ଭଦ୍ରକ ଅଫିସ, ୨୯ା୪- ଜିଲାରେ ମୋଟ ୧୨୯୨ଟି ପୋଲିଂ ଷ୍ଟେଶନ ମଧ୍ୟରୁ ୭୫ଟି ମତଦାନ କେନ୍ଦ୍ରକୁ ଆଦର୍ଶ ମତଦାନ କେନ୍ଦ୍ର (ମଡେଲ୍ ପୋଲିଂ ବୁଥ୍) ଭାବେ ଘୋଷଣା କରାଯାଇଛି। ଜିଲା ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ ଏହି ସବୁ ବୁଥ୍ ମାନଙ୍କରେ ଅନୂ୍ୟନ ପକ୍ଷେ ୧୦ଟି ସୁବିଧା ସୁଯୋଗ ଉପଲବ୍ଧ ରହିଛି। ପ୍ରତି ବୁଥ୍ରେ ଦିବ୍ୟାଙ୍ଗଙ୍କ ପାଇଁ ରାମ୍ପ ଏବଂ ସେଲ୍ଫି ଉଠାଇବା ପାଇଁ (ସେଲ୍ଫି ଜୋନ) କରାଯାଇଛି। ଦିବ୍ୟାଙ୍ଗଙ୍କୁ ବୁଥ୍ ପର୍ଯ୍ୟନ୍ତ ଆଣିବା ପାଇଁ ହୁଇଲ୍ ଚେୟାର ବ୍ୟବସ୍ଥା, ସେହିଭଳି ଦିବ୍ୟାଙ୍ଗ ଓ ବୃଦ୍ଧାବୃଦ୍ଧଙ୍କ ପାଇଁ ସ୍ବେଚ୍ଛାସେବୀ ନିୟୋଜିତ, ଭୋଟର ମାନଙ୍କୁ ଗୋଲାପ ଫୁଲ ଦେଇ ସ୍ବାଗତ କରାଯିବ, ଭୋଟରଙ୍କ ପାଇଁ ଅପେକ୍ଷା ଗୃହ, ପର୍ଯ୍ୟାପ୍ତ ପାଣି ଓ ଥଣ୍ଡା ହାୱା ପାଇଁ ପଙ୍ଖା ବ୍ୟବସ୍ଥା, ସେହିଭଳି ପ୍ରାଥମିକ ଚିକିତ୍ସା ପାଇଁ ଆଶାକର୍ମୀ ନିୟୋଜିତ, ଦହି ଓ ସରବତ ବ୍ୟବସ୍ଥା, ଭୋଟରଙ୍କ ସାଙ୍ଗରେ ଆସିଥିବା ଶିଶୁମାନଙ୍କୁ ଚକୋଲେଟ୍ ପ୍ରଦାନ, ଦିବ୍ୟାଙ୍ଗ ଓବୟସ୍କ ଭୋଟରମାନଙ୍କୁ ତତ୍କ୍ଷଣାତ୍ ମତଦାନ ସୁଯୋଗ, ସମସ୍ତ ୧୨୯୨ ବୁଥ୍ରେ ଦିବ୍ୟାଙ୍ଗଙ୍କ ପାଇଁ ଘରୁ ନେବାଆଣିବା ପାଇଁ ସକ୍ଷମ ଗାଡି ବ୍ୟବସ୍ଥା କରାଯାଇଥିବା ଜଣାପଡିଛି। ଏହି ସବୁ ମଡେଲ୍ ବୁଥ୍ ତାଲିକାରେ ଭଦ୍ରକ ବ୍ଲକର ବାପୁଜୀ ହାଇସ୍କୁଲ ଏବଂ ବାପୁଜୀ ନୋଡାଲ ୟୁପି ସ୍କୁଲ, ଓକରା ହାଇସ୍କୁଲ, ଗଞ୍ଜାମାଳ ପ୍ରାଇମେରୀ ସ୍କୁଲ, ତିଶଳପୁର ପ୍ରାଇମେରୀ ସ୍କୁଲ, ବାଉଦପୁର ପ୍ରାଇମେରୀ ସ୍କୁଲ ରହିଥିବା ବେଳେ ଭଦ୍ରକ ପୌରପାଳିକା ଅଧୀନରେ ଥିବା ୭ଟି ମଡେଲ୍ ବୁଥ୍ ହେଲା ଭଦ୍ରକ ଜିଲା ସ୍କୁଲ, ଭଦ୍ରକ ବାଳିକା ଉଚ୍ଚ ବିଦ୍ୟାଳୟ, ବିଏମ୍ ବାଗୁରାଇ ଉଚ୍ଚ ବିଦ୍ୟାଳୟ, କୁଆଁସ ପ୍ରକଳ୍ପ ଉନ୍ନୀତ ବିଦ୍ୟାଳୟ, ଭଦ୍ରକ ମହାବିଦ୍ୟାଳୟ, ଗୋପବନ୍ଧୁ ନୋଡାଲ ୟୁପି ସ୍କୁଲ, ଆର୍ସିବିଏଲ୍ ହାଇସ୍କୁଲ ରହିଥିବା ଜଣାପଡିଛି।
