କୋକସରା/ବେହେରା, ୧୨ା୫ (ଡି.ଏନ୍.ଏ): କଳାହାଣ୍ଡି ଜିଲା କୋକସରା ବ୍ଲକ ଖୁଣ୍ଟିଆ ପଁଚେତ୍ ଖୁଣ୍ଟିଅ ଗାଁର କ୍ଷୀରସିନ୍ଧୁ ଦୁର୍ଗା(୫୩)। ସେ ଆଏଜ୍କେ ବଛ୍ରେ ହେଲା କିଡ଼୍ନୀ ରୋଗ୍ରେ ପୀଡ଼ିତ ଅଛନ୍। ଘରେ ଯାହା ଥିଲା ଚିକିତ୍ସାରେ ଖରଚ୍ କରି ସେ ସରବ୍ସୁଆଁତ୍ ହେଇଛନ୍। ଏହେଦେ ଟଁକା ପଏସା ଅଭାବୁ ଚିକିସତ୍ିତ ନାଇଁ ହେଇପାରି ଭଗବାନ ଭରସାରେ ଘରେ ପଡ଼ିରହିଛନ୍। ଏନ୍ତାଥି ସେ ସରକାରୀ ସୁବିଧା ସୁଯୋଗରୁ ବଁଚିତ୍ ହେଇଥିବାର ଅଭିଯୋଗ ହେଇଛେ।
ସୂଚନା ହିସାବେ, କୋକସରା ବ୍ଲକ ଖୁଣ୍ଟିଆ ଗାଁର କ୍ଷୀରସିନ୍ଧୁ ଦୁର୍ଗା ଝନେ ନିହାତି ଗରିବ୍ ଲୋକ। ଅନେକ ଦିନ୍ ହେଲା ମାଏକିନା ଆରପାରକେ ଚାଲିଯାଇଛନ୍, ଏହେଦେ ଗୁଟେ ବଲି ଝି’ ଯାଜ୍ଞସେନୀ କ୍ଷୀରସିନ୍ଧୁକଁର ସାହାଭରସା। ଗଲା ବଛ୍ରେ ତଲେ କ୍ଷୀରସିନ୍ଧୁକଁର ପେଟ୍ ଦରଦ୍ ହେଲାରୁ ସେ ଧର୍ମଗଡ଼ ଡାକ୍ତରଖାନାରେ ଦେଖେଇଥିଲେ। ସେଠାନେ ଡାକ୍ତର ପରୀକ୍ଷା ନିରୀକ୍ଷା କରବାର ଲାଗି ଭବାନୀପାଟଣା ଜିଲା ମୁଖିଆ ଡାକ୍ତରଖାନାକେ ପଠେଇଥିଲେ। ଜିଲା ମୁଖିଆ ଚିକିତ୍ସାଲୟରେ ପରୀକ୍ଷାରୁ ଜନାପଡ଼ଲା ଯେ କିଡ଼୍ନୀରେ ସଂକ୍ରମଣ ଲାଗି କ୍ଷୀରସିନ୍ଧୁକଁର ଦିହିପା ଖରାପ ରହୁଛେ। ଡାକ୍ତର କ୍ଷୀରସିନ୍ଧୁକୁଁ ବୁର୍ଲା ବଡ଼ ଡାକ୍ତରଖାନାରେ ଡାଇଲିସିସ୍ କରବାକେ ପରାମଶ ଦେଇଥିଲେ। ହେଲେ ଟଁକା ପଏସା ଅଭାବୁ ବାପ୍ ଝି’ ମୁହୁଁକାନ୍ ଶୁଖେଇ ଘରକେ ଫିରିଆଏଲେ। ସେ ଦିନ୍ଠାନୁ କ୍ଷୀରସିନ୍ଧୁ ଘରେ ପଡ଼ି ରୋଗ୍ରେ ଛଟ୍ପଟ ହେଉଛନ୍। ବାପାର ଇ ଅବସ୍ତା ଦେଖି ଝି’ ଯାଜ୍ଞସେନୀ ଦୁଖେ ଭାଂଗିପଡ଼ିଛନ୍। ସେ ବାପାର ଚିକିତ୍ସା ଲାଗି କାହାକେ କହେବେ, କିଏ ସାହାଯ୍ କରବା ଏନ୍ତା ସବୁ ଚିନ୍ତାରେ ହରମେଶା ଘାରି ହେଉଛନ୍। ଏନ୍ତାଥି ବେହେରା କଲେଜରେ ଯୁକ୍ତ ଦୁଇ ପଢ଼ୁଥିବାର ଯାଜ୍ଞସେନୀ ପାଠ୍ପଢ଼ାରେ ଗଁଠି ପକେଇଛନ୍। ଘରେ ଯାହା ଟିକେରଁଚେ ଥିଲା ବାପର ଚିକିତ୍ସାରେ ଖରଚ୍ ହେଇଛେ। ଏହେଦେ ବାପାର ଉଷୋକଷା ଲାଗି ଯାଜ୍ଞସେନୀ ବାରଦୁଆର ହେଉଛନ୍। ସରକାରୀ ସାହାଯ୍ କହେଲେ ପରିବାରକେ ମିଲିଥିବାର ରାଶନ କାର୍ଡ ଖଁଡ଼କ ସାହାଭରସା। ରୋଗ୍ରେ ପଡ଼ି ଛଟପଟ ହେଉଥିବାର କ୍ଷୀରସିନ୍ଧୁ ନିଜର ଭାଏଗ୍କେ ଆଦ୍ରି ରହିଥିଲାବେଲେ ଝି’ ଯାଜ୍ଞସେନୀ ବାପର ସେବା ଯତନ୍ କରି ନିଜର ଦାଇତିଅ ତୁଲଉଛନ୍। ହେଲେ ଆଏଜ୍ତକ୍ ଇ ଦୁଖି ପରିବାର ଉପରେ ଥାନୀୟ ପରଶାସନର ଦୁରୁଷ୍ଟି ନାଇଁ ପଡ଼ିପାରି। ଇଆଡ଼େ ଯାଜ୍ଞସେନୀ ବାପାର ଚିକିତ୍ସା ଲାଗି ସହୁରୁଦ ଲୋକ୍ମାନକୁ ସହଯୋଗର ହାତ୍ ବଢ଼ାକେ ଗଣମାଧ୍ୟମ ଜରିଆରେ ନିବେଦନ କରିଛନ୍ ଆର ଯେ ସାହାଯ୍ କରବାକେ ଚାହୁଁଛନ୍ ମୋବାଇଲ ନଂ. ୭୮୯୪୮୩୩୬୭୬ରେ ଯୋଗାଯୋଗ୍ କରବାକେ ଅନୁରୋଧ୍ କରିଛନ୍। ଇ ବାବ୍ଦେ କୋକସରା ବିଡିଓ ବସନ୍ତ କୁମାର ସେଠୀକୁଁ ପଚରାଲାରୁ ଘଟନା ବାବ୍ଦେ ମୋର ପାସେ ଖବର ନାଇଁଥାଇ। ବହୁତ୍ ଜଲଦି ଗୁଟେ ଡାକ୍ତରି ଦଲ ପଠେଇ ତାକର ଚିକିତ୍ସା ବେବସ୍ତା କରାଯିବା। ଦରକାର ପଡ଼ଲେ ତାହାକୁ ବୁର୍ଲା ପଠାବାର ବେବସ୍ତା କରାଯିବା ବଲି ସେ ପରତିଶୁରତି ଦେଇଥିଲେ।
