ପାରାଦୀପ,୪ା୭(ସ୍ବ.ପ୍ର.): ସମୁଦ୍ରରୁ ଉତ୍ପାଦିତ ମାଛକୁ ଏ, ବି, ସି, ଡି ଭଳି ଗ୍ରେଡ୍ କରାଯାଇ ବିକ୍ରୟ କରାଯାଏ। ଏ ଓ ବି ଗ୍ରେଡ୍ ମାଛ ବିଦେଶକୁ ରପ୍ତାନୀ ହେଉଥିବାବେଳେ ସି ଓ ଡି ଗ୍ରେଡ ମାଛକୁ ସ୍ଥାନୀୟ ବଜାରରେ ବିକ୍ରି କରାଯାଏ। ଏହି ପ୍ରକାରର ଅଧିକାଂଶ ମାଛକୁ ଶୁଖୁଆ କରାଯାଏ। ପୁରୁଣା ପଦ୍ଧତି ଅନୁସାରେ ହେଉଥିବା ଶୁଖୁଆ ମଣିଷ ଶରୀର ପାଇଁ ସେତେ କ୍ଷତିକାରକ ନ ଥିଲା। କିନ୍ତୁ ଏବେ ଗତ ୧୦ ବର୍ଷ ହେଲା ଶୁଖୁଆରେ ମିଶିଯାଉଛି ଫର୍ମାଲିନ୍ ନାମକ କେମିକାଲ, ଯାହା ମଣିଷ ଶରୀର ପାଇଁ ଅତ୍ୟନ୍ତ ହାନିକାରକ ହୋଇଥିଲେ ହେଁ ସେଥିପ୍ରତି କାହାର ଭ୍ରୂକ୍ଷେପ ନାହିଁ। ଏନେଇ ବହୁବାର କଟକଣା ଜାରି କରାଯାଇଥିଲେ ମଧ୍ୟ ଏହାର ବ୍ୟବହାର ବନ୍ଦ ହେଉନାହିଁ। ରାଜ୍ୟର ଅନ୍ୟତମ ବୃହତ୍ ପାରାଦୀପ ମାଛଧରା ବନ୍ଦରରେ ଏବେ ଏହି ରାସାୟନିକ ପଦାର୍ଥ ବହୁଳ ପରିମାଣରେ ମିଶ୍ରଣ କରାଯାଉଥିବା ଦେଖିବାକୁ ମିଳୁଛି। ବର୍ତ୍ତମାନ ବର୍ଷାଋତୁ ଆରମ୍ଭ ହେବା ପରେ ଫର୍ମାଲିନ୍ର ବ୍ୟବହାର ଅଧିକ ମାତ୍ରାରେ ଚାଲିଛି। କାରଣ ବର୍ଷାରେ ମାଛକୁ ଶୁଖାଇବା ସହଜ ନୁହେଁ। ତେଣୁ ଶୁଖୁଆ ତିଆରି ହେଉଥିବା ଲୁଣି ପାଣି ଟାଙ୍କିରେ ଫର୍ମାଲିନ୍ କେମିକାଲ ପକାଇ ଦେଲେ ଶୀଘ୍ର ଶୁଖୁଆ ପ୍ରସ୍ତୁତ ହୋଇଯାଉଛି। ମାଛଧରା ବନ୍ଦର ବ୍ୟତୀତ ଅଠରବାଙ୍କୀ ଶୁଖୁଆ ଖଳାରେ ମଧ୍ୟ ସେହି କେମିକାଲ ବ୍ୟବହାର ହେଉଛି। ଏହି ଫର୍ମାଲିନକୁ ମତ୍ସ୍ୟ ବିଭାଗ ନିଷିଦ୍ଧ ଘୋଷଣା କରିଥିଲା। ଏପରି କି ବେଳେ ବେଳେ ପ୍ରଚାର ମାଧ୍ୟମରେ ମତ୍ସ୍ୟଜୀବୀଙ୍କୁ ସଚେତନ କରାଯାଏ। ଏଥିସହ କାରଖାନାରେ ସମ୍ପୃକ୍ତ ବ୍ୟବସାୟୀ, ସଂଘ, ସମିତି, ଆମଦାନୀ-ରପ୍ତାନୀକାରୀ ସଂସ୍ଥା ଆଦିଙ୍କୁ ପ୍ରତିବର୍ଷ ଚିଠି ଯୋଗେ ଅବଗତ କରାଯାଉଛି ବୋଲି ମତ୍ସ୍ୟ ଅଧିକାରୀ (ସାମୁଦ୍ରିକ) ମଧୁମୟ ସାମଲ କହିଛନ୍ତି। ଏହାସତ୍ତ୍ୱେ ଫର୍ମାଲିନ ମିଶ୍ରଣ ଚାଲିଛି। ସୂଚନାଯୋଗ୍ୟ, ଫର୍ମାଲିନ୍ କେମିକାଲ ପ୍ରାୟତଃ ପ୍ଲାଷ୍ଟିକ ଓ ଚମଡ଼ା ଶିଳ୍ପରେ ବ୍ୟବହୃତ ହୁଏ। ଏଥିସହ ମୃତଦେହ ଅଧିକ ଦିନ ସଂରକ୍ଷଣ ପାଇଁ ପୋଲିସ ଓ ତଦନ୍ତକାରୀ ସଂସ୍ଥା ବ୍ୟବହାର କରିଥାନ୍ତି। ଏହି କେମିକାଲ ମାଛରେ ମିଶିବା ଦ୍ୱାରା ତାହା ଶୀଘ୍ର ଶୁଖିଥାଏ ଏବଂ ପଚେ ନାହିଁ। ବର୍ଷାଦିନେ ମାଛ ପଚି ଶଢ଼ି ଯିବାର ସମ୍ଭାବନା ଅଧିକ। ସେତେବେଳେ କେମିକାଲ ମିଶାଇ ଦେଲେ ଆଉ ନଷ୍ଟ ହୁଏ ନାହିଁ। କେମିକାଲ ମିଶା ଶୁଖଆ ମଣିଷ ଖାଇଲେ ତାହା ଶରୀରରେ କର୍କଟ ଭଳି ମାରାତ୍ମକ ରୋଗ ସୃଷ୍ଟି କରିବାର ଆଶଙ୍କା ଅଛି ବୋଲି କୁହନ୍ତି ଡା. ପ୍ରଫୁଲ କୁମାର ଦୀକ୍ଷିତ। ଏସବୁ କେମିକାଲକୁ ବ୍ୟବସାୟୀମାନେ ପ୍ରାୟତଃ କଲିକତାରୁ ବସ୍ ଯୋଗେ ଆଣି ବିକ୍ରୟ କରିଥାନ୍ତି। ଯଦିଓ କେତେଥର ପୋଲିସ ଏହି କେମିକାଲ ଜବତ କରିଛି, ତେବେ ପରେ ମୂଲଚାଲ ନୀତିରେ ଛାଡ଼ିଦେଇଥିବା ଅଭିଯୋଗ ହେଉଛି। ତେଣୁ ଏବେ ଅବକାରୀ ବିଭାଗ ଭଳି ପୋଲିସର ମାସିକିଆ ଚାନ୍ଦା ତାଲିକାରେ ବ୍ୟବସାୟୀମାନେ ରହିଲେଣି ବୋଲି ଚର୍ଚ୍ଚା ହୁଏ। ଏପରି କି ଏକଦା ପାରାଦୀପରୁ କେରଳ ଯାଇଥିବା ୩ ଟ୍ରକ୍ ଶୁଖୁଆକୁ ସେଠାକାର ଡ୍ରଗ୍ସ ବିଭାଗ ଜବତ କରିବା ସହ ମାମଲା ରୁଜୁ କରିଥିଲା। ଶୁଖୁଆ ଖଳାର ଜଣେ ବ୍ୟବସାୟୀ ଏହି କାରଣ ପାଇଁ ଦେବାଳିଆ ହୋଇଛନ୍ତି। ଏମିତି ଅନେକ ଘଟଣା ଘଟିଥିଲେ ମଧ୍ୟ ବ୍ୟବସ୍ଥାରେ ପରିବର୍ତ୍ତନ ହେଉନାହିଁ। ଏ ସମ୍ପର୍କରେ ଫୁଡ୍ ଇନ୍ସପେକ୍ଟର ଅନିତା ରାଉତ କହିଛନ୍ତି ଯେ, ଗତବର୍ଷ ଡିସେମ୍ବରରେ ଆମେ ଶୁଖୁଆ ନମୂନା ସଂଗ୍ରହ କରିଥିଲୁ। ସେତେବେଳେ ଅଳ୍ପ ପରିମାଣର କେମିକାଲ ମିଶିଥିବା ଜଣାପଡିଥିଲା। ଏବେ ଯଦି ସେହି କେମିକାଲ ବହୁଳ ଭାବେ ବ୍ୟବହାର ହେଉଥାଏ, ତେବେ ତାହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
