ବେଲ୍ଗ୍ରେଡ୍ (ସର୍ବିୟା), ୬ା୪ (ଏପି)- ମହାମାରୀ କରୋନା ଭାଇରସ୍ ବ୍ୟାପିବାକୁ ରୋକିବା ଲାଗି ଜାରି ହୋଇଥିବା କର୍ଫ୍ୟୁ ଅମାନ୍ୟ କରିବା ଅଭିଯୋଗରେ ସର୍ବୀୟ ଫୁଟ୍ବଲ ଖେଳାଳି ଆଲେକ୍ଜାଣ୍ଡର ପ୍ରିଜୋଭିଚ୍ ଦଣ୍ଡିତ ହୋଇଛନ୍ତି। ସେ ୩ ମାସ ପର୍ଯ୍ୟନ୍ତ ଘରୁ ବାହାରି ପାରିବେ ନାହିଁ। ୨୯ ବର୍ଷୀୟ ଷ୍ଟ୍ରାଇକର ସୌଦି ଆରବ କ୍ଲବ ଅଲ୍-ଇତିହାଦ୍ ତରଫରୁ ଖେଳିଥାନ୍ତି। ଶନିବାର ତାଙ୍କର ଏକ ଭିଡିଓ ଲିଙ୍କ୍ ଟ୍ରାଏଲ୍ ହୋଇଥିଲା। ଏଥିରେ ସେ ଦୋଷୀ ସାବ୍ୟସ୍ତ ହୋଇଥିଲେ। କୋଭିଡ୍-୧୯ ମହାମାରୀ ରୋକିବା ଲାଗି ସନ୍ଧ୍ୟା ୫ରୁ ସକାଳ ୫ ପର୍ଯ୍ୟନ୍ତ କର୍ଫୁ୍ୟୁ ଜାରି କରାଯାଇଥିଲା। ଶୁକ୍ରବାର ବେଲ୍ଗ୍ରେଡ୍ସ୍ଥିତ ଏକ ହୋଟେଲ ଲବିରେ ପୋଲି ପ୍ରଜୋଭିଚ୍ ଓ ଅନ୍ୟ ୧୯ଜଣଙ୍କୁ ଗିରଫ କରିଥିଲା। ରିୟଲ ମାଡ୍ରିଡ୍ ଷ୍ଟ୍ରାଇକର ଲୁକା ଜୋଭିଚ୍ଙ୍କ ପରେ ଷ୍ଟେ ଆଟ୍ ହୋମ୍ ନିୟମ ଉଲ୍ଲଂଘନ କରିବାରେ ପ୍ରିଜୋଭିଚ୍ ହେଉଛନ୍ତି ଦ୍ୱିତୀୟ ସର୍ବୀୟ ଖେଳାଳି। ଦେଶରେ ସରକାର ଜରୁରିକାଳୀନ ପରିସ୍ଥିତି ଜାରି କରିଥିବାବେଳେ ଜୋଭିଚ୍ ଗତ ମାସରେ ବେଲ୍ଗ୍ରେଡ୍ସ୍ଥିତ ଏକ କାଫେରେ ତାଙ୍କ ଗର୍ଲଫ୍ରେଣ୍ଡ୍ଙ୍କ ଜନ୍ମଦିନ ପାର୍ଟିରେ ଯୋଗ ଦେଇଥିଲେ। ସରକାରୀ କଟକଣା ଅମାନ୍ୟ କଲେ ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡର ବ୍ୟବସ୍ଥା ଅଛି।
