ରୋମ,୫।୭- ପୂର୍ବତନ ଇଟାଲିଆନ ଗୋଲକିପର ଗିଆନଲୁଇଗି ବଫନ ପ୍ୟାରିସ ସେଣ୍ଟ ଜର୍ମେନ (ପିଏସ୍ଜି) ସହ ଏକ ବର୍ଷୀୟା ଚୁକ୍ତି ଶେଷ କରିବା ପରେ ଜୁଭେଣ୍ଟସ କ୍ଲବକୁ ଫେରିଛନ୍ତି। ଏ ନେଇ କ୍ଲବ ପକ୍ଷରୁ ସୂଚନା ଦିଆଯାଇଛି। ୪୧ ବର୍ଷୀୟ ଗୋଲକିପର ପୂର୍ବରୁ ୧୭ ସିଜନରେ କ୍ଲବ ପାଇଁ ଖେଳିଛନ୍ତି। ତାଙ୍କ ପ୍ରତିନିଧିତ୍ୱରେ ଦଳ ୯ ଥର ସିରିଜ ଏ’ ଟାଇଟଲ ହାତେଇବା ସହ ୩ ଥର ଚାମ୍ପିୟନ୍ସ ଲିଗ୍ ଫାଇନାଲ ଖେଳିଥିଲା। ଗତ ବର୍ଷ ମେ’ରେ ବଫନ ଜୁଭେଣ୍ଟସ କ୍ଲବରୁ ଭାବବିହ୍ବଳ ବିଦାୟ ନେଇଥିଲେ। ସେ କେବଳ ଜଣେ ଅଧିନାୟକ ନ ଥିଲେ ଦଳର କିମ୍ବଦନ୍ତୀ ଓ ପରିଚୟ ଥିଲେ। ୨୦୦୬ ବିଶ୍ୱକପ୍ ଜିତିଥିବା ଇଟାଲି ଦଳର ସଦସ୍ୟଙ୍କ ନିକଟରେ ଫୁଟ୍ବଲ ଇତିହାସ ପ୍ରାୟ ସମସ୍ତ ସମ୍ମାନଜନକ ଟ୍ରଫି ରହିଛି। କିନ୍ତୁ ଚାମ୍ପିୟନ୍ସ ଲିଗ୍ ଟାଇଟଲ ସେ ହାତେଇ ପାରିନାହାନ୍ତି।
