ଅନେକ ସନ୍ତାନ ପରିବାରରେ ମାତାପିତାଙ୍କୁ ଏକୁଟିଆ ଛାଡ଼ି ଦେଇ ଅନ୍ୟତ୍ର ରହୁଥିବା ଦେଖାଯାଉଛି। ଏଭଳି ସ୍ଥିତିରେ ସେମାନେ ଖାଇଲେ କି ନାହିଁ ତା’ଉପରେ ବି ଚିନ୍ତା କରୁନାହାନ୍ତି। ଅନେକ ମାତାପିତା ଅସହାୟ ଅବସ୍ଥାରେ ଜୀବନ ବିତାଉଛନ୍ତି ତ ଅନେକେ ବୃଦ୍ଧାଶ୍ରମକୁ ଚାଲିଯାଉଛନ୍ତି। କିନ୍ତୁ ପୁଣେର ଦୀପଙ୍କର ଏଭଳି ଅନେକ ବୃଦ୍ଧାବୃଦ୍ଧଙ୍କ ଆଶାବାଡ଼ି ପାଲଟିଛନ୍ତି। ଦୀପଙ୍କର ସେମାନଙ୍କୁ ମାଗଣାରେ ଖାଦ୍ୟ ଯୋଗାଇ ଦେଉଛନ୍ତି। ସେ ଆର୍ଟ ଅଫ୍ ହେଲ୍ପିଂ ଫାଉଣ୍ଡେଶନ ଦ୍ୱାରା ଏହି ସେବା ଜାରି ରଖିଛନ୍ତି। ଦୀପଙ୍କରଙ୍କ ସହ ଅନେକ ସ୍ବେଚ୍ଛାସେବୀ ସାମିଲ ହୋଇଛନ୍ତି। ସେମାନେ ଘରେ ଅସହାୟ ଅବସ୍ଥାରେ ଥିବା ବୃଦ୍ଧାବୃଦ୍ଧଙ୍କ ନିକଟରେ ପ୍ରତିଦିନି ଖାଦ୍ୟ ପହଞ୍ଚାଇ ଦେଉଛନ୍ତି। କେବଳ ମାଗଣାରେ ଖାଦ୍ୟ ଦେଉନାହାନ୍ତି, ବରଂ ସେମାନଙ୍କୁ ତେଜରାତି, ବସ୍ତ୍ର ଓ ଔଷଧ ଯୋଗାଇ ଦେଉଛନ୍ତି; ଏପରି କି ସେମାନଙ୍କ ଘର ମଧ୍ୟ ସଫା କରିଦେଉଛନ୍ତି। ବହୁ ସମୟରେ ସ୍ବେଚ୍ଛାସେବୀମାନେ ବୃଦ୍ଧାବୃଦ୍ଧଙ୍କ ନିକଟରେ ରହି ସେମାନଙ୍କ ମନକୁ ହାଲୁକା କରୁଛନ୍ତି। ଦୀପଙ୍କରଙ୍କୁ ୨ ବର୍ଷ ହୋଇଥିବାବେଳେ ସେ ପିତାଙ୍କୁ ହରାଇଥିଲେ। ପରେ ବହୁ କଷ୍ଟରେ ଶିକ୍ଷା ଶେଷକରି ଚାକିରି କରିଥିଲେ, କିନ୍ତୁ ତାହାକୁ ଛାଡ଼ି ଏହି କାର୍ଯ୍ୟ କରୁଛନ୍ତି। ଏବେ ସେ ୨୦୦-୩୦୦ ବୃଦ୍ଧାବୃଦ୍ଧଙ୍କୁ ନେଇ ଏକ ବୃଦ୍ଧାଶ୍ରମ ଖୋଲିବାକୁ ଯୋଜନା କରିଛନ୍ତି।
