ଲିଭରପୁଲ,୧୦।୮(ଏଏଫ୍ପି)- ଲିଭରପୁଲ୍ ଗୋଲକିପର ଆଲିସନ ବେକର ବୁଧବାର ଚେଲ୍ସି ବିପକ୍ଷ ୟୁଫା ସୁପର କପ୍ ମ୍ୟାଚ୍ରେ ଖେଳିପାରିବେ ନାହିଁ। ତାଙ୍କ ଗୋଇଠିରେ ଆଘାତ ଲାଗିଛି। ୟୁରୋପ ଚାମ୍ପିୟନ ଲିଭରପୁଲ୍ ୪-୧ ଗୋଲରେ ନରଓ୍ବିଚକୁ ହରାଇ ସିଜନ ଆରମ୍ଭ କରିଛି। ମ୍ୟାଚ୍ର ପ୍ରଥମାର୍ଦ୍ଧ ଶେଷ ହେବାର ୬ ମିନିଟ୍ ପୂର୍ବରୁ ବ୍ରାଜିଲିଆନ ଗୋଲକିପର ବଲକୁ କିକ୍ କରିବାବେଳେ ଗୋଇଠିରେ ଆଘାତ ପାଇଥିଲେ। ଏହାପରେ ତାଙ୍କୁ ସପୋର୍ଟ ଷ୍ଟାଫମାନେ ପଡ଼ିଆରୁ ନେଇଯାଇଥିଲେ। ଇସ୍ତାନବୁଲଠାରେ ଚାମ୍ପିୟନ୍ସ ଲିଗ୍ ବିଜେତା ଓ ୟୁରୋପା ଲିଗ୍ ଚାମ୍ପିୟନ ମଧ୍ୟରେ ସୁପର କପ୍ ମ୍ୟାଚ୍ ଖେଳାଯାଏ। ଆଲିସନଙ୍କ ସ୍ଥାନରେ ସ୍ପାନିଶ ଗୋଲକିପର ଆଡ୍ରିଆନ ଖେଳିବା ନେଇ ଆଶା କରାଯାଉଛି।
