ସାଂଘାଇ, ୧୬ା୪ (ଏଏଫ୍ପି)-ଚାଇନିଜ ସୁପର ଲିଗ୍ ଚାମ୍ପିୟନ ଫୁଟ୍ବଲ ଟିମ୍ ଗୁଆଙ୍ଗ୍ଝୋଉ ଏଭରଗ୍ରେଣ୍ଡ୍ ଏହାର ଅନ୍ତର୍ଜାତୀୟ ଓ୍ବିଙ୍ଗର ୟୁ ହାନ୍ଚାଓଙ୍କୁ ଦଳରୁ ବହିଷ୍କାର କରିଛି। ନିଜର ମର୍ସିଡିଜ୍ ୪x୪ର ଲାଇସେନ୍ସ ପ୍ଲେଟ୍ ବଦଳ କରିଥିବାରୁ ଏହି ଖେଳାଳି ୧୫ ଦିନ ପୋଲିସ ହେପାଜତରେ ରହିବେ। ଇଟାଲିଆନ ବିଶ୍ୱକପ୍ ବିଜେତା ଫାବିଓ କାନାଭାରୋ ଗୁଆଙ୍ଗଝୋଉ ଦଳର ମ୍ୟାନେଜର ଅଛନ୍ତି। ସେ କହିଛନ୍ତି, ଖେଳାଳିମାନଙ୍କ ଲାଗି କ୍ଲବର ରହିଥିବା କଠୋର ନିୟମକୁ ୩୩ବର୍ଷୀୟ ହାନ୍ଚାଓ ଭଙ୍ଗ କରିଛନ୍ତି। ସଦର୍ନ ସିଟି ପୋଲିସ୍ ହାନ୍ଚାଓଙ୍କୁ ୧୫ଦିନ ହେପାଜତରେ ରଖିବା ବ୍ୟତୀତ ୫,୦୦୦ ୟୁଆନ୍(୭୦୦ ଆମେରିକୀୟ ଡଲାର) ଜରିମାନା କରିଛି। ଚାଇନା ତରଫରୁ ୫୯ ଟି ମ୍ୟାଚ ଖେଳି ଏହି ଅନ୍ତର୍ଜାତୀୟ ଓ୍ବିଙ୍ଗର ୯ଟି ଗୋଲ ସ୍କୋର କରିଛନ୍ତି। ସେ ତାଙ୍କ ରେଜିଷ୍ଟ୍ରେଶନ ପ୍ଲେଟ୍ରେ ଗୋଟିିଏ ଅକ୍ଷର ନିଜ ଇଚ୍ଛାରେ ପରିବର୍ତ୍ତନ କରିଥିଲେ। ନମ୍ବରପ୍ଲେଟ୍ରେ ଇଂଲିଶ ଅକ୍ଷର ‘ଇ’କୁ ବଦଳ କରି ‘ଏଫ୍’ କରିଦେଇଥିଲେ। ଟ୍ରାଫିକ୍ ସୁରକ୍ଷା ଆଇନ ଅନୁସାରେ ଏହା ବେଆଇନ। ସେ ଏପରି କାହିଁକି କରିଥିଲେ ତାହା ଜଣାପଡ଼ିନାହିଁ। ହାନ୍ଚାଓ ଗୁଆଙ୍ଗଝୋଉ ଦଳ ସହିତ କିନ୍ତୁ ଚାଇନିଜ୍ ସୁପର ଲିଗ୍ ୫ଥର ଏବଂ ଥରେ ଏଏଫ୍ସି ଚାମ୍ପିୟନ୍ସ ଲିଗ୍ ହାସଲ କରିଛନ୍ତି।
