ରାଜକୋଟ,୧୩।୩(ପି.ଟି.)- ଅଧିନାୟକ ଉନାଡ୍କଟଙ୍କ ଦମଦାର ସ୍ପେଲ ବଳରେ ସୌରାଷ୍ଟ୍ର ଦଳ ପ୍ରଥମ ଥର ପାଇଁ ରଣଜୀ ଟାଇଟଲ ହାସଲ କରିଛି। ଗତବର୍ଷ ରନର୍ସଅପ୍ରେ ସନ୍ତୁଷ୍ଟ ରହିଥିବା ସୌରାଷ୍ଟ୍ର ବେଙ୍ଗଲ ବିପକ୍ଷ ଫାଇନାଲ ମ୍ୟାଚ୍କୁ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ଜିତିନେଇଛି। ଶୁକ୍ରବାର ମ୍ୟାଚ୍ର ଅନ୍ତିମ ଦିନ ଇନିଂସ ଅଗ୍ରଣୀ ପାଇଁ ବେଙ୍ଗଲକୁ ୪ ଉଇକେଟରେ ୭୨ ରନ୍ ଦରକାର ଥିଲା। ପୂର୍ବଦିନ ଅପରାଜିତ ଥିବା ବ୍ୟାଟ୍ସମ୍ୟାନ ଅନୁସ୍ତୂପ ମଜୁମଦାର (୫୮) ଓ ଅର୍ନବ ନନ୍ଦୀ (୨୮) ବ୍ୟାଟିଂ ଆରମ୍ଭ କରିଥିଲେ। ବେଙ୍ଗଲ ଜିତିବାର ସର୍ବାଧିକ ସମ୍ଭାବନା ଥିଲା। କିନ୍ତୁ ଗୁଜରାଟ ବିପକ୍ଷ ସେମିଫାଇନାଲର ଅନ୍ତିମ ଦିନ ୭ ଉଇକେଟ ଅକ୍ତିଆର କରି ସୌରାଷ୍ଟ୍ର ଦଳକୁ ଫାଇନାଲରେ ପ୍ରବେଶ କରାଇଥିବା ଅଧିନାୟକ ଉନାଡ୍କଟ ପୁଣି ଥରେ ମ୍ୟାଚ୍ର ମୋଡ଼ ବଦଳାଇଥିଲେ। ବାମହାତୀ ପେସର ଇନ ଫର୍ମ ମଜୁମଦାରଙ୍କୁ ଏଲବିଡବ୍ଲ୍ୟୁ ଆଉଟ୍ କରିଥିଲେ। ମାତ୍ର ୨ ବଲ ବ୍ୟବଧାନରେ ଆକାଶ ଦୀପ ରନ୍ଆଉଟ୍ ହୋଇଥିଲେ। ଏଥିସହ ମ୍ୟାଚ୍ ପୁରା ଓଲଟି ପଡ଼ିଥିଲା। ଶୁକ୍ରବାର ଏକ ଘଣ୍ଟା ୧୦ ମିନିଟ୍ ମଧ୍ୟରେ ମାତ୍ର ୨୭ ରନ୍ରେ ବେଙ୍ଗଲ ତା’ର ସମସ୍ତ ଉଇକେଟ ହରାଇ ୩୮୧ ରନ୍ରେ ସୀମିତ ରହିଥିଲା। ଫଳରେ ପ୍ରଥମ ଇନିଂସରେ ୪୨୫ ରନ୍ କରିଥିବା ସୌରାଷ୍ଟ୍ର ୪୪ ରନ୍ର ଅଗ୍ରଣୀ ହାସଲ କରିଥିଲା। ଦ୍ୱିତୀୟ ଇନିଂସରେ ଦୁଇ ଅଧିନାୟକ ମ୍ୟାଚ୍ ଡ୍ର’ ଘୋଷଣା କରିବା ପୂର୍ବରୁ ସୌରାଷ୍ଟ୍ର ଦଳକୁ ଚା’ ପାନ ବିରତି ପର୍ଯ୍ୟନ୍ତ ବ୍ୟାଟିଂ କରିବାକୁ ପଡ଼ିଥିଲା। ଘରୋଇ ଦଳ ୩୪ ଓଭରରେ ୪ ଉଇକେଟ ୧୦୫ ରନ୍ କରିଥିଲା। ଏହି ବିଜୟ ସହ ସୌରାଷ୍ଟ୍ର ତା’ର ରଣଜୀ ଟାଇଟଲ ଆଶା ପୂରଣ କରିଛି। ଅନ୍ୟପକ୍ଷରେ ୧୯୮୯-୯୦ଠାରୁ ଚାଲିଥିବା ରଣଜୀ ଟାଇଟଲ ହାତେଇବା ଆଶା ଜାରି ରଖିଛି ବେଙ୍ଗଲ। ଚାମ୍ପିୟନ ଦଳର ଅଧିନାୟକ ଉନାଡ୍କଟ ଚଳିତ ସିଜନରେ ସର୍ବାଧିକ ୬୭ ଉଇକେଟ ନେଇଛନ୍ତି। ମ୍ୟାଚ୍ରେ ଏକମାତ୍ର ଶତକ ହାସଲ କରିଥିବା ଚାମ୍ପିୟନ ଦଳର ଅର୍ପିତ ବାସାଭାଡାଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଛି।
