ଭୁବନେଶ୍ୱର, ୧୫।୬(ବ୍ୟୁରୋ): ଓଡ଼ିଶାରେ କରୋନା ସାମ୍ପଲ ଟେଷ୍ଟ ୨ ଲକ୍ଷ ଟପିଛି। ଏ ନେଇ ସୋମବାର ଆୟୋଜିତ ଖବରଦାତା ସମ୍ମିଳନୀରେ ଏନ୍ଏଚ୍ଏମ୍ ନିର୍ଦ୍ଦେଶିକା ଶାଳିନୀ ପଣ୍ଡିତ ସୂଚନା ଦେଇଛନ୍ତି।
ସେ କହିଛନ୍ତି, ପ୍ରଥମ ୫୦ ହଜାର ଟେଷ୍ଟିଂ ପାଇଁ ଆମକୁ ୨ ମାସ ସମୟ ଲାଗିଥିଲା। ଏବେ ପ୍ରତି ୨ ସପ୍ତାହରେ ୫୦ ହଜାର ଟେଷ୍ଟ କରାଯାଉଛି। ରାଜ୍ୟର ୧୦ ଜିଲାର ୧୭ଟି ଲ୍ୟାବ୍ରେ କରୋନା ଟେଷ୍ଟ ହେଉଛି। ଲକ୍ଷଣଯୁକ୍ତ ଓ କଣ୍ଟାକ୍ଟରେ ଥିବା ଲୋକଙ୍କର ନିଶ୍ଚିତ ଟେଷ୍ଟ କରାଯିବ ବୋଲି ମଧ୍ୟ ସେ କହିଛନ୍ତି। ତେବେ ପୂର୍ବରୁ ଲକ୍ଷଣ ନ ଥିବା ଲୋକଙ୍କର ବି ସାମ୍ପଲ ଟେଷ୍ଟ କରାଯାଉଥିଲା। ଲକ୍ଷଣ ନ ଥିବା ୨ଶହ ଲୋକଙ୍କ ସାମ୍ପଲ ଟେଷ୍ଟରୁ ଜଣେ ପଜିଟିଭ ମିଳୁଥିଲେ। ଏବେ ଲକ୍ଷଣ ଥିବା ଲୋକଙ୍କ ୨୦ଟି ସାମ୍ପଲରୁ ଜଣେ ପଜିଟିଭ ମିଳୁଛନ୍ତି। ଲକ୍ଷଣଥିବା ଲୋକଙ୍କ ସାମ୍ପଲ ଯୋଗୁ ଅଧିକରୁ ଅଧିକ କେସ୍ ମିଳୁଛି। ତେବେ ଆଗାମୀ ୪ରୁ ୬ ସପ୍ତାହ ଆମ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ। ଏହି ସମୟରେ ଅଧିକରୁ ଅଧିକ ପଜିଟିଭ କେସ୍ ଆସିବ ବୋଲି ବିଶେଷଜ୍ଞମାନେ କହୁଥିବା ଏନ୍ଏଚ୍ଏମ୍ ନିର୍ଦ୍ଦେଶିକା କହିଛନ୍ତି।
