ଭୁବନେଶ୍ୱର, ୫।୫ (ବ୍ୟୁରୋ)/ କେନ୍ଦ୍ରାପଡ଼ା ଅଫିସ: କରୋନା କଟକଣା ପାଇଁ କେରଳରେ ଫସି ରହିଥିବା କେନ୍ଦ୍ରାପଡ଼ାର ୧ହଜାରରୁ ଊର୍ଦ୍ଧ୍ୱ ମହିଳା ଶ୍ରମିକ ଏବେ ନାନା ନିର୍ଯାତନାର ଶିକାର ହେଉଛନ୍ତି। ଏମାନେ ଏକ କପଡ଼ା କମ୍ପାନୀରେ ଦୁଇଦିନ ହେବ ଭୋକ ଉପାସରେ ପଡ଼ିରହି ବନ୍ଦୀ ଜୀବନ ବିତାଉଛନ୍ତି। କମ୍ପାନୀ କର୍ତ୍ତୃପକ୍ଷ ସେମାନଙ୍କୁ ଓଡ଼ିଶା ଫେରିବାକୁ ନ ଦେଇ ମାଗଣା କାମ କରାଇବା ସହ ଧମକ ଦେଉଛନ୍ତି। ସବୁବେଳେ ଜଗି ରହୁଥିବାରୁ ସେମାନେ ଲୁଚିଛପି ମୋବାଇଲ୍ ଫୋନ୍ରେ ପରିବାର ଲୋକଙ୍କୁ କାନ୍ଦି କାନ୍ଦି ଜଣାଇଛନ୍ତି। ତୁରନ୍ତ ସେମାନଙ୍କୁ ଉଦ୍ଧାର କରିବାକୁ ରାଜ୍ୟ ସରକାରଙ୍କୁ ଗୁହାରି କରିଛନ୍ତି।
ମିିଳିଥିବା ସୂଚନାନୁସାରେ, କେରଳର ଏର୍ନାକୁଲମ୍ ଜିଲା ଅନ୍ତର୍ଗତ କିଝାକ୍କାମ୍ବଲମ୍ ଆଲ୍ଓ୍ବେସ୍ଥିତ କିଟେକ୍ସ ଗାର୍ମେଣ୍ଟ୍ସ କମ୍ପାନୀରେ କେନ୍ଦ୍ରାପଡ଼ା ଜିଲାର ଶହଶହ ମହିଳା ଓ ଯୁବତୀ ଟେଲରିଂ କାର୍ଯ୍ୟ କରନ୍ତି। ଅଧିକାଂଶ ରାଜନଗର ଓ ପଟ୍ଟାମୁଣ୍ଡାଇ ଅଞ୍ଚଳର। ରାଜନଗର ବ୍ଲକ୍ କଣ୍ଡିରା ପଞ୍ଚାୟତର ହଂସୁଆଗୁଳା, ନେଥୁରିଆ, ଜଗନ୍ନାଥପୁର, ବଳରାମପୁର, ଚକମନପୁର, କୁରୁଣ୍ଟି ପଞ୍ଚାୟତର ବାଘୁଆ, ସାତଭାୟା ପଞ୍ଚାୟତ, ପଟ୍ଟାମୁଣ୍ଡାଇ ବ୍ଲକ୍ର ଚନ୍ଦନଗର ଆଦି ଅଞ୍ଚଳର କେତେଜଣ ଯୁବତୀ ଫୋନ୍ ଯୋଗେ ଜଣାଇନ୍ତି ଯେ, କମ୍ପାନୀର ଗେଟ୍ ବନ୍ଦ କରାଯାଇ ଭିତରେ ସେମାନଙ୍କୁ ଟେଲରିଂ ସହ ଘର ଧୋଇବା, ପୋଛିବା ଆଦି ବିଭିନ୍ନ କାର୍ଯ୍ୟରେ ଲଗାଯାଉଛି। ଠିକ୍ ଭାବେ ଖାଇବାକୁ ଦିଆଯାଉନି କି ପାରିଶ୍ରମିକ ବି ମିଳୁନି। ପାଖରେ ପଇସା ନାହିଁ। ଏବେ ମାସକୁ ୧ହଜାର ଟଙ୍କାରେ କାମ କରିବାକୁ ମାଧ୍ୟ କରାଯାଉଛି। କେରଳରୁ ଟ୍ରେନ୍ ଓ ବସ୍ରେ ପ୍ରବାସୀ ଓଡ଼ିଆ ଆସୁଥିବା ଶୁଣିବା ପରେ ସେମାନେ ମଧ୍ୟ କମ୍ପାନୀ କର୍ତ୍ତୃପକ୍ଷ ଓ ଦାୟିତ୍ୱରେ ଥିବା ୟୁନିଟ୍ ହେଡ୍ଙ୍କୁ କହିଲେ କିଛି ଶୁଣୁନାହାନ୍ତି। ଏଠାରୁ ଯାଇପାରିବ ନାହିଁ ବୋଲି କହି ନାନା ଧମକ ଦେଉଛନ୍ତି। ପୋଲିସ ଲଗାଇ ଚାପ ପକାଉଛନ୍ତି। ଭୟ ଓ ଆଶଙ୍କା ମଧ୍ୟରେ ସେମାନେ ଦୁଇଦିନ ହେବ କିଛି ଖାଇନାହାନ୍ତି। ଏଥିସହ ଭିଡିଓ ମାଧ୍ୟମରେ ଉଦ୍ଧାର ପାଇଁ ନିବେଦନ କରିଛନ୍ତି। ଓଡ଼ିଶା ଚାଲିଯିବାକୁ ଇଚ୍ଛା ହେଉଛି, ଗାଁ ଓ ପରିବାର ଲୋକଙ୍କୁ ଦେଖିବାକୁ ଚାହୁଁଛୁ। କିନ୍ତୁ ଏଠାରେ ଆମକୁ ଓଡ଼ିଶା ଫେରିବାକୁ ଦିଆଯାଉନି। ତୁରନ୍ତ ନେଇଯିବାକୁ ପରିବାର ଲୋକଙ୍କୁ କାନ୍ଦି କାନ୍ଦି କହୁଥିବା ଏକ ଭିଡିଓରେ ଦେଖିବାକୁ ମିଳୁଛି।
ତେବେ ଏ ସମ୍ପର୍କରେ କଣ୍ଡିରା ପଞ୍ଚାୟତ ସରପଞ୍ଚ ଦୀପ୍ତିମୟୀ ବେହେରା ରାଜନଗର ବିଡିଓଙ୍କୁ ଜଣାଇଥିବା କହିଛନ୍ତି। ସେହିଭଳି ଫସି ରହିଥିବା କେତେଜଣ ଯୁବତୀ କେରଳ ଦାୟିତ୍ୱରେ ଥିବା ଓଡ଼ିଶା ସରକାରଙ୍କ ନୋଡାଲ ଅଧିକାରୀଙ୍କ ଫୋନ୍ ନଂ.୦୬୭୪୨୩୯୫୫୩୨ରେ ଜଣାଇଥିଲେ। କଲ୍ ରିସିଭ୍ର ଜଣକ ସେଠାକାର ପୋଲିସ ଓ ପ୍ରଶାସନକୁ ଅଭିଯୋଗ କରିବାକୁ କହି ଫୋନ୍ ରଖିଦେଇଥିଲେ। ଏପଟେ ନଜରବନ୍ଦୀରେ ରହିଥିବାରୁ ଓ ମହିଳା ହୋଇଥିବାରୁ ସେଠାକାର ପ୍ରଶାସନକୁ ଜଣାଇବା ସମ୍ଭବ ହୋଇପାରିନି। ଏପରିସ୍ଥଳେ ଜୀବନଜୀବିକା ପାଇଁ କେରଳ ଯାଇଥିବା ସମ୍ପୃକ୍ତା ମହିଳା ଓ ଯୁବତୀଙ୍କୁ ନେଇ ପରିବାର ଲୋକେ ଚିନ୍ତାରେ ରହିଛନ୍ତି। ଜିଲାପାଳ ସମର୍ଥ ବର୍ମା କହିଛନ୍ତି, ଏନେଇ ଜିଲା ପ୍ରଶାସନର ନଜରକୁ ଆସିନି। ଅଭିଯୋଗ ପହଞ୍ଚତ୍ଲେ ତୁରନ୍ତ ଆବଶ୍ୟକ ପଦକ୍ଷେପ ନିଆଯିବ।
