ପୁରୀ ଅଫିସ,୧୯।୪: କରୋନା ଟାଣିଛି ଲକ୍ଷ୍ମଣ ରେଖା। ସିଂହଦ୍ୱାର ଡେଇଁ ଶ୍ରୀମନ୍ଦିରକୁ ଯାଇପାରୁନାହାନ୍ତି ଭକ୍ତ। ଗତ ମାସ ୨୦ ତାରିଖରୁ ଭକ୍ତଙ୍କ ଦର୍ଶନ ବନ୍ଦ ରହିଛି। କେବଳ ସେବାୟତମାନେ ମନ୍ଦିରକୁ ଯାଇ ମହାପ୍ରଭୁଙ୍କ ନୀତିକାନ୍ତି ସମ୍ପାଦନ କରୁଛନ୍ତି। ଇତିମଧ୍ୟରେ ପ୍ରାୟ ୩୦ ଦିନ ବିତିଗଲାଣି। କାଳିଆ ଠାକୁରଙ୍କୁ ଦର୍ଶନ ନ କରି ଅନେକ ଭକ୍ତ ବ୍ୟାକୁଳ ହୋଇପଡ଼ିିଲେଣି। ଯେଉଁମାନେ ପ୍ରତ୍ୟହ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଥାନ୍ତି ସେମାନେ ଅଧିକ ବ୍ୟତିବ୍ୟସ୍ତ ହେଉଛନ୍ତି। କେବେ ସେମାନଙ୍କୁ ମିଳିବ ଅନୁମତି ତାହାକୁ ଚାହିଁ ଦିନ ଗଣୁଛନ୍ତି। ଏ ନେଇ ଦିଲୀପ ବରାଳ ନାମକ ଭକ୍ତ ଜିଲାପାଳଙ୍କୁ ଅନୁରୋଧପତ୍ର ଲେଖିଛନ୍ତି।
କରୋନାର ଭୟାବହତା ଯୋଗୁ ଜିଲା ପ୍ରଶାସନ ପକ୍ଷରୁ ଗତ ମାର୍ଚ୍ଚ ୨୦ରୁ ଶ୍ରୀମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ କରାଯାଇଥିଲା। ପୁନଶ୍ଚ ମୁଖ୍ୟମନ୍ତ୍ରୀ ଏପ୍ରିଲ ୩୦ ପର୍ଯ୍ୟନ୍ତ ଲକ୍ଡାଉନ ଅବଧି ବୃଦ୍ଧି କରିଥିବା ବେଳେ ପରେ ପ୍ରଧାନମନ୍ତ୍ରୀ ମେ ୩ ତାରିଖ ଯାଏ ଦେଶବ୍ୟାପୀ ଲକ୍ଡାଉନ ରହିବ ବୋଲି ଘୋଷଣା କରିଛନ୍ତି। ତେଣୁ ଏହାକୁ ଦେଖିଲେ ମେ ୩ ପୂର୍ବରୁ ଶ୍ରୀମନ୍ଦିରକୁ ଭକ୍ତ ପ୍ରବେଶ କରିପାରିବେ ନାହିଁ। ଏଥିଯୋଗୁ ପ୍ରାୟ ସବୁଦିନ ମନ୍ଦିର ଯାଉଥିବା ଭକ୍ତ ବ୍ୟାକୁଳ ହୋଇପଡ଼ିଲେଣି। ବର୍ତ୍ତମାନ ବି କିଛି ଶ୍ରଦ୍ଧାଳୁ ସକାଳେ ହେଉ ଅବା ସନ୍ଧ୍ୟାରେ ସିଂହଦ୍ୱାର ନିକଟକୁ ଯାଇ ବାହାରୁ ପତିତପାବନଙ୍କୁ ଦର୍ଶନ କରି ମୁଣ୍ଡିଆ ମାରୁଛନ୍ତି। ତେବେ ପ୍ରତ୍ୟହ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରୁଥିବା ଭକ୍ତ ଦିଲୀପ ଜିଲାପାଳଙ୍କୁ ଏ ନେଇ ଗୁହାରି କରିଛନ୍ତି। ସେ ତାଙ୍କ ପତ୍ରରେ ଦର୍ଶାଇଛନ୍ତି ଯେ, ସେ ୨୦୦୩ ମସିହାରୁ ପ୍ରାୟ ପ୍ରତିଦିନ ରାତିରେ ମହାପ୍ରଭୁଙ୍କୁ ଦର୍ଶନ କରିଥାନ୍ତି। ମାତ୍ର ୨୦ତାରିଖ କଟକଣା ପରଠାରୁ ସେ ଏଥିରୁ ବଞ୍ଚତ୍ତ ରହି ମାନସିକ ଯନ୍ତ୍ରଣା ପାଉଛନ୍ତି। କିନ୍ତୁ ଏବେ ସେବାୟତ ପରିବାରର ଅନ୍ୟ ସଦସ୍ୟ ମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରୁଥିବା ସେ ଶୁଣିବାକୁ ପାଉଛନ୍ତି। ତେଣୁ ତାଙ୍କୁ ମଧ୍ୟ ଦର୍ଶନର ସୁଯୋଗ ମିଳୁ ବୋଲି ସେ ଅନୁରୋଧ କରିଛନ୍ତି। କେବଳ ଦିଲୀପ ନୁହନ୍ତି, ଏମିତି ଅନେକ ଭକ୍ତ ଦର୍ଶନ ପାଇଁ ଯାଇପାରୁ ନ ଥିବାରୁ ମନ ଦୁଃଖରେ ରହିଛନ୍ତି।
