ଭୁବନେଶ୍ୱର, ୧୭।୩(ବ୍ୟୁରୋ): କୁକୁଡ଼ା ମାଂସ ଖାଇଲେ କରୋନା ହେବ ଏକଥା ମିଛ ପ୍ରମାଣିତ ହୋଇ ସାରିଛି। ଏହାର କୌଣସି ବୈଜ୍ଞାନିକ ଆଧାର ନାହିଁ । ହେଲେ ଏହି ଗୁଜବ କାରଣରୁ କୁକୁଡା ମାଂସ କେତେକ ଲୋକ ଖାଉ ନାହାନ୍ତି। ଏହା ଦ୍ୱାରା ମାଂସ ବିକ୍ରି ଅହେତୁକ ହ୍ରାସ ପାଇଛି। ଏହାର ସିଧାସଳଖ ପ୍ରଭାବି କୁକୁଡା ଚାଷୀଙ୍କ ଉପରେ ପଡିଛି। ଏହି ଗୁଜବକୁ ଯେପରି ଭାବେ ପ୍ରତିହତ କରିବା କଥା, ତାହା ରାଜ୍ୟ ସରକାରଙ୍କ ପକ୍ଷରୁ କରାଯାଇ ନ ଥିବା ଭାଜପା ପକ୍ଷରୁ କୁହାଯାଇଛି। ଦଳର କୃଷକ ମୋର୍ଚ୍ଚା ସାଧାରଣ ସମ୍ପାଦକ ସୁରଥ ବିଶ୍ୱାଳ କହିଛନ୍ତି ଯେ, ରାଜ୍ୟର କୁକୁଡା ଚାଷୀ ଦେବାଳିଆ ପରିସ୍ଥିତିକୁ ଆସିଲେଣି। ପୂର୍ବରୁ କୁକୁଡା ମାଂସ ପାଇଁ ମଧ୍ୟ ଆମେ ପଡୋଶୀ ରାଜ୍ୟ ଉପରେ ନିର୍ଭର କରୁଥିଲେ। ଏବେ ଅନେକାଂଶରେ ଆତ୍ମ ନିର୍ଭରଶୀଳ ହୋଇଛେ। ଏହା ଓଡ଼ିଆ କୁକୁଡା ଚାଷୀଙ୍କ ଯୋଗୁ ସମ୍ଭବ ହୋଇଛି। ତେଣୁ ଏଥିପ୍ରତି ସରକାର ଦୃଷ୍ଟି ଦିଅନ୍ତୁ ବୋଲି ସୁରଥ କହିଛନ୍ତି। ରାଜ୍ୟରେ ୩୦ଲକ୍ଷ ଲୋକ ପ୍ରତ୍ୟେକ୍ଷ ଏବଂ ପରୋକ୍ଷ ଭାବେ କୁକୁଡା ଚାଷ ଉପରେ ନିର୍ଭରଶୀଳ । ଫନୀ ପରେ ରାଜ୍ୟରେ ବ୍ୟାପକ ଭାବରେ କୁକୁଡା ଚାଷ କ୍ଷତିଗ୍ରସ୍ତ ହୋଇଥିଲା । ହେଲେ ଚାଷୀମାନଙ୍କୁ ସମ୍ପୃର୍ଣ୍ଣ କ୍ଷତିପୂରଣ ମିଳି ନାହିଁ। ତେଣୁ ଫନୀ ଏବଂ କରୋନା ଗୁଜବ ଦ୍ୱାରା କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ମିଳୁ ବୋଲି ଭାଜପା ପକ୍ଷରୁ ଦାବି କରାଯାଇଛି।
