ଜୁନାଗଡ,୨୬।୮(ଡି.ଏନ.ଏ.): କଳାହାଣ୍ଡି ଜିଲା ନାଗରିକ ବିକାଶ ସଙ୍ଗଠନ ପକ୍ଷରୁ ସୋମବାର ଜୁନାଗଡ ସହକାରୀ କୃଷି ଅଧିକାରୀ ନୌକେଶ୍ୱର ନାଗଙ୍କ ଜରିଆରେ ଜିଲା ଉପକୃଷି ନିର୍ଦ୍ଦେଶକଙ୍କୁ ଏକ ୩ ଦଫା ଦାବିପତ୍ର ପ୍ରଦାନ କରାଯାଇଛି। ଜୁନାଗଡ ବ୍ଲକରେ ୩୪ଟି ପଞ୍ଚାୟତରେ ବାସ କରୁଥିବା ନିରୀହ ଚାଷୀମାନଙ୍କୁ ଚିହ୍ନଟ କରି ଶୀଘ୍ର ଚାଷୀ ପ୍ରମାଣପତ୍ର ପ୍ରଦାନ କରିବା, ଉପଯୁକ୍ତ ସମୟରେ ରିହାତି ଦରରେ ବିହନ, ସାର, କୀଟନାଶକ ପ୍ରଦାନ କରିବା ଓ ପୂର୍ବରୁ ଆବେଦନ କରାଯାଇଥିବା ଦରଖାସ୍ତଗୁଡିକର ଶୀଘ୍ର ନିଷ୍ପତ୍ତି ନେବା ଆଦି ଦାବି ଏଥିରେ ଉଲ୍ଲେଖ କରାଯାଇଛି। ଜୁନାଗଡ ବ୍ଲକ ଅନେକ ଚାଷୀ ବିଭିନ୍ନ ସରକାରୀ ଯୋଜନାରୁ ବଞ୍ଚତ୍ତ ଅଛନ୍ତି। ଏହି ବ୍ଲକରେ ବାସ କରୁଥିବା ଚାଷୀମାନେ ପଛୁଆ ଓ ରାଜନୈତିକ ତଥା ଅର୍ଥନୈତିକସ୍ତରରେ ଦୁର୍ବଳ ଅଛନ୍ତି। ତେଣୁ ଜମି ପାସବୁକ, ଚାଷୀ ପରିଚୟପତ୍ର, କିଷାନ କ୍ରେଡିଟ କାର୍ଡ ଭଳି ବିଭିନ୍ନ ଅତ୍ୟାବଶ୍ୟକ ଦସ୍ତାବିଜ ସହିତ ରିହାତି ଦରରେ ବିହନ, ସାର, କୀଟନାଶକ ଆଦି ସାମଗ୍ରୀ ପାଇ ପାରୁନାହାନ୍ତି। ଚାଷୀମାନେ ବିଭିନ୍ନ ସରକାରୀ ଯୋଜନାରେ ସାମିଲ ହୋଇ ନ ପାରିବାରୁ ଆର୍ଥତ୍କସ୍ତରରେ ଅନଗ୍ରସର ହୋଇପଡିଛନ୍ତି। ଏହାକୁ ନେଇ କଳାହାଣ୍ଡି ନାଗରିକ ବିକାଶ ସଙ୍ଗଠନ ପକ୍ଷରୁ କ୍ଷୋଭ ପ୍ରକାଶ ପାଇ ଏହି ଦାବିପତ୍ର ପ୍ରଦାନ କରାଯାଇଛି। ଏହି ସମୟରେ ସଙ୍ଗଠନ ଆବାହକ ମଧୁସୁଦନ ନାଏକ, ସଦସ୍ୟ ମନୋଜ କୁମାର ନାଏକ, ସୁଦର୍ଶନ ନାଏକ, ବିନୋଦ ବେମାଲ, ସୀମାଞ୍ଚଳ ନାଗ ପ୍ରମୁଖଙ୍କ ସହ ଅନେକ କାର୍ଯ୍ୟକର୍ତ୍ତା ଉପସ୍ଥିତ ଥିଲେ।
