ଦିଲ୍ଲୀକା ବାବୁ ଦିଲୀପ ଚେରିଏନ୍
ଅନେକ ବାବୁ ଭାବନ୍ତି ଯେ,ନିୟମ ସେମାନଙ୍କ ପାଇଁ ନୁହେଁ , ତାହା କେବଳ ଅନ୍ୟମାନଙ୍କ ପାଇଁ କରାଯାଇଛି । କେରଳରେ ଜଣେ ଆଇଏଏସ୍ ଅଧିକାରୀ ବିଦେଶରୁ ଫେରିବା ପରେ ହୋମ କ୍ୱାରାଣ୍ଟାଇନକୁ ଏଡାଇଗଲେ। ପରେ ତାଙ୍କ ଘରୋଇ ସହର କାନପୁର(ଉତ୍ତରପ୍ରଦେଶ)ରେ ତାଙ୍କୁ ଠାବ କରାଯାଇଥିତ୍ଲା। ବିନା ଅନୁମତିରେ ଅନୁପସ୍ଥିତ ରହିଥିବା ଯୋଗୁ ତାଙ୍କ ବିରୋଧରେ ଏକ ମାମଲା ରୁଜୁ କରାଯାଇଛି। କୋଲ୍ଲାମର ଉପଜିଲାପାଳ ଅନୁପମ ମିଶ୍ର ସିଙ୍ଗାପୁରରୁ ଫେରିଥିଲେ ଏବଂ ତାଙ୍କୁ ହୋମ କ୍ୱାରାଣ୍ଟାଇନ୍ରେ ରହିବାକୁ ପରାମର୍ଶ ଦିିଆଯାଇଥିଲା। କରୋନା ଭାଇରସ୍ ବ୍ୟାପୁଥିବା ସମୟରେ ବିଦେଶରୁ ଫେରୁଥିବା ଲୋକଙ୍କ ପାଇଁ ରହିଥିବା ମାନଦଣ୍ଡକୁ ଆଧାର କରି ତାଙ୍କୁ ଏଭଳି ପରାମର୍ଶ ଦିଆଯାଇଥିଲା। ତେବେ ସେ ଏହାକୁ ମାନିଲେ ନାହିଁ; ଯାହାଦ୍ୱାରା ଜଣେ ଆଇଏଏସ୍ ଅଧିକାରୀଙ୍କ ପକ୍ଷରେ ଏହା ବିରାଟ ଭୁଲ୍ ବୋଲି ସରକାର ମନେକରିଛନ୍ତି। ପ୍ରଥମେ ମିଶ୍ରଙ୍କ ଅନ୍ତର୍ଦ୍ଧାନ ଖବର ଜଣାପଡିଲା ପରେ କୋଲ୍ଲାମ ଅଧିକାରୀମାନେ ସଙ୍ଗେ ସଙ୍ଗେ ତାଙ୍କ ଡ୍ରାଇଭର, ବ୍ୟକ୍ତିଗତ ସୁରକ୍ଷା କର୍ମୀ ଓ ସଚିବଙ୍କୁ ଆଇସୋଲେଶନ୍ରେ ରଖିଥିଲେ। କୋଭିଡ୍-୧୯ ସଂକ୍ରମଣରେ କେରଳ ଦେଶରେ ସବୁଠାରୁ ବେଶି ପ୍ରଭାବିତ ହୋଇଛି ଏବଂ ଏହା ଲକ୍ଡାଉନରେ ରହିଛି। ଏ ସଂକ୍ରାନ୍ତରେ କେରଳ ସରକାର ଉତ୍ତରପ୍ରଦେଶ ସରକାରଙ୍କ ସହ ଯୋଗାଯୋଗରେ ରହିଛନ୍ତିି ଏବଂ ମିଶ୍ର ତାଙ୍କ ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶ ଅବମାନନା କରିଥିବା ଯୋଗୁ ତାଙ୍କୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବାକୁ ପଡିବ ବୋଲି ଜଣାପଡିଛି।
କେରଳ ବାବୁଙ୍କ ପୁନଃ ନିଯୁକ୍ତି
ମଦ୍ୟପାନ କରି ଗାଡ଼ି ଚଲାଇ ଦୁର୍ଘଟଣା ଘଟାଇ ଜଣେ ସାମ୍ବାଦିକଙ୍କ ଜୀବନ ନେଇଥିବା ଅଭିଯୋଗରେ ପୋଲିସ କେରଳର ଜଣେ ଆଇଏଏସ୍ ଅଧିକାରୀଙ୍କୁ ଅଭିଯୁକ୍ତ କରିବା ପରେ ସେ ବଦନାମ ହୋଇଥିଲେ। ସେ ଏବେ ଚାକିରିରେ ପୁନଃ ନିଯକ୍ତି ପାଇଛନ୍ତି। ଗତବର୍ଷ ଅଗଷ୍ଟରେ ରାଜ୍ୟ ରାଜଧାନୀରେ ଆଇଏଏସ୍ ଅଧିକାରୀ ଶ୍ରୀରାମ ଭେଙ୍କଟରମଣଙ୍କୁ ସରକାର ନିଲମ୍ବିତ କରିଥିଲେ। ତେବେ ବିରୋଧୀ ଦଳ ଏବଂ ଜନସାଧାରଣଙ୍କ ପକ୍ଷରୁ ଏହାକୁ ସମାଲୋଚନା କରାଯାଇଥିବା ସତ୍ତ୍ୱେ ଏହି ବାବୁଙ୍କୁ ପୁନଃ ନିଯୁକ୍ତି ଦେବା ଲାଗି ବାରମ୍ବାର ପ୍ରୟାସ କରାଯାଇଥିଲା। ଏହା ପୂର୍ବରୁ ଏହି ବର୍ଷ ଜାନୁୟାରୀରେ ମୁଖ୍ୟ ଶାସନ ସଚିବ ଟମ୍ ଜୋଶେଙ୍କ ଅଧ୍ୟକ୍ଷତାରେ ଗଠିତ କମିଟି ଭେଙ୍କଟରମଣଙ୍କୁ ଚାକିରିରେ ପୁନଃ ଅବସ୍ଥାପିତ କରିବାକୁ ନିଷ୍ପତ୍ତି ନେଇଥିଲା। କିନ୍ତୁ ସରକାର ଏହି ନିଷ୍ପତ୍ତିକୁ ସ୍ଥଗିତ ରଖିଥିଲେ। ଏବେସୁଦ୍ଧା ଏହାକୁ ସ୍ଥଗିତ ରଖାଯାଇଛି। କେରଳ ଏବେ କୋଭିଡ୍-୧୯ ସଂକ୍ରମଣ ବିରୋଧରେ ଲଢେଇ କରୁଛି । ଏହି ପରିପ୍ରେକ୍ଷୀରେ ଦାଗୀ ବାବୁଙ୍କ ପୁନଃ ନିଯୁକ୍ତି ନିଷ୍ଫତ୍ତିକୁ ଗମ୍ଭୀରତାର ସହ ବିଚାର କରାଯିବା ଉଚିତ। ଲକ୍ଷ୍ୟ କରିବା ଉଚିତ ବୋଲିି କୁହାଯାଉଛି। ତେବେ ବାବୁଙ୍କ ପୁନଃ ନିଯୁକ୍ତି ଏତେ ସହଜରେ ହୋଇଯିବା ସମ୍ଭାବନା ନାହିଁ।
