କେନ୍ଦ୍ର ସମତୁଲ ମହଙ୍ଗା ଭତ୍ତା ଦାବି ନେଇ ବିକ୍ଷୋଭ
8:39 amFebruary 20, 2020 / 21

ବ୍ରହ୍ମପୁର ଅଫିସ,୨୦ା୨ – ବ୍ରହ୍ମପୁରସ୍ଥ ଦକ୍ଷିଣାଞ୍ଚଳ ଆରଡିସି ଅଫିସ ଆଗରେ ବୁଧବାର ଓଡ଼ିଶା ସେବା ନିବୃତ୍ତ କର୍ମଚାରୀ ଓ ଶିକ୍ଷକ ବିକାଶ ମଞ୍ଚ ଗଞ୍ଜାମ ଜିଲା ଶାଖା ପକ୍ଷରୁ ବିକ୍ଷୋଭ କରାଯାଇଥିଲା। ଅବସରପ୍ରାପ୍ତ କର୍ମଚାରୀ ଓ ଶିକ୍ଷକଙ୍କୁ କେନ୍ଦ୍ର ସମତୁଲ ମହଙ୍ଗା ଭତ୍ତା ପ୍ରଦାନ ଦାବି ନେଇ ଆନ୍ଦୋଳନ ସୂତ୍ରପାତ ହୋଇଥିଲା। ଦାବି ସମ୍ବଳିତ ସ୍ମାରକପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଆରଡିସିଙ୍କୁ ପ୍ରଦାନ କରାଯାଇଥିଲା। ରାଜ୍ୟ ସମ୍ପାଦକ ଶ୍ୟାମ ସୁନ୍ଦର ଖାଡ଼ଙ୍ଗା, ଜିଲା ସଭାପତି ରଜନୀକାନ୍ତ ମଣ୍ଡଳ, କାର୍ଯ୍ୟକାରୀ ସଭାପତି ପ୍ରଦୀପ କୁମାର ସାହୁ ଓ ସମ୍ପାଦକ ରାଜେନ୍ଦ୍ର କୁମାର ପଣ୍ଡା ନେତୃତ୍ୱ ନେଇଥିବା ବେଳେ ଅନେକ ପେନସନଭୋଗୀ ଏଥିରେ ସାମିଲ ହୋଇଥିଲେ।
ଆନ୍ଦୋଳନ ସ୍ଥଳରେ ମଞ୍ଚ ନେତାଙ୍କ କହିବାନୁସାରେ, କେନ୍ଦ୍ର ସରକାର ଗତବର୍ଷ ଜୁଲାଇରେ ୫% ମହଙ୍ଗା ଭତ୍ତା ବୃଦ୍ଧି ଘୋଷଣା କରିଥିବା ବେଳେ ରାଜ୍ୟ ସରକାର କର୍ମଚାରୀ ଓ ପେନସନ ଭୋଗୀଙ୍କ ପାଇଁ ଗତ ଜାନୁୟାରୀରୁ କାର୍ଯ୍ୟକାରୀ କରିଛନ୍ତି। ଫଳରେ ରାଜ୍ୟର କର୍ମଚାରୀ ଏବଂ ପେନସନ ଭୋଗୀ ୬ ମାସର ବର୍ଦ୍ଧିତ ମହଙ୍ଗା ଭତ୍ତା ପାଇନାହାନ୍ତି। ବକେୟା ପ୍ରାପ୍ୟ ଅବିଳମ୍ବେ ଦେବା ପାଇଁ ଦାବି କରାଯାଇଛି। ଓଡ଼ିଶା ପାଇପ ଜଳ କର୍ମଚାରୀ ସଂଘ ସ୍ଥାନୀୟ ଶାଖା ପକ୍ଷରୁ ମଧ୍ୟ ଅନୁରୂପ ଦାବି କରାଯାଇ ମଞ୍ଚ ଆନ୍ଦୋଳନରେ ସାମିଲ ହୋଇଥିଲା।
କେନ୍ଦ୍ର ସରକାରୀ କର୍ମଚାରୀ ଓ ପେନସନ ଭୋଗୀଙ୍କ ଭଳି ରାଜ୍ୟ ସରକାର ପେନସନ ଭୋଗୀଙ୍କୁ ମାସିକ ହଜାରେ ଟଙ୍କା ମେଡିକାଲ ଆଲାଉନ୍ସ ଦେବା ଏବଂ ସର୍ବନିମ୍ନ ପେନସନ ମାସିକ ୯ ହଜାର ଟଙ୍କା ଧାର୍ଯ୍ୟ କରିବାକୁ ମଞ୍ଚ ଦାବି କରିଛି। ଉପରୋକ୍ତ ଦାବିଗୁଡ଼ିକ ତୁରନ୍ତ ପୂରଣ କରା ନ ଗଲେ ମଞ୍ଚ ଆନ୍ଦୋଳନକୁ ଓହ୍ଲାଇବାର ସ୍ମାରକପତ୍ରରେ ସ୍ପଷ୍ଟ କରି ଦିଆଯାଇଛି।