ଜୟପୁର,୨୧।୨(ନି.ପ୍ର.)- ଆଦିବାସୀ ଅଧ୍ୟୁଷିତ ଅବିଭକ୍ତ କୋରାପୁଟ ସହ ଗଜପତି ଜିଲାର ଅନେକ ଗାଁକୁ ଏବେ ମଧ୍ୟ ବିଜୁଳି ପହଞ୍ଚତ୍ନାହିଁ। ସେଭଳି ଗ୍ରାମାଞ୍ଚଳରେ ଲୋକଙ୍କ ମନୋରଞ୍ଜନ ପାଇଁ ଜୟପୁର ଆକାଶବାଣୀ କେନ୍ଦ୍ର କେବଳ ଏକମାତ୍ର ମାଧ୍ୟମ ନୁହେଁ, ବରଂ ଏହା ଚାଷୀ ଓ ମହିଳାଙ୍କ ପାଇଁ ସୂଚନା ସହାୟକ ଭାବେ ରହିଆସିଛି। ଏହି କେନ୍ଦ୍ର ଶ୍ରୋତାଙ୍କ ପ୍ରିୟଭାଜନ ହେବା ସହ ପାଣିପାଗ, କୃଷି, ସ୍ବାସ୍ଥ୍ୟ, ଶିକ୍ଷା ଭଳି ପ୍ରସଙ୍ଗରେ ରେଡିଓ ଦ୍ୱାରା ସଚେତନ ହୋଇପାରୁଛନ୍ତି ଗ୍ରାମାଞ୍ଚଳର ଚାଷୀ ଓ ମହିଳା।
ଅବିଭକ୍ତ କୋରାପୁଟ ସହ ଗଜପତି ଜିଲାର ଗାଁ ଗହଳିରେ ମନୋରଞ୍ଜନର ପ୍ରମୁଖ ମାଧ୍ୟମ ଥିଲା ଜୟପୁର ଆକାଶବାଣୀ। ୧୯୬୪ରେ ସ୍ଥାପିତ ଏହି କେନ୍ଦ୍ର ବହୁ ଲୋକପ୍ରିୟ କାର୍ଯ୍ୟକ୍ରମ ପ୍ରସାରଣ କରି ୫୦ରୁ ଅଧିକ ଜାତୀୟସ୍ତରୀୟ ସମ୍ମାନ ଓ ପୁରସ୍କାର ପାଇଛି। ଏହି କେନ୍ଦ୍ରକୁ ସୂଚନା ଓ ପ୍ରସାରଣ ମନ୍ତ୍ରାଳୟ ଦ୍ୱାରା ମିଡିୟମ ୱେଭରୁ ଉଚ୍ଚଶକ୍ତି ସମ୍ପନ୍ନ ସର୍ଟୱେଭରେ ପରିଣତ କରାଯାଇଛି। ଏହା ରାଜ୍ୟର ଏକମାତ୍ର ସର୍ଟୱେଭ ଟ୍ରାନ୍ସମିଟର (ଟାୱାର)। କେବଳ ମନୋରଞ୍ଜନ ନୁହେଁ, ଆଦିବାସୀ ଅଧ୍ୟୁଷିତ ଅଞ୍ଚଳରେ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ସାମାଜିକ ତଥା ଅନ୍ୟ କ୍ଷେତ୍ରୀୟ ବିକାଶରେ ଏହି କେନ୍ଦ୍ର ପ୍ରମୁଖ ଭୂମିକା ନେଇଛି। ଏହି କେନ୍ଦ୍ର ୧୯୮୩ରେ ଉତ୍ତମ ବୈଷୟିକ ରକ୍ଷଣାବେକ୍ଷଣ ପାଇଁ ପୂର୍ବାଞ୍ଚଳ ଜୋନରୁ ପ୍ରଥମ ପୁରସ୍କାର, ୧୯୯୨ରେ ଧରଣୀମା’ ପାଇଁ ଜାତୀୟସ୍ତରର ପ୍ରଥମ ପୁରସ୍କାର, ୧୯୯୩ରେ ବେତାର ନାଟକ ଗୁରୁ ପାଇଁ ଜାତୀୟ ସ୍ତରର ପ୍ରଥମ ପୁରସ୍କାର, ୧୯୯୪ରେ ବିଜୟ କୀ କାର୍ଯ୍ୟକ୍ରମ ପାଇଁ ଜାତୀୟସ୍ତରର ଦ୍ୱିତୀୟ ପୁରସ୍କାର,୧୯୯୫ରେ ବାବୁଲା ପୁରାଣ ପାଇଁ ଜାତୀୟସ୍ତରର ଦ୍ୱିତୀୟ ପୁରସ୍କାର ପାଇଛି। ୧୯୯୬ରେ ବେତାର ନାଟକ ବାଘ ପାଇଁ ଜାତୀୟ ସ୍ତରରେ ଦ୍ୱିତୀୟ ପୁରସ୍କାର, ୧୯୯୮ରେ ପରିବାର କଲ୍ୟାଣ କାର୍ଯ୍ୟକ୍ରମ ନିଶାରୁଆ ପାଇଁ ଜାତୀୟ ସ୍ତରରେ ପ୍ରଥମ ପୁରସ୍କାର, ୨୦୦୫ରେ ‘ଉଠରେ ପାପୁନି’ ପାଇଁ ଇରାନର ରାଜଧାନୀ ତେହେରାନରେ ଅନ୍ତର୍ଜାତୀୟ ବେତାର ପୁରସ୍କାର, ୨୦୦୬ରେ ଏଡସ୍ ସମ୍ବନ୍ଧୀୟ କାର୍ଯ୍ୟକ୍ରମ ମୋତି ମାଣିକ ପାଇଁ ଜାତୀୟ ପୁରସ୍କାର, ମୋତି ମାଣିକ ପାଇଁ ୨୦୦୭ରେ ଅନ୍ତର୍ଜାତୀୟ ସ୍ତରରେ ଏସିଆ ପ୍ୟାସିଫିକ ବ୍ରଡକାଷ୍ଟିଙ୍ଗ ୟୁନିୟନ ଏବିୟୁ ପୁରସ୍କାରରେ ସମ୍ମାନିତ କରାଯାଇଥିଲା। ୨୦୦୯ରେ ଉଦ୍ଘୋଷକ ଅଶୋକ ମିଶ୍ରଙ୍କ ଦ୍ୱାରା ପ୍ରାୟୋଜିତ ତଥା ନିର୍ଦ୍ଦେଶିତ ଏଡ୍ସ ସମ୍ବନ୍ଧୀୟ କାର୍ଯ୍ୟକ୍ରମ ‘ଜାଣିଲେ ଜିଣିବା’ ପାଇଁ ମଙ୍ଗୋଲିଆର ରାଜଧାନୀ ଉଲାନବାଟରେ ଅନ୍ତର୍ଜାତୀୟ ପୁରସ୍କାର, ୨୦୧୦ରେ ୨୦୦୯ ବର୍ଷ ପାଇଁ ପ୍ରସାର ଭାରତୀର ବାର୍ଷିକ ପୁରସ୍କାର ଶୃଙ୍ଖଳା ଅନ୍ତର୍ଗତ ଉତ୍ତମ ବୈଷୟିକ ରକ୍ଷଣାବେକ୍ଷଣ ପାଇଁ ଜାତୀୟସ୍ତରର ମାନଚାନ୍ଦ ପୁରସ୍କାର ମିଳିଛି। ମନୋଜ ସାମନ୍ତରାୟଙ୍କ ପ୍ରଯୋଜନାରେ ‘ଜୟ କିଶାନ’ ପାଇଁ ୨୦୧୫ରେ ପ୍ରଥମ ପୁରସ୍କାର, ୨୦୧୬ରେ ରଞ୍ଜନ ବେହେରାଙ୍କ କାର୍ଯ୍ୟକ୍ରମ ‘ବଗିଚାକୁ ଆସ’ ପ୍ରଥମ ପୁରସ୍କାର, ଜଗଦୀଶ ଅଧିକାରୀଙ୍କ କାର୍ଯ୍ୟକ୍ରମ ‘ଇନ୍ଦ୍ରଧନୁ ଆଟ ନାଇଟ୍ସ’ ୨୦୧୭ରେ ପ୍ରଥମ ପୁରସ୍କାର ଓ ନିକଟରେ ମନୋଜ ସାମନ୍ତରାୟଙ୍କ କାର୍ଯ୍ୟକ୍ରମ ସଡ଼କ ସୁରକ୍ଷା ଇରାନରେ ଆନ୍ତର୍ଜାତିକ ରେଡିଓ ମେଳାରେ ସ୍ଥାନିତ ହେବ ବୋଲି ସୂଚନା ମିଳିଛି। ଜୟପୁର ଆକାଶବାଣୀ କେନ୍ଦ୍ରର ସର୍ଟ ଓ୍ବେଭ୍ ଟ୍ରାନ୍ସମିଟର ମାଧ୍ୟମରେ ପ୍ରଚାରିତ କାର୍ଯ୍ୟକ୍ରମ ବିଦେଶରେ ମଧ୍ୟ ଲୋକପ୍ରିୟତା ପାଇଛି। ଏହି କେନ୍ଦ୍ରର କାର୍ଯ୍ୟକ୍ରମ ସ୍ବିଡେନ, ନେଦରଲାଣ୍ଡସ, ଅଷ୍ଟ୍ରେଲିଆ, ଭୂମଧ୍ୟସାଗର, ହଂକଂ, ଥାଇଲାଣ୍ଡ, ଇଟାଲି, ଜାପାନ, ଇଣ୍ଡୋନେସିଆ, ଅଷ୍ଟ୍ରିଆ ତଥା ଫିଲିପାଇନ୍ସରେ ମଧ୍ୟ ଶୁଣାଯିବା ସହ ଲୋକପ୍ରିୟ ଅର୍ଜନ କରିପାରିଛି।
