ନୂଆଦିଲ୍ଲୀ,୧।୫(ପି.ଟି.): କୋଭିଡ୍-୧୯ ମହାମାରୀ କାରଣରୁ ଆଉ ଏକ ମେଗା ଇଭେଣ୍ଟକୁ ଘୁଞ୍ଚାଇ ଦିଆଯାଇଛି। ୨୦୨୧ରେ ଆୟୋଜନ ହେବାକୁ ଥିବା ରାଜ୍ୟଗୋଷ୍ଠୀ ଯୁବ କ୍ରୀଡ଼ାକୁ ୨୦୨୩କୁ ଘୁଞ୍ଚାଇ ଦିଆଯାଇଛି। କରୋନା ଭାଇରସ ସଂକ୍ରମଣ କାରଣରୁ ଟୋକିଓ ଅଲିମ୍ପିକ୍ସକୁ ପୂର୍ବରୁ ୨୦୨୧କୁ ଘୁଞ୍ଚାଇ ଦିଆଯାଇଥିଲା। ତେବେ ଅଲିମ୍ପିକ୍ସ ଓ ଏହି ଯୁବ କ୍ରୀଡ଼ା ଏକା ସମୟରେ ପଡୁଥିବାରୁ ସମସ୍ୟା ସୃଷ୍ଟି ହୋଇଥିଲା। ଏହାକୁ ହୃଦୟଙ୍ଗମ କରି ରାଜ୍ୟଗୋଷ୍ଠୀ କ୍ରୀଡ଼ା ଫେଡେରେଶନ (ସିଜିଏଫ୍) କାର୍ଯ୍ୟନିର୍ବାହୀ ବୋର୍ଡ ଏହାକୁ ଘୁଞ୍ଚାଇବାକୁ ନିଷ୍ପତ୍ତି ନେଇଛି।
କରୋନା ଭାଇରସ କାରଣରୁ ଟୋକିଓ ଅଲିମ୍ପିକ୍ସ ଓ ପାରା ଅଲିମ୍ପିକ୍ସକୁ ଏବେ ୨୦୨୧ ଗ୍ରୀଷ୍ମରେ ଆୟୋଜନ କରାଯିବ। ଯୁବକ୍ରୀଡ଼ା ଠିକ୍ ଏହି ସମୟରେ ଆୟୋଜନ ହେବାର କାର୍ଯ୍ୟକ୍ରମ ରହିଥିଲା। ରାଜ୍ୟଗୋଷ୍ଠୀ ଯୁବ କ୍ରୀଡ଼ାର ଏହି ସପ୍ତମ ସଂସ୍କରଣ ତ୍ରିନିଦାଦ ଓ ଟୋବାଗୋରେ ୨୦୨୧ ଅଗଷ୍ଟ ୧ରୁ ୭ ତାରିଖ ମଧ୍ୟରେ ଆୟୋଜନ ହୋଇଥାନ୍ତା। ତେବେ ୨୦୨୩ରେ ଏହି କ୍ରୀଡ଼ା ଆୟୋଜନ ପାଇଁ ତ୍ରିନିଦାଦ୍ ଓ ଟବାଗୋ ପ୍ରଥମ ପସନ୍ଦ ବୋଲି ସିଜିଏଫ୍ ତରଫରୁ କୁହାଯାଇଛି। ଆଥଲେଟ ଓ ପ୍ରଶଂସକଙ୍କ ବୃହତ୍ତର ସ୍ବାର୍ଥକୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନିଆଯାଇଛି ବୋଲି ସିଜିଏଫ୍ ଅଧ୍ୟକ୍ଷ ଡେମ୍ ଲୋଇସ୍ କହିଛନ୍ତି। କୋଭିଡ-୧୯ କାରଣରୁ ବିଶ୍ୱକ୍ରୀଡ଼ା ସାଂଘାତିକ ଭାବେ ପ୍ରଭାବିତ ହୋଇଛି।
