କରି ଟିଏମ୍ସିରେ ଗୋଷ୍ଠୀ ବିବାଦରୁ ଏଭଳି ହତ୍ୟାକାଣ୍ଡ ହୋଇଥିବା କହିଛନ୍ତି। ଜଣେ ଅଭିଯୁକ୍ତଙ୍କ ଘରକୁ ଲୋକେ ଭଙ୍ଗାରୁଜା କରିଛନ୍ତି। ପୋଲିସ କେତେକଙ୍କୁ ଅଟକ ରଖି ପଚରାଉଚରା କରୁଛି।
