ସିଡ୍ନୀ,୧୩।୪: କରୋନା ଭାଇରସର ଆତଙ୍କ ଚାଲୁ ରହିଥିବା ବେଳେ ସାରା ବିଶ୍ୱ ଏବେ ସ୍ଥିର ହୋଇଯାଇଛି। ତେବେ ଅଷ୍ଟ୍ରେଲିଆ ଚାଇନାମ୍ୟାନ ବୋଲର ବ୍ରାଡ ହଗ୍ ସୋସିଆଲ ମିଡିଆରେ ବେଶ୍ ସକ୍ରିୟ ରହୁଛନ୍ତି। କୋଭିଡ୍-୧୯ କାରଣରୁ ବିଶ୍ୱରେ ପ୍ରାୟ ସବୁ କ୍ରୀଡ଼ା ଇଭେଣ୍ଟ ବାତିଲ ହୋଇଛି କିମ୍ବା ସ୍ଥଗିତ ରହିଛି। କିନ୍ତୁ ଏହି ସମୟରେ ହଗ୍ ଟୁଇଟରରେ ବେଶ୍ ବ୍ୟସ୍ତ ରହି କ୍ରିକେଟ ପ୍ରଶଂସକଙ୍କ ମନୋରଞ୍ଜନ କରିଛନ୍ତି। ଏବେ ସେ ଭାରତୀୟ କ୍ରିକେଟ ଦଳର ଶ୍ରେଷ୍ଠ ଫିଲ୍ଡରଙ୍କ ବିଷୟରେ ନିଜର ମତ ପୋଷଣ କରିଛନ୍ତି। ରବୀନ୍ଦ୍ର ଜାଡେଜାଙ୍କୁ ସେ ଭାରତର ଶ୍ରେଷ୍ଠ ଫିଲ୍ଡର ଭାବେ ବିବେଚନା କରିଛନ୍ତି। ଟୁଇଟରରେ ଏକ ପ୍ରଶ୍ନର ଉତ୍ତର ଦେଇ ସେ ଏହି କଥା କହିଛନ୍ତି। ବିରାଟ କୋହଲି, ସୁରେଶ ରାଇନା, ଯୁବରାଜ ସିଂଙ୍କ ମଧ୍ୟରୁ କିଏ ଶ୍ରେଷ୍ଠ ଫିଲ୍ଡର ବୋଲି ପ୍ରଶ୍ନ କରାଯାଇଥିଲା। ତେବେ ସେ ଏହି ୪ଜଣଙ୍କୁ ପଛରେ ପକାଇ ଜାଡେଜାଙ୍କୁ ଶ୍ରେଷ୍ଠ ଫିଲ୍ଡର ବୋଲି କହିଛନ୍ତି। ଜାଡେଜାଙ୍କ ଥ୍ରୋ ଉଚ୍ଚକୋଟୀର। ଫିଟ୍ ରହିବା ପାଇଁ ଜାଡେଜା ସବୁ ପ୍ରକାର ଟ୍ରେନିଂ କରୁଛନ୍ତି। ତେବେ ସେ ବହୁ ପାରିମାଣରେ ଓଜନ ଉଠାଇବାକୁ ପସନ୍ଦ କରି ନ ଥାନ୍ତି। ସବୁ ଦୃଷ୍ଟିକୋଣରୁ ଦେଖିବାକୁ ଗଲେ ଜାଡେଜା ଭାରତର ଶ୍ରେଷ୍ଠ ଫିଲ୍ଡର ବୋଲି ହଗ୍ କହିଛନ୍ତି।
