ମୁମ୍ବାଇ,୧୩।୬: କରୋନାକୁ ରୋକିବା ଲାଗି ସାରା ଦେଶରେ ମାର୍ଚ୍ଚ ୨୫ଠାରୁ ଘୋଷଣା ହୋଇଥିବା ଲକ୍ଡାଉନ ଯୋଗୁ ଆର୍ଥତ୍କ କାର୍ଯ୍ୟକଳାପ ବନ୍ଦ ରହିଥିଲା। ଏହି ସମୟରେ ଦେଶର ଶିଳ୍ପ ୟୁନିଟଗୁଡିକରୁ ଉତ୍ପାଦନ ରେକର୍ଡ ହ୍ରାସ ପାଇଛି। ଏଭଳି କାରଣ ଲାଗି ଏପ୍ରିଲରେ ଔଦ୍ୟୋଗିକ ଉତ୍ପାଦନ ୫୫.୫% ନିମ୍ନରେ ରହିଥିବା ଜଣାପଡିଛି। ମାର୍ଚ୍ଚରେ ଏହା ୧୬.୭% ଖସିଥିଲା। ବର୍ତ୍ତମାନ କଟକଣା କୋହଳ କରାଯାଉଥିବାରୁ ଶିଳ୍ପଗୁଡିକରେ ଉତ୍ପାଦନ ବଢ଼ିବ ବୋଲି ବଜାର ବିଶେଷଜ୍ଞ କହିଛନ୍ତି। ହେଲେ ସବୁ କିଛି ଟ୍ରାକ୍କୁ ଫେରିବା ଲାଗି କଷ୍ଟକର ହେବ। କାରଣ ଶିଳ୍ପଗୁଡିକରେ ବର୍ତ୍ତମାନ ଶ୍ରମିକ,ଲଜିଷ୍ଟିକ ଏବଂ କଞ୍ଚାମାଲ ସମସ୍ୟା ଲାଗି ରହିଛି।
ସରକାର ଶୁକ୍ରବାର ଏ ସମ୍ପର୍କରେ ଡାଟା ଜାରି କରିଛନ୍ତି। ଏପ୍ରିଲରେ ଅଧିକାଂଶ ଶିଳ୍ପ ସଂସ୍ଥା ଉତ୍ପାଦନ ବନ୍ଦ ରଖିଥିବା ରିପୋର୍ଟରେ ଉଲ୍ଲେଖ ରହିଛି। ଏ ସମ୍ପର୍କରେ ବିସ୍ତୃତ ଡାଟା ସରକାର ଜାରି କରିନାହାନ୍ତି। ଏପ୍ରିଲ ଆଇଆଇପି ଡାଟାକୁ ଅନ୍ୟ ମାସ ସହ ତୁଳନା କରିବା ଉଚିତ ନୁହେଁ ବୋଲି ସରକାରଙ୍କ ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ପକ୍ଷରୁ ଯୁକ୍ତିରେ କୁହାଯାଇଛି। ଔଦ୍ୟୋଗିକ ଉତ୍ପାଦନ ସୂଚୀ(ଆଇଆଇପି)ରେ ମାନୁଫାକଚରିଂର ଅଂଶ ୭୮% ରହିଛି। ଏପ୍ରିଲ କାର୍ଯ୍ୟକଳାପ ବାଧାପ୍ରାପ୍ତ ହେବା ଯୋଗୁ ମାନୁଫାକଚରିଂ ୬୪.୨% ଖସିଥିବା ଜଣାପଡିଛି। ମାର୍ଚ୍ଚରେ ମାତ୍ର ୭ ଦିନ ଲକ୍ଡାଉନ ରହିଥିବା ବେଳେ ମାନୁଫାକଚରିଂ ୨୦.୬% ହ୍ରାସ ଘଟିଛି।
ଏଥିରୁ ଜଣାପଡୁଛି ଯେ, ଦେଶର ଶିଳ୍ପ କ୍ଷେତ୍ର ଚାପରେ ରହିଛି। ମାନୁଫାକଚରିଂ ସମସ୍ତ ୨୩ ଉପକ୍ଷେତ୍ରରେ ଗତ ମାସଗୁଡିକରେ ହ୍ରାସ ଧାରା ଜାରି ରହିଛି। ଏହି ସମୟରେ ଖଣି କ୍ଷେତ୍ର କାର୍ଯ୍ୟକଳାପ ୨୭.୩% ଖସିଛି। ଚାହିଦା କମିବା ଯୋଗୁ ବିଦ୍ୟୁତ୍ ଉତ୍ପାଦନ ୨୨% ହ୍ରାସ ଘଟିଛି। ୨୦୧୯-୨୦ରେ ଶିଳ୍ପ ଉତ୍ପାଦନ ୦.୭% ହ୍ରାସ ଘଟିଛି। ଏହା ୨୦୧୮-୧୯ରେ ୩.୮% ଅଭିବୃଦ୍ଧି ହାସଲ କରିଥିଲା।
