ବେଙ୍ଗାଲୁରୁର ୪ ଜଣ ସାଙ୍ଗ ୧ଟଙ୍କା ମୂଲ୍ୟରେ ଗରିବ ଲୋକଙ୍କୁ ପୋଷାକ ଯୋଗାଇ ଦେଉଛନ୍ତି। ମେଲିଶା ନୋରା, ବିନୋଦ୍ ଲୋବୋ, ନୀତିନ କୁମାର ଏବଂ ବିଗ୍ନେଶ ‘ଇମାଜିନ୍ ଟ୍ରଷ୍ଟ’ ଗଠନ କରି ତା’ରି ମାଧ୍ୟମରେ ପୋଷାକ ଦେଉଛନ୍ତି। ଟ୍ରଷ୍ଟର ସ୍ବେଚ୍ଛାସେବୀମାନଙ୍କ ଦ୍ୱାରା ଏହି କାର୍ଯ୍ୟ ସମ୍ପାଦନ କରାଯାଉଛି। ଏହି ୪ ସାଙ୍ଗ ଚାକିରି କରିଛନ୍ତି। ସେମାନେ ଏଥିପାଇଁ ‘ଇମାଜିନ୍ ବସ୍ତ୍ର ବ୍ୟାଙ୍କ’ ଖୋଲିଛନ୍ତି। ରବିବାର ଏହି ‘ବସ୍ତ୍ର ବ୍ୟାଙ୍କ ଖୋଲା ରହୁଛି ଏବଂ ଗରିବମାନେ ସେଠାରୁ ସେମାନଙ୍କ ପସନ୍ଦର ପୋଷାକ ମାତ୍ର ୧ ଟଙ୍କାରେ କିଣୁଛନ୍ତି। ଲୋକମାନେ ‘ବସ୍ତ୍ର ବ୍ୟାଙ୍କ୍’କୁ ପୋଷାକ ଦାନ କରୁଛନ୍ତି। ଏହା ବ୍ୟତୀତ ସ୍ବେଚ୍ଛାସେବୀମାନେ ଲୋକମାନଙ୍କଠାରୁ ବ୍ୟବହୃତ ପୋଷାକ ଯାହା ସମ୍ପୂର୍ଣ୍ଣ ବ୍ୟବହାରଯୋଗ୍ୟ, ତାହା ସବୁ ସଂଗ୍ରହ କରୁଛନ୍ତି। ଏହିସବୁ ପୋଷାକକୁ ସଫା କରାଯାଇ ରଖାଯାଉଛି। ଅଦରକାରୀ କିମ୍ବା ଚିରାଫଟା ପୋଷାକରୁ ତକିଆଖୋଳ କିମ୍ବା ମ୍ୟାଟ୍ ପ୍ରସ୍ତୁତ କରାଯାଇ ଗରିବମାନଙ୍କୁ ମାଗଣାରେ ଦିଆଯାଉଛି। ଲକ୍ଡାଉନ୍ ସମୟରେ ଏଭଳି କାର୍ଯ୍ୟ କରିବାକୁ ସେମାନେ ନିଷ୍ପତ୍ତି ନେଇଥିଲେ। ତେବେ ପ୍ରତି ସପ୍ତାହରେ ୧୫୦ରୁ ଅଧିକ ପରିବାର ବସ୍ତ୍ର ବ୍ୟାଙ୍କରୁ ପୋଷାକ ନେଉଛନ୍ତି। ଏବେ ସୁଦ୍ଧା ମୋଟ୍ରେ ସେମାନେ ୧୨,୦୦୦ରୁ ଅଧିକ ଗରିବ ଲୋକଙ୍କୁ ୧ ଟଙ୍କାରେ ବସ୍ତ୍ର ଯୋଗାଇ ସାରିଲେଣି।
