ନୂଆଦିଲ୍ଲୀ,୨୧।୬: ସୀମାରେ ଚାଇନା ସେନାର ଆକ୍ରମଣ ଯୋଗୁ ୨୦ ଭାରତୀୟ ଯବାନ ଶହୀଦ ହେବା ପରେ ଦେଶ ମଧ୍ୟରେ ଚାଇନା ବିରୋଧୀ ସ୍ବର ତୀବ୍ର ହୋଇଛି। ଲୋକମାନେ ଚାଇନା ସାମଗ୍ରୀ ବର୍ଜନ ଲାଗି ପ୍ରଦର୍ଶନ କରିବା ସହ ପୋଡ଼ାଜଳା କରୁଛନ୍ତି। ଚାଇନା ସାମଗ୍ରୀ ଉପରେ ନିର୍ଭରତା କମାଇବା ସହ ଆତ୍ମନିର୍ଭର ଭାରତ ଯୋଜନାକୁ ଉତ୍ସାହିତ କରିବାକୁ ଭାରତ ସରକାର ଅଗ୍ରସର ହେଉଥିବା ଜଣାପଡିଛି। ଏହାକୁ ନେଇ କେନ୍ଦ୍ର ସରକାର ଦେଶର ଶିଳ୍ପଜଗତର ସହାୟତା ଲୋଡିଛନ୍ତି। ଯେଉଁ ସାମଗ୍ରୀଗୁଡିକ ଚାଇନାରୁ ମଗାଯାଉଛି ତା’ର ଏକ ତାଲିକା ପ୍ରସ୍ତୁତ କରିବାକୁ ଶିଳ୍ପଜଗତକୁ କୁହାଯାଇଛି। ବିସ୍ତୃତ ରିପୋର୍ଟ ମିଳିବା ପରେ ସରକାର ଅଣ ଅତ୍ୟାବଶ୍ୟକ ସାମଗ୍ରୀର ଚିହ୍ନଟ କରିବେ। ଏହାକୁ ଘରୋଇ ବଜାରରୁ ସଂଗ୍ରହ କରିବା ତଥା ଦେଶ ଭିତରେ ଏହାର ପ୍ରସ୍ତୁତି କରିବା ଉପରେ ଫୋକସ କରିବା ନେଇ ଯୋଜନା ରଖାଯାଇଛି।
ଚାଇନାର ବ୍ୟବହାରକୁ ନେଇ ସାରା ଦେଶରେ ତୀବ୍ର ଉତ୍ତେଜନା ପ୍ରକାଶ ପାଇଛି। ସରକାରଙ୍କ ସହ ସାଧାରଣ ଲୋକ, ଶିଳ୍ପ ସଂଘ ବ୍ୟବସାୟୀ ମଧ୍ୟ ଚାଇନା ସାମଗ୍ରୀ ବୟକଟ କରିବା ଲାଗି ଅଡି ବସିଛନ୍ତି। ଚାଇନା ଉପରେ ନିର୍ଭରତା କମାଇବା ଲାଗି ସରକାର ମୁଖ୍ୟତଃ ୩ କୌଶଳ ଉପରେ କାର୍ଯ୍ୟ କରିବେ। ସ୍ବଳ୍ପ ମିଆଦୀ, ମଧ୍ୟମ ମିଆଦୀ ଏବଂ ଦୀର୍ଘ ମିଆଦୀ ଭିତ୍ତିରେ କାର୍ଯ୍ୟପନ୍ଥା ହାତକୁ ନିଆଯିବ। ଶିଳ୍ପଜଗତର ତାଲିକା ଆଧାରରେ ସ୍ବଳ୍ପ ମିଆଦୀ କାର୍ଯ୍ୟାନୁଷ୍ଠାନ ହାତକୁ ନିଆଯିବ। ସେହିଭଳି ଅନ୍ୟ ୨ ବର୍ଗର କାର୍ଯ୍ୟାନୁଷ୍ଠାନ ଲାଗି ସରକାର ତ୍ୱରିତ ଭିତ୍ତିରେ ବ୍ଲୁପ୍ରିଣ୍ଟ ହାତକୁ ନେବେ।
ଶିଳ୍ପ ପ୍ରୋତ୍ସାହନ ଏବଂ ଅନ୍ତଃ ବାଣିଜ୍ୟ ବିଭାଗ (ଡିପିଆଇଆଇଟି) ପକ୍ଷରୁ କୁହାଯାଇଛି ଯେ, କୌଶଳକୁ ନେଇ ଟ୍ରେଡ୍ ଆସୋସିଏଶନ ସହ ସମ୍ପର୍କ କରାଯାଇଛି। ସାମଗ୍ରୀର ତାଲିକା ମଗାଯାଇଛି। ଭାରତ ଚାଇନାଠାରୁ ଅଟୋମୋବାଇଲ, ଫାର୍ମାସ୍ୟୁଟିକାଲ, ଖେଳନା, ପ୍ଲାଷ୍ଟିକ ଭଳି ଅନ୍ୟ ବର୍ଗରେ ସାମଗ୍ରୀ ବୃହତ୍ ପରିମାଣରେ ଆମଦାନୀ କରୁଛି। ରିପୋର୍ଟ ମୁତାବକ ସରକାର ନିଜ କୌଶଳ ବଦଳାଇଛନ୍ତି। ସରକାରଙ୍କ ନଜର ବର୍ତ୍ତମାନ ଘରୋଇ କ୍ଷେତ୍ର ଉପରେ ରହିଛି। ଚାଇନା କମ୍ପାନୀଗୁଡିକର କିଛି ଚୁକ୍ତି ମଧ୍ୟ ବାତିଲ କରାଯାଇଥିବା ନଜରକୁ ଆସିଛି। ଏହା ମଧ୍ୟରେ ଟେଲିକମ ରେଳ ଏବଂ ମେଟ୍ରୋ ପ୍ରକଳ୍ପ ସାମିଲ ରହିଛି।
