ମହିଳାଙ୍କ ସ୍ବାସ୍ଥ୍ୟ କ୍ଷେତ୍ରରେ ଯେଉଁ କେତେଜଣ ବୈଜ୍ଞାନିକ କାର୍ଯ୍ୟ କରୁଛନ୍ତି ସେମାନଙ୍କ ମଧ୍ୟରେ ଆଇଆଇଟି ୫ ଦିଲ୍ଲୀର ଦୁଇ ଜଣ ଏବେ ନୂତନତ୍ୱ ପାଇଁ ପ୍ରଶଂସିତ ହୋଇଛନ୍ତି। ଏହି ଦୁଇ ମ୍ୟାଟେରିଆଲ ବୈଜ୍ଞାନିକ ହେଲେ ଡ. ସବାପାଥି ଏସ୍ ଏବଂ ଅନୁପ ଘୋଷ। ସେମାନେ ଏକ ପ୍ରକାର ପରିବେଶ ଉପଯୋଗୀ ଓ ସୁପର ଆବର୍ଜବେଣ୍ଟ ପ୍ରସ୍ତୁତ କରିଛନ୍ତି ଏବଂ ଏଥିରେ ସାନିଟାରି ପ୍ୟାଡ ଶସ୍ତାରେ ହୋଇପାରୁଛି। ଭାରତରେ ୬୪% ମହିଳା ସାନିଟାରି ପ୍ୟାଡ ବ୍ୟବହାର କରୁଛନ୍ତି। ଏଣୁ ଶସ୍ତା ଓ ପରିବେଶ ଉପଯୋଗୀ ପ୍ୟାଡ କିଭଳି ଆହୁରି ଅଧିକ ମହିଳା ବ୍ୟବହାର କରିବେ ସେହି ଲକ୍ଷ୍ୟରେ ଏହି ଦୁଇ ଜଣ ବୈଜ୍ଞାନିକ ଏଭଳି ପ୍ୟାଡ ତିଆର କରିବାରେ ସଫଳ ହୋଇଛନ୍ତି। ଦୁଇବର୍ଷ ଗବେଷଣା ପରେ ସେମାନେ ୨୦୨୩ରେ ପ୍ରଥମେ ଏଭଳି ପ୍ୟାଡ୍ ତିଆରି କରିଛନ୍ତି। ରେଗୁଲାର ସାନିଟାରି ପ୍ୟାଡରେ ଥିବା ସିଙ୍ଗଲ ୟୁଜ ପଲିମର ଏବଂ ପ୍ଲାଷ୍ଟିକ ଶିଟ୍ ପରିବେଶ ପାଇଁ କ୍ଷତିକାରକ। କାରଣ ଏହା ସହଜରେ ମାଟିରେ ମିଶୁନାହିଁ କିନ୍ତୁ ସବାପାଥି ଓ ଘୋଷଙ୍କ ଦ୍ୱାରା ତିଆରି କରାଯାଉଥିବା ପ୍ୟାଡ୍ ବ୍ୟବହାର ପରେ ମାତ୍ର ୩ ମାସରେ ମାଟିରେ ସମ୍ପୂର୍ଣ୍ଣ ମିଶିଯାଉଛି ଏବଂ ଏହାର ପରିବେଶ ଉପରେ କୌଣସି ନକାରାମତ୍କ ପ୍ରଭାବ ରହୁନାହିଁ। ସେମାନେ ପ୍ୟାଡ ନିର୍ମାତାଙ୍କ ପାଇଁ ଏହି ପ୍ରକାର ପ୍ୟାଡ୍ ତିଆରି କରିବା ଲାଗି ପ୍ରଶିକ୍ଷଣର ବ୍ୟବସ୍ଥା ମଧ୍ୟ କରିଛନ୍ତି। ଏବେ ଏହିି ପ୍ୟାଡ କର୍ନାଟକ ଓ ତାମିଲନାଡୁରେ ବିକ୍ରି ଆରମ୍ଭ ହୋଇଛି ଓ ଖୁବ୍ ଶୀଘ୍ର ଅନ୍ୟ ରାଜ୍ୟଗୁଡ଼ିକରେ ଉପଲବ୍ଧ ହେବ ବୋଲି କହନ୍ତି ସବାପାଥି।
