ଢେଙ୍କାନାଳ ଅଫିସ, ୧୯।୫- ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ଏକଘରିଆ ଗ୍ରାମସ୍ଥିତ ଶରଣ ଶ୍ରୀକ୍ଷେତ୍ରରେ ଶନିବାର ଭକ୍ତକବି ଦୀନକୃଷ୍ଣ ଦାସଙ୍କ ଜୟନ୍ତୀ ଉତ୍ସବ ପାଳିତ ହୋଇଯାଇଛି। ଦୀନବନ୍ଧୁଙ୍କ ପ୍ରତିଟି ଲେଖାରେ ଭକ୍ତି ଏବଂ ସାହିତ୍ୟର ଅନୁପମ ସମ୍ମିଶ୍ରଣ ଦେଖିବାକୁ ମିଳେ। ସେ ଉଭୟ ଭକ୍ତି ଓ ସାହିତ୍ୟର ଭାବମୟ ସ୍ରଷ୍ଟା ବୋଲି ମତପ୍ରକାଶ ପାଇଥିଲା।
ଶରଣ ଶ୍ରୀକ୍ଷେତ୍ର ବିକାଶ ପରିଷଦ ଦ୍ୱାରା ଆୟୋଜିତ ଏହି ଉତ୍ସବରେ ଅବସରପ୍ରାପ୍ତ ଶ୍ରୀମନ୍ଦିର ପ୍ରଶାସକ ରବି ନାରାୟଣ ମିଶ୍ର, ଡ. ରାଜେନ୍ଦ୍ର ପ୍ରସାଦ ଶତପଥୀ, ଡ. ସନ୍ଧ୍ୟାରାଣୀ ଶତପଥୀ, ଇଂ. ଗଣେଶ୍ୱର ପଣ୍ଡା, ନାଟ୍ୟକାର ଦୀନେଶ ଦାସ, ବାଙ୍ଗୁରସିଂହ ସରପଞ୍ଚ ଜଗବନ୍ଧୁ ଦଳେଇ ପ୍ରମୁଖ ଅତିଥି ଭାବେ ଯୋଗଦେଇ କବିଙ୍କ ସାହିତ୍ୟକୃତି ଓ ଜୀବନୀ ଉପରେ ଆଲୋକପାତ କରିଥିଲେ। ଶରଣ ଶ୍ରୀକ୍ଷେତ୍ରରେ ମହାପ୍ରଭୁ ଜଗନ୍ନାଥ ଓ ଭକ୍ତକବି ଦୀନବନ୍ଧୁଙ୍କ ଭବ୍ୟମନ୍ଦିର ନିର୍ମାଣ କାମ ଚାଲିଛି। ୨୦୨୧ ଜୁଲାଇ ପୂର୍ବରୁ ଏହା ଶେଷ ହେବ। ଏଥିସହ ରଥାଯାତ୍ରା ଏବଂ ମନ୍ଦିର ପ୍ରତିଷ୍ଠା ଉତ୍ସବ ପାଳିତ ହେବ ବୋଲି ସଂକଳ୍ପ ନିଆଯାଇଛି।
ଏହି ଅବସରରେ ଅଧ୍ୟାପିକା ଡ. ପୁଷ୍ପଲତା ରଥ, ଦୀନେଶ ଦାସଙ୍କ ସମ୍ପାଦିତ ସ୍ମରଣିକା ‘ଶରଣ ଶ୍ରୀକ୍ଷେତ୍ର’ ଲୋକାର୍ପିତ ହୋଇଥିଲା। ଅବସରପ୍ରାପ୍ତ ଅଧ୍ୟାପକ ଡ. ଦୁର୍ଗାମାଧବ ପୃଷ୍ଟିଙ୍କ ସଭାପତିତ୍ୱରେ ଆୟୋଜିତ ଉତ୍ସବକୁ ରମାକାନ୍ତ ମିଶ୍ର ସଂଯୋଜନା କରିଥିଲେ। କାର୍ଯ୍ୟକ୍ରମରେ ଭୁବନେଶ୍ୱର, ପୁରୀରୁ ଜଗନ୍ନାଥ ଆଶ୍ରିତମଣ୍ଡଳୀ, ଗ୍ଲୋବାଲ ସ୍ପିରିଚୁଆଲ ମିଶନର କର୍ମକର୍ତ୍ତାଙ୍କ ସମେତ ବହୁ ମାନ୍ୟଗଣ୍ୟବ୍ୟକ୍ତି ଓ ଶ୍ରଦ୍ଧାଳୁ ଉପସ୍ଥିତ ଥିଲେ।
