ଟୋକିଓ, ୨୩।୭ (ପି.ଟି.)- ଭାରତୀୟ ଶଟ୍ଲର ବି. ସାଇ ପ୍ରଣୀଥ୍ ଏଠାରେ ଚାଲିଥିବା ଜାପାନ ଓପନ୍ ବ୍ୟାଡ୍ମିଣ୍ଟନ ପ୍ରତିଯୋଗିତାରେ ବିଜୟରୁ ଅଭିଯାନ କରିଛନ୍ତି। ମଙ୍ଗଳବାର ଅନୁଷ୍ଠିତ ପୁରୁଷ ସିଙ୍ଗଲ୍ସର ଏକ ମୁକାବିଲାରେ ସାଇ ପ୍ରଣୀଥ୍ ୨୧-୧୭, ୨୧-୧୩ ସିଧାସଳଖ ଗେମ୍ରେ ଘରୋଇ ପ୍ରତିଯୋଗୀ କେଣ୍ଟୋ ନିଶିମୋଟୋଙ୍କୁ ପରାସ୍ତ କରିଛନ୍ତି। ଅନ୍ସିଡ୍ ପ୍ରଣୀଥ୍ ଏହି ମ୍ୟାଚ୍ ଜିତିବାକୁ ୪୨ ମିନିଟ୍ ସମୟ ନେଇଥିଲେ। ଦ୍ୱିତୀୟ ରାଉଣ୍ଡରେ ତାଙ୍କର ମୁକାବିଲା ଅନ୍ୟତମ ଜାପାନ ଶଟ୍ଲର କାଣ୍ଟା ସୁନେୟାମାଙ୍କ ସହ ହେବ। ସେହିଭଳି ମିକ୍ସଡ୍ ଡବଲ୍ସରେ ସାତ୍ୱିକସାଇରାଜ ରାନ୍କିରେଡ୍ଡୀ ଓ ଅଶ୍ୱିନୀ ପୋନାପ୍ପା ଯୋଡ଼ି ମଧ୍ୟ ବିଜୟରୁ ଅଭିଯାନ ଆରମ୍ଭ କରିଛନ୍ତି। ପ୍ରଥମ ରାଉଣ୍ଡର ଏକ ମୁକାବିଲାରେ ଏହି ଭାରତୀୟ ଯୋଡ଼ି ୨୧-୧୪, ୨୧-୧୯ ଗେମ୍ରେ ଜର୍ମାନୀ ଯୋଡ଼ିଦାର ମାର୍ଭିନ ସିଡେଲ ଓ ଲିଣ୍ଡା ଏଫ୍ଲରଙ୍କୁ ହରାଇଛନ୍ତି। ତେବେ ପୁରୁଷ ଡବଲ୍ସରେ ମନୁ ଅତ୍ରି ଓ ସୁମିଥ୍ ରେଡ୍ଡୀଙ୍କୁ ନିରାଶ ହେବାକୁ ପଡ଼ିଛି। ଉଭୟ ୧୨-୨୧, ୧୬-୨୧ରେ ମାଲେସିଆର ଘୋ ଜେ ଫେଇ ଓ ନୁର୍ ଇଜୁଦ୍ଦିନଙ୍କ ନିକଟରୁ ହାରିଯାଇଛନ୍ତି। ବୁଧବାର ଅଲିମ୍ପିକ୍ସ ରୌପ୍ୟ ପଦକ ବିଜୟିନୀ ପି.ଭି. ସିନ୍ଧୁ ଓ କିଡାମ୍ବୀ ଶ୍ରୀକାନ୍ତଙ୍କ ପରି ପ୍ରମୁଖ ଭାରତୀୟ ଖେଳାଳି କୋଟ୍କୁ ଓହ୍ଲାଇବେ। ୫ମ ସିଡ୍ ମାନ୍ୟତା ସିନ୍ଧୁ ଚାଇନାର ୟୁ ହାନ୍ଙ୍କୁ ଏବଂ ଶ୍ରୀକାନ୍ତ ସାଥୀ ଭାରତୀୟ ଖେଳାଳି ଏଚ୍.ଏସ୍. ପ୍ରଣୟଙ୍କୁ ଭେଟିବେ।
