ତିର୍ତ୍ତୋଲ,୨୫ା୬(ଡି.ଏନ.ଏ.): ତିର୍ତ୍ତୋଲ ବ୍ଲକ ତେନ୍ତୁଳିପଦା ପଞ୍ଚାୟତର ଶାରଳାରୋଡ ବଜାର ଶେଷମୁଣ୍ଡରେ କେନାଲ ଅବରୋଧ କରି ଜଣେ ବ୍ୟକ୍ତି ସ୍ଥାୟୀ ଗୃହ ନିର୍ମାଣ କରୁଥିବା ଅଭିଯୋଗ ହୋଇଛି। ସ୍ଥାନୀୟ ବାଇଁଗୋଳ ଓ ତେନ୍ତୁଳିପଦା ରାଜସ୍ବ ଗ୍ରାମର ଚାଷଜମିକୁ ଏହି କେନାଲ ଦ୍ୱାରା ଜଳସେଚନ ସୁବିଧା ହୋଇଥାଏ। ତେଣୁ କେନାଲ ଅବରୋଧକୁ ବିରୋଧ କରି ଏହି ଗ୍ରାମର ଚାଷୀମାନେ ସୋମବାର ତହସିଲ କାର୍ଯ୍ୟାଳୟ ଆଗରେ ପ୍ରତିବାଦ ପ୍ରଦର୍ଶନ କରିଛନ୍ତି। ବାଇଁଗୋଳ, ତେନ୍ତୁଳିପଦା ଓ ରଥିପୁର ଗ୍ରାମର ଚାଷୀମାନଙ୍କ ତରଫରୁ ପୂର୍ବରୁ ଏନେଇ ତହସିଲଦାରଙ୍କୁ ଅଭିଯୋଗପତ୍ର ଦିଆଯାଇଥିଲା। ଏହି କେନାଲ ଦ୍ୱାରା ୨୦୦ ପରିବାରର ୫୦୦ ଏକର ଚାଷଜମିକୁ ନିରବିଚ୍ଛିନ୍ନ ଜଳସେଚନ ସୁବିଧା ହେଉଥିବାରୁ ସ୍ଥାୟୀ ନିର୍ମାଣ ବନ୍ଦ ପାଇଁ ଏଥିରେ ନିବେଦନ କରାଯାଇଥିଲା। ପରେ ତହସିଲ ପ୍ରଶାସନ ପକ୍ଷରୁ ସେଠାରେ ୧୪୪ ଧାରା ଜାରି କରାଯାଇଥିଲା। ତେଣୁ ସମ୍ପୃକ୍ତ ବ୍ୟକ୍ତି ନିର୍ମାଣ କାର୍ଯ୍ୟ ବନ୍ଦ କରିଥିଲେ। କିନ୍ତୁ ୧୪୪ ଧାରା ଉଠିଯିବା ପରେ ସମ୍ପୃକ୍ତ ବ୍ରକ୍ତି ପୁଣି ସ୍ଥାୟୀ ନିର୍ମାଣ କାର୍ଯ୍ୟ ଆରମ୍ଭ କରିଛନ୍ତି। ଏ ସମ୍ପର୍କରେ ବାଇଁଗୋଳ ଗ୍ରାମର ଚାଷୀମାନେ ତହସିଲଦାର ସୁଜାତା ପାତ୍ରଙ୍କୁ ଭେଟି ଅଭିଯୋଗପତ୍ର ଦେଇଛନ୍ତି। ସମ୍ପୃକ୍ତ ବ୍ୟକ୍ତି ନିର୍ମାଣ କରୁଥିବା ପ୍ଲଟର ପଛପଟେ ଥିବା ୧୯୨୬ ନମ୍ବର ପ୍ଲଟର କିଛି ଅଂଶକୁ ମଧ୍ୟ ସେ ଜବରଦଖଲ କରି ନିର୍ମାଣ କରୁଥିବା ଅଭିଯୋଗ ହୋଇଛି। ଏସବୁର ସୀମା ନିର୍ଦ୍ଧାରଣ ପର୍ଯ୍ୟନ୍ତ ନିର୍ମାଣ କାର୍ଯ୍ୟ ବନ୍ଦ କରିଦାକୁ ନିର୍ଦ୍ଦେଶ ଦେବା ପାଇଁ ସେମାନେ ଦାବି କରିଛନ୍ତି। ପରେ ଚାଷୀମାନେ ଜଗତସିଂହପୁର ଉପଜିଲାପାଳଙ୍କୁ ଭେଟି ଅଭିଯୋଗ ଜଣାଇଛନ୍ତି। ଉପଜିଲାପାଳ ସୀମା ନିର୍ଦ୍ଧାରଣ କରିବା ପାଇଁ ତିର୍ତ୍ତୋଲ ତହସିଲ କାର୍ଯ୍ୟାଳୟକୁ ନିର୍ଦ୍ଦେଶ ଦେଇଥିବା ଜଣାପଡିଛି।
