ଭୁବନେଶ୍ୱର, ୧୪ା୪ (ସ୍ପୋଟର୍ସ ବ୍ୟୁରୋ)- କରୋନା ଭାଇରସ୍ ସଂକ୍ରମଣ ଆଶଙ୍କା ଯୋଗୁ ସମଗ୍ର ଦେଶରେ ଲକ୍ଡାଉନ୍ ଚାଲିଥିବାରୁ କ୍ରୀଡ଼ା କାର୍ଯ୍ୟକଳାପ ଏକ ପ୍ରକାର ସ୍ଥାଣୁ ପାଲଟି ଯାଇଛି। ତେବେ ଏହି ସମୟରେ ଅଗ୍ରଣୀ ସ୍ପୋଟର୍ସ ମ୍ୟାନେଜମେଣ୍ଟ କମ୍ପାନୀ ଆଇଡିଆଜ୍ ଅନ୍ଲିମିଟେଡ୍ ସ୍ପୋଟର୍ସ ମ୍ୟାନେଜମେଣ୍ଟ ଗ୍ରୁପ୍ (ଆଇୟୁଏସ୍ଏମ୍) ତରଫରୁ ସଂସ୍ଥାର ଫେସ୍ବୁକ୍ ପେଜ୍ରେ ‘ ଇନ୍ ଆଣ୍ଡ୍ ଆଉଟ୍ ଅଫ୍ ଗ୍ରାସ୍ରୁଟ୍ ଫୁଟ୍ବଲ ଡେଭଲପମେଣ୍ଟ’ କାର୍ଯ୍ୟକ୍ରମର ସିଧା ପ୍ରସାରଣ କରାଯାଉଛି। ପ୍ରଥମ ସେସନ ରବିବାର ସକାଳ ୧୧ ଟା ୩୦ରେ ଆରମ୍ଭ ହୋଇଥିଲା। ଚଳିତ ମାସ ୩୦ ତାରିଖ ପର୍ଯ୍ୟନ୍ତ ପ୍ରତ୍ୟେକ ରବିବାର ଓ ଗୁରୁବାର ସକାଳେ ଏହି ସେସନର ସିଧାପ୍ରସାରଣ କରାଯିବ। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)ର ପୂର୍ବତନ ମୁଖ୍ୟ କୋଚ୍ ଶ୍ୟାମ ମାନିକ୍ ଲୋଧ୍ ସମସ୍ତ ସେସନ ପରିଚାଳନା କରୁଛନ୍ତି। ଲୋଧ୍ ଗତ ଦୁଇ ବର୍ଷ କଟକ ସାଇ ହଷ୍ଟେଲରେ କାର୍ଯ୍ୟ କରିଥିଲେ। ଓଡ଼ିଶାରେ ମହିଳା ଫୁଟ୍ବଲର ବିକାଶ କ୍ଷେତ୍ରରେ ସେ କାର୍ଯ୍ୟ କରିଥିଲେ। ତାଙ୍କ କାର୍ଯ୍ୟକାଳ ସମୟରେ ଓଡ଼ିଶାରୁ ୪ ଜଣ ବାଳିକା ଜାତୀୟ ମହିଳା ଦଳରେ ସ୍ଥାନ ପାଇଥିଲେ। ଲୋଧ୍ ଏସିଆନ ଫୁଟ୍ବଲ କନଫେଡେରେଶନର ଏ’ ଲାଇସେନ୍ସପ୍ରାପ୍ତ କୋଚ୍ ତଥା ଏଆଇଏଫ୍ଏଫ୍ର ଡି’ ଲାଇସେନ୍ସପ୍ରାପ୍ତ କୋଚ୍୍ ତଥା ଏଜୁକେଟର। ଆଇୟୁଏସ୍ଏମ୍ ତରଫରୁ କାର୍ଯ୍ୟକ୍ରମ ମାଧ୍ୟମରେ ଦେଶର ଯୁବ ଫୁଟ୍ବଲ କୋଚ୍ଙ୍କୁ ବିକଶିତ କରିବା ସହ ନିଜ ପିଲାଙ୍କୁ ଭବିଷ୍ୟତରେ ଜଣେ ଫୁଟ୍ବଲର କରିବାକୁ ଅଭିଳାଷ ରଖିଥିବା ମାତାପିତାଙ୍କୁ ଉପଯୋଗୀ ପରାମର୍ଶ ଦିଆଯିବାର ବ୍ୟବସ୍ଥା କରାଯାଇ ଥିବା ସଂସ୍ଥାର ସିଓଓ ସଞ୍ଜୟ ଶ୍ରୀବାସ୍ତବ କହିଛନ୍ତି।
