କଟକଣା ନାହିଁ: ବାହାର ରାଜ୍ୟକୁ ଚାଲାଣ ହେଉଛି ଧାନ
2:16 amMay 18, 2019 / 21

ବାଲିଆପାଳ, ୧୮ା୫(ଡି.ଏନ.ଏ.)-ଚଳିତ ରବିଋତୁରେ ବାଲେଶ୍ୱର ଜିଲା ବାଲିଆପାଳ ବ୍ଲକରେ ୭ହଜାର ୫ଶହ ହେକ୍ଟର ଜମିରେ ଅଧିକ ଅମଳକ୍ଷମ ଧାନ ଚାଷ ହୋଇଛି। ଏଥିରୁ ୨ଲକ୍ଷ ୫ହଜାର କୁଇଣ୍ଟାଲ ଧାନ ଉପତ୍ାଦନ ହେବାର ଲକ୍ଷ୍ୟଧାର୍ଯ୍ୟ ହୋଇଥିବା ବେଳେ ଅମଳ ସମୟରେ ପ୍ରତିଦିନ ବର୍ଷା ଏଥିରେ ବାଧା ସୃଷ୍ଟି କରୁଛି। ପ୍ରତିକୂଳ ପରିସ୍ଥିତିରେ ଉପତ୍ାଦନ କରୁଥିବା ଧାନକୁ ବିକ୍ରି କରି ଚାଷୀ ତା’ର ଉପଯୁକ୍ତ ମୂଲ୍ୟ ପାଇପାରୁନାହିଁ। ସରକାର ଧାନର ସହାୟକ ମୂଲ୍ୟ କୁଇଣ୍ଟାଲ ପ୍ରତି ୧୭୫୦ଟଙ୍କା ଧାର୍ଯ୍ୟ କରିଛନ୍ତି। ଏପର୍ଯ୍ୟନ୍ତ ବାଲିଆପାଳ ବ୍ଲକରେ ଗୋଟିଏ ହେଲେ ଧାନମଣ୍ଡି ଖୋଲି ନ ଥିବାରୁ ଚାଷୀମାନେ ଏହି ମୂଲ୍ୟ ପାଇପାରୁ ନାହାନ୍ତି। ଏହାର ସୁଯୋଗ ନେଇ ରାଜ୍ୟ ବାହାରୁ ବେପାରୀମାନେ ଡେରା ପକାଇ ସ୍ଥାନୀୟ ଦଲାଲଙ୍କ ମାଧ୍ୟମରେ କୁଇଣ୍ଟାଲ ପ୍ରତି ମାତ୍ର ୧ହଜାରରୁ ୧୧ଶହ ଟଙ୍କା ମଧ୍ୟରେ ହଜାର ହଜାର କୁଇଣ୍ଟାଲ ଧାନ କିଣି ନେଇଯାଉଛନ୍ତି। ସରକାରୀ କଟକଣା ନ ଥିବାରୁ ବିନା ପରମିଟ୍‌ରେ ଏଭଳି କାରବାର ଚାଲିଛି।
ଚାଷୀମାନେ ଧାରକରଜ, ସୋସାଇଟି ଋଣ ପରିଶୋଧ ଓ ନିଜର ଖର୍ଚ୍ଚ ମେଣ୍ଟାଇବା ପାଇଁ କମ୍‌ ଦାମରେ ଧାନ ବିକ୍ରି କରିବା ପାଇଁ ବାଧ୍ୟ ହେଉଛନ୍ତି। ବାଲିଆପାଳ ବ୍ଲକର ଦେଉଳା, ବଳରାମପୁର , ବାଲିକୋଟ, ଦେଭୋଗ, ଶ୍ରୀରାମପୁର, ବଣିଆଡିହା ଓ ବୋଳଙ୍ଗ ଆଦି ପଞ୍ଚାୟତର ବିଭିନ୍ନ ସ୍ଥାନରେ ବହୁ ସଂଖ୍ୟାରେ ୧୪ଚକିଆ ବିଭିନ୍ନ ରାଜ୍ୟ ନମ୍ବର ଥିବା ଟ୍ରକ୍‌ ସବୁ ଧାନ କିଣୁଥିବା ଦେଖିବାକୁ ମିଳୁଛି। ଏସବୁ ଧାନ ଏଠାରୁ ସିଧାସଳଖ ଆନ୍ଧ୍ର, ପଶ୍ଚିମବଙ୍ଗ, ଛତିଶଗଡ଼ ଓ ଝାଡଖଣ୍ଡ ଆଦି ରାଜ୍ୟକୁ ଯାଉଥିବା ସୂଚନା ମିଳିଛି। ଏ ସମ୍ପର୍କରେ ଧାନ ବିକ୍ରି କରୁଥିବା ଚାଷୀମାନଙ୍କୁ ପଚରାଯିବାରୁ ସେମାନେ କହିଛନ୍ତି ଯେ, ଏକ କୁଇଣ୍ଟାଲ ଧାନ ଅମଳ କରିବା ପାଇଁ ପାଖାପାଖି ୧୫୦୦ରୁ ୧୭୦୦ଟଙ୍କା ଖର୍ଚ୍ଚ ହେଉଛି। ଚଳିତବର୍ଷ ଘୂର୍ଣ୍ଣିଝଡ଼ ଓ ବାରମ୍ବାର କାଳବୈଶାଖୀ ଯୋଗୁ ଚାଷରେ କ୍ଷତି ହେବା ସହିତ ଅମଳ ମଧ୍ୟ ଆଶାତୀତ ଭାବରେ ହ୍ରାସ ପାଇଛି ା କିନ୍ତୁ ସରକାର ଘୋଷଣା କରିଥିବା ଧାନର ସହାୟକ ମୂଲ୍ୟ ୧୭୫୦ଟଙ୍କା ପାଇବା ପାଇଁ କୌଣସି ବ୍ୟବସ୍ଥା ନ ଥିବାରୁ କମ୍‌ ଦାମ୍‌ରେ ଧାନ ବିକ୍ରି କରି କ୍ଷତି ସହୁଛୁ। ତେଣୁ ଏଭଳି ଦୁର୍ଦ୍ଦିନ ସମୟରେ କିପରି ଉପଯୁକ୍ତ ମୂଲ୍ୟ ମିଳିପାରିବ ସେ ଦିଗରେ ଦୃଷ୍ଟି ଦେବାକୁ ସେମାନେ ଦାବି କରିଛନ୍ତି। ଏହାବ୍ୟତୀତ ଯେଉଁ ବାହାର ରାଜ୍ୟର ବେପାରୀମାନେ ଧାନ କିଣୁଛନ୍ତି ସେମାନଙ୍କ ଉପରେ କଟକଣା ଲଗାଯାଇ ସରକାରୀ ଧାର୍ଯ୍ୟ ମୂଲ୍ୟରେ ଧାନ କିଣିବା ପାଇଁ ବାଧ୍ୟ କରାଯିବା ଓ ସରକାରଙ୍କ ପକ୍ଷରୁ ତୁରନ୍ତ ମଣ୍ଡି ଖୋଲି ଧାନ କିଣିବାକୁ ଦାବି ହୋଇଛି। ଏ ସମ୍ପର୍କରେ ଯୋଗାଣ ନିରୀକ୍ଷକ ଦୀପକ କୁମାର ମାଝି କହିଛନ୍ତି ଯେ, ମଣ୍ଡି ଖୋଲିବା ନେଇ ଆମ ପାଖକୁ କିଛି ନିର୍ଦ୍ଦେଶ ଆସିନାହିଁ। ଚିଠି ଆସିବା ପରେ ଯାହା ପଦକ୍ଷେପ ନିଆଯିବ।