କଣ୍ଟାପଡ଼ା, ୧୪।୪(ଡି.ଏନ୍.ଏ.): ମହାମାରୀ କରୋନା ସମଗ୍ର ବିଶ୍ୱରେ କାୟା ବିସ୍ତାର କରିବାରେ ଲାଗିଛି। ଏଥିରୁ ରକ୍ଷା ପାଇବା ପାଇଁ କେନ୍ଦ୍ର ସରକାରଙ୍କଠାରୁ ଆରମ୍ଭ କରି ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ଏ ନେଇ କେନ୍ଦ୍ର ସରକାର ଏପ୍ରିଲ ୧୪ ତାରିଖ ପର୍ଯ୍ୟନ୍ତ ଲକ୍ଡାଉନ ଘୋଷଣା କରିଥିଲେ। ଏବେ ମେ’ ୩ ତାରିଖ ପର୍ଯ୍ୟନ୍ତ ଦେଶରେ ଲକ୍ଡାଉନ ବଳବତ୍ତର ରହିବ ବୋଲି ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିଛନ୍ତି।
ତେବେ ଲକ୍ଡାଉନ ହଟିବାପରେ ଦିବ୍ୟାଙ୍ଗ ଚିକିତ୍ସା ଓ ଗବେଷଣା ପାଇଁ କଟକ ଜିଲା ଓଲଟପୁରସ୍ଥିତ ଏସ୍ଭି ନିରତାରରେ କରୋନା ସଂକ୍ରମଣ ନିରୋଧ ନିମନ୍ତେ ସୋମବାର ଏକ ସ୍ବତନ୍ତ୍ର କମିଟି ଗଠନ କରାଯାଇଛି। କମିଟିର ଚେୟାରମ୍ୟାନ ଭାବେ ଅନୁଷ୍ଠାନର ନିର୍ଦ୍ଦେଶକ ଡାକ୍ତର ଶକ୍ତିପ୍ରସାଦ ଦାସ ରହିଥିବାବେଳେ ଡ. ପବିତ୍ର ସାହୁ ସଂକ୍ରମଣ ନିୟନ୍ତ୍ରକ, ଡ. କିଶୋର ମହାପାତ୍ର ଅସ୍ତ୍ରୋପଚାର ବିଭାଗ ପରିଚାଳନା ଦାୟିତ୍ୱରେ ରହିଛନ୍ତି। ସେହିପରି ପ୍ରଶାସନିକ ଉପନିର୍ଦ୍ଦେଶକ ରଶ୍ମିରଞ୍ଜନ ସେଠୀ ପ୍ରଶାସନିକ ପରିଚାଳନା ଓ ଡ. ଦୀପକ ସିଂ, ଡ. କେ.ଏସ୍. ରାଓ ଓ ଇଂ. ସତ୍ୟଜିତ ପଟ୍ଟନାୟକଙ୍କୁ ଅନ୍ୟାନ୍ୟ ଦାୟିତ୍ୱ ପ୍ରଦାନ କରାଯାଇଛି। ସହକାରୀ ମାର୍ଟନ ହେମନ୍ତ ମଞ୍ଜରୀ ଦେଇଙ୍କୁ ମହିଳା ୱାର୍ଡର ସଂକ୍ରମଣ ନିରୋଧ ଦାୟିତ୍ୱ ପ୍ରଦାନ କରାଯାଇଛି। ଲକ୍ଡାଉନ ହଟିବାପରେ ନିରତାରରେ ଦିବ୍ୟାଙ୍ଗଙ୍କ ଚିକିତ୍ସା ପାଇଁ ଭିଡଲାଗିବା ସମ୍ଭାବନାକୁ ଦୃଷ୍ଟିରେ ରଖି ନିରତାର ପରିସରକୁ ସଂକ୍ରମଣ ମୁକ୍ତ ରଖିବା ପାଇଁ ଉକ୍ତ କମିଟି ଗୁରୁତ୍ୱ ଦେବ ବୋଲି କମିଟିର ମୁଖ୍ୟ ଡା. ଦାସ କହିଛନ୍ତି।
ସୂଚନାଯୋଗ୍ୟ, ନିରତାରରେ କେବଳ ଜରୁରୀ ଚିକିତ୍ସା ଚାଲୁଥିବାବେଳେ ଚିକିତ୍ସାଧୀନ ଅନ୍ତେବାସୀ ଦିବ୍ୟାଙ୍ଗଙ୍କୁ ଘରକୁ ପଠାଇ ଦିଆଯାଇଛି। ସେହିପରି ୫୦ଭାଗ କର୍ମଚାରୀଙ୍କୁ ଛୁଟି ଦିଆଯାଇଥିବାବେଳେ ନିରତାର ଶିକ୍ଷାନୁଷ୍ଠାନ, ଛାତ୍ରୀ ଓ ଛାତ୍ରାବାସ ଖାଲି କରି ଦିଆଯାଇଛି।
